VOV4.K’ho- Ngai 21/10, Ủy ƀan Mặt trận dà lơgar Việt Nam càr Gia Lai bơyai lơh pơrjum jờng rơ Củ tịc Ủy ƀan Mặt trận dà lơgar kâp xã mờ Kwang atbồ Mpồl lơh broă mặt trận geh pơn rơ jak càr Gia Lai tơngai bơh nam 2017 tus nam 2022. Gia Lai tŭ do geh 220 nă Củ tịc Ủy ƀan Mặt trận dà lơgar Việt Nam kâp xã mờ 1 rô 576 nă kwang atbồ mpồl lơh broă Mặt trận.

Gùt anih pơrjum

Ngui niam gơnoar broă, kơnòl broă gơ wèt mờ mpồl bơtiàn, 5 nam do, ală kwang bàng mặt trận neh sùm jơh nùs pơgồp bal mờ ală mpồl, gah broă lơh tàm kâp hơ đơm mblàng yal, hòi jà làng bol tus bal tă pơgồp, dong kờl, jơh nùs hòi jà, tă pơgồp nàng lơh hìu ơm, dong kờl ai geh broă lơh hìu bơnhă rƀah in, ai is ù lơh gùng bơt bơtàu ƀòn lơgar pa; mblàng yal, hòi jà làng bol kòn cau dùl êt nă cau tam gơl mờng kwèng kơlôi sơnơng, broă lơh nàng lik klàs rƀah kơ̆ kơljap. Uă kwang bàng geh ală broă lơh niam, broă lơh bơceh pa, geh cồng nha tàm broă lơh mblàng yal, hòi jà, tơrgùm ală rơnàng làng bol ngui niam bơta pràn tam klac dờng gùt jơi bơtiàn. Di dơ̆ do, Ủy ƀan Ñân zân càr Gia Lai mờ Ủy ƀan Mặt trận dà lơgar Việt Nam càr Gia Lai jàu pà ƀằng khen ai 92 nă cau dùl nă să geh cồng nha jak ngan in.

VOV/Cau mblàng K’Duẩn