Mờr 400 nă kơnòm bơsram neh geh mblàng yal ală jơnau cih bơh adat boh lam dê tàm gah gùng lòt ù gờl gơ wèt mờ rơndeh mô tô- rơndeh măi; ală tơngume kuơmàng bơh Adat gùng lòt ù gờl dê; phan yal tơnggit gùng lòt ù gờl mờ bơsong ală broă gơlik geh tàm gah gùng lòt. Bal mờ hơ̆ là ală tơngume pơlam mờ lam lơh jat ngan ngồn bơta chài, broă lơh măi rơndeh mô tô- rơndeh măi lơngăp lơngai lòt rê.

Bơnah lam lơh ngan ngồn bơta chài măi rơndeh lơngăp lơngai lòt rê gơ hòi gơ jà ală kơnòm bơsram tus bal

Jat Mpồl lơngăp lơngai lòt rê  gùng lòt càr Gia Lai yal, bơh bồ nam tus tŭ do, tàm càr Gia Lai gơlik geh 270 dơ̆ rềs àr gùng lòt, lơh 195 nă cau chơt, 215 nă cau gơtìp sồt să, gơguh uă tàm jơh bal 3 bơta pơndrờm mờ dùl tŭ bal mờ nam lài. Pal kơlôi rơcang là uă ơruh pơnu, kơnòm pa tàu, tàm hơ̆ geh kơnòm bơsram, lơh tìs lơngăp lơngai lòt rê  gùng lòt tàm ală tìs mờng kwèng ngan bè ờ hềt tơl sơnam măi rơndeh, ờ ndau sơ gơn gàr bồ, măi rơndeh sap sèng mờ ờ geh bơta chài măi rơndeh lơngăp lơngai lòt rê lơh gơlik rềs àr.