Gơnoar ătbồ mờ làng bol càr Dăk Lăk gơn kơnờm ală gùng dà, broă lơh krơi is do geh gơ gơs là tŭ niam uă, phan ngui dong kờl, dong ƀòn dờng gờñ lơh geh jơnau kờñ gơgơs là tiah tờm tiah drà tiah Tây Nguyên jăt jơnau cih tàm Kơrnoăt sồ 67 bơh Ƀộ Cíñ trị dê.

            Lời uă tŭ jiơ sền gròi jăt sền ală tơngume bơh dơ̆ pơrjum dơ̆ 4, Quôk hội khoă 15 dê, ồng Võ Tấn Tài, Phó Củ tịc duh broă sùm Tơrgùm ală mpồl gĭt gơ̆p lơh bơyô bal càr Dăk Lăk, lài do là Kwang ătbồ Vụ Kòn cau mờ Broă Yàng Mpồl đơng lam Tây Nguyên chờ hờp ngan mờ cồng nha 94,38% kwang bàng Quôk hội ring bal, Kơrnoăt bè lơh tơrlòng lài bàr pe gùng dà broă lơh krơi is bơtàu tơnguh ƀòn dờng Buôn Ma Thuột, càr Dăk Lăk neh ngan ngồn geh ring bal. Ồng Võ Tấn Tài, pà gĭt: Là dùl nă làng bol bơh ƀòn dờng Buôn Ma Thuột dê, bol añ gŏ gơlơh chờ hờp ngan bè bơta sền gròi bơh Đảng mờ Dà lơgar dê gơwèt mờ broă bơ̆t bơtàu ƀòn dờng Buôn Ma Thuột. Bol añ kơlôi là, Buôn Ma Thuột đơs is mờ Dăk Lăk đơs bal tơnơ̆ tŭ geh Quôk hội ring bal gùng dà broă lơh krơi is ngui jơh tŭ jiơ ai tơl bơta mờ ngui niam jơh broă lơh ngan bơh să tờm he dê nàng lam lơh jăt gùng dà broă lơh krơi is do mờ uă broă dong kờl ngan ngồn ai tơl bơta ai tơl ngàñ tơl gah in tơrgùm gơs bơta pràn tơrgùm bal bơ̆t bơtàu ƀòn dờng Buôn Ma Thuột ngan ngồn là tiah tờm.

            Jăt ồng Thái Hồng Hà, Kwang ătbồ Sở Văn hoá, Thể thao mờ Zu lịc càr Dăk Lăk đơs, Kơrnoăt geh ring bal neh pơn jăt bal ală jơnau ai lơh tơrlòng lài bàr pe gùng dà broă lơh krơi is gơwèt mờ ƀòn dờng Buôn Ma Thuột, càr Dăk Lăk bè ătbồ priă jền, kes priă dà lơgar; jàu kâp ătbồ dà lơgar tàm broă rơndăp ù tiah; ai lài dong kờl gơhòi gơ jà bơcri priă; ai lài dong kờl gơwèt mờ cau mờng chài tàm broă lơh, cau jak chài mờ cau geh bơta jak krơi is. Den tàng bè hơ̆, ồng Thái Hồng Hà gơn kơnờm: Quôk hội neh ngan ngồn ring bal gùng dà broă lơh krơi is, 5 gùng dà broă lơh den là chờ hờp ngan. Hơ̆ kung là tềl sơñio, là cơng tàng là bơta dong kờl bơtàu tơnguh mờ bơh hơ̆ lơh ngan bơ̆t bơtàu lơh bè lơi jăt jơnau đơs pơndŭt sồ 67 bơh Ƀộ Cíñ trị dê mờ Kơrnoăt 103 rơhời bơ̆t bơtàu ƀòn dờng Buôn Ma Thuột gơ gơs là tiah tờm kơnhoàl ù tiah do jăt kơrnoăt sồ 23 pa do.

            Mờ tàm dơ̆ pơrjum ờs mờng nhai 10 pa do tơn bơh Ủy ƀan Ñân zân càr Dăk Lăk dê, ồng Phạm Ngọc Nghị, Củ tịc Ủy ƀan Ñân zân càr Dăk Lăk neh sồr ală sở, ngàñ, ală tiah kơlôi sơnơng tơn ală gùng dà broă lơh krơi is pa geh Quôk hội ring bal nàng gờñ lơh jăt gơnoar broă, kơnòl broă ătbồ dà lơgar mờ gơnoar ătbồ tiah drà, drơng broă làng bol in niam rlau. Ồng Phạm Ngọc Nghị đơs sùm: Bơdìh mờ ală tơngume tàm jơnau yal den añ sồr ală oh mi pal sền gròi ngan tus gùng dà broă lơh krơi is ai Buôn Ma Thuột in, neh geh ring bal rao den bol he pal kơlôi sơnơng mờ ai tơmŭt tơn tàm broă lơh nam 2023 ai gùng dà broă lơh Buôn Ma Thuột in mờ uă Kơrnoăt bơh Cíñ phủ bơh Dà lơgar dê là Ủy ƀan pal rơcăng lài ai tơmŭt nàng tă pơgồp jơnau đơs ai mpồl lơh jăt in.