Jăt jơnau ai, nàng sền gàr 10 rơbô lồ brê tàm xã Ia Mơr, kơnhoàl Chư Prông, Mpồl atbồ sền gàr brê rơcang gàr lài Ia Mơr kờñ pal geh 17 nă cau. Mơya, tàm uă nam do, mpồl atbồ sền gàr brê mìng geh 12 nă cau lơh broă. Lơh broă ờ kờp ngai kung bè mang tàm tiah geh uă bơta mus kơl kơñao chi brê uă tàm càr, mơya priă nhai kwang bàng, cau lơh broă tàm do mìng geh bơh 5 tus 7 tơlăk đong tàm 1 nhai.

Ồng Đinh Văn Khẩn, Kwang atƀồ mpồl sền gàr brê rơcang gàr lài Ia Mơr yal, geh 1 tàm 5 nă cau tàm mpồl atbồ brê neh cih sră dan ơm lơh broă tàm nam 2022, mơya ờ hềt geh bơsong, pà git: “Broă sền gàr brê tŭ do kal ke ngan, tàm Mpồl atbồ brê Ia Mơr den sơlơ kal ke rơlao, tiah rềp mờ bơtơ̆t rơbòng dà Ia Mơr. Geh 3 nơm rơbòng dà geh lơh tàm brê, gam làng bol tŭ gŏ bè hơ̆ den kờñ geh ù lơh sa. 2 nă cau lơh broă neh dan ơm ờ lơh broă tai. Tŭ do di lah añ ơm den ờ geh cau lơh broă tai”.

Glar bòl, priă nhai ờ uă, cau lơh broă sền gàr brê sùm pal gơtìp mờ bơta ngòt rơngơ̆t. Ồng Đinh Mạnh Phong, Kwang atbồ Mpồl atbồ sền gàr brê rơcang lài pà git, tŭ do, tơl nă cau lơh broă geh kơnòl sền gàr 1 bă brê, ndrờm mờ 1 rơbô lồ brê. Brê bơnơm sùm ngài mờ ƀòn ơm kis, ù tiah kal ke. Cau mus kơl kơñao chi brê tŭ lơi kung tam dră, sò tơm tŭ gŏ, mơya mpồl sền gàr brê sùm gơtìp tàm bơta ờ jai: “Bàr, pe nă oh mi gơtìp cau mus kơl kơñao chi brê lơh, lơh gơrềng uă ngan tus mờ nùs nhơm broă lơh. Gơnoar tờm bơh ală mpồl sền gàr brê ờ uă ngan, mìng geh gŏ hơ̆ sồng yal. Bè mpồl lơh broă añ dê, jăt mờ kơrnoăt geh ai den phan soh, phan lơh broă den ai bơh mpồl lơh broă, priă geh den ờ uă, pal crè pơnì ào”.

Tàm càr Gia Lai tŭ do geh 22 mpồl sền gàr brê, mờ mờr 500 nă kwang bàng, viên cứk, pơn drờm mờ khà geh ai sền gàr brê den gam ờ tơl rơlao 200 nă. Cau sền gàr brê neh ờ tơl, mơya 2 nam do, geh rơlao 20 nă cau neh mùl màl ơm ờ lơh broă, git nđờ jơ̆t nă cau ndai kung geh nùs nhơm ndrờm bal sơl.

Ồng Nguyễn Văn Hoan, Phó kwang atbồ Sở Nông nghiệp mờ Phát triển Nông thôn càr Gia Lai pà git, geh lơh broă do neh lơh jăt uă broă lơh nàng gàr cau lơh broă sền gàr brê, mơya mìng geh nùs nhơm pơn dờm pơn điang mờ jal mhar: “Tềng đăp măt, bol añ lam sồr ală kwang bàng, cau lơh broă gơboh mờ broă lơh, tus tàm tiah lơh broă nàng gàr niam broă atbồ, sền gàr brê, mờ ai geh bơta ƀuơn ngan nàng pơdar kwang bàng lơh broă tàm tiah ngài rê lơh broă tàm tiah rềp rơlao nàng tơmù tơngai pal lòt ngài, ai geh bơta niam nàng oh mi geh tus bal mờ ală broă lơh pa, nàng oh mi iang nùs lơh broă”.

Tŭ do, Sở Nông nghiệp mờ Phát triển Nông thôn càr Gia Lai pơn jăt tai pơlam UɃÑZ càr dan mờ Dà lơgar in sền wơl, lơh niam wơl broă dong kờl, tơnguh bơta niam tiah lơh broă gơwèt mờ mpồl sền gàr brê.