VOV4.K’ho- Jat broă lơh jơnau kờñ dà lơgar bè tơrmù rƀah kơ̆ kơljap nam 2022 pa ai tơlik, Ủy ƀan Ñân zân càr Gia Lai sồr ală tiah, mpồl lơh broă lam lơh ring bal ală broă lơh nàng tơrmù 2% kờp jơh khà hìu bơnhă rƀah mờ 3% khà hìu bơnhă rƀah jơi bơtiàn kòn cau dùl êt nă cau.

Càr Gia Lai lam lơh uă broă lơh dong kờl hìu bơnhă rƀah

Sở Lao động, Thương ƀiñ mờ Xã hội càr Gia Lai geh ai tơlik jơnau đơs tus gơnoar atbồ, kấp ủy kấp hơ đơm bơt bơtàu ală broă lơh ngan ngồn, dong kờl hìu bơnhă rƀah jơh rƀah. Mờ kung ngui geh cồng nha bơta dong kờl bơh dà lơgar; pơgồp bal mờ ală mặt trận, mpồl bal, cíñ trị, mpồl bơtiàn ală kấp nàng hòi jà ală bơta pràn tă pơgồp bơh mpồl lơh sa kă bro, mpồl bơtiàn nàng bơcri priă ai cau rƀah in bơtàu tơnguh lơh sa. Tàm ală nam do, càr Gia Lai neh bơcri rlau 1 rbô 270 tơmàn đông bơh kes priă, lam lơh uă broă lơh dong kờl ală hìu bơnhă rƀah bơsram broă lơh, tam gơl chi tam, phan ròng, blơi ƀảo hiểm y tế, kham sơm kòp ờ sa priă.

Cau mblàng K’Duẩn