VOV4.K’ho - Broă lơh “Hìu ram kông đoàn” geh Liên đoàn Lao động càr Dăk Lăk lam lơh ală nam do neh dong kờl git nđờ rơhiang đoàn viên, cau lơh broă geh rài kis gơtìp kal ke “geh hìu ơm iang nùs tàm broă lơh sa”. Mìng is nam 2021, bơh kes priă “Hìu ram Kông đoàn” ală kấp kông đoàn tàm càr neh di tŭ dong kờl lơh pa, lơh niam wơl 120 nơm hìu ai đoàn viên geh rài kis gơtìp kal ke bè hìu ơm mờ kờp jơh khà priă dong kờl rơlao 4 tơmàn 500 tơlăk đong.

                                   Jào hìu rqam Kông đoàn ai cau lơh broă gơtìp kal ke in

Bơklao chơ̆t, lŏ Nguyễn Thị Loan, kis tàm xã Ea Rốk, kơnhoàl Ea Súp, càr Dăk Lăk gơs cau tờm lơh broă sa drơng gàr ai kòn dềt bal mờ pume neh dờng sơnam in. Rài kis hìu nhă gơtìp kal ke den tàng nùs nhơm kờñ geh bè dùl nơm hìu lơh kơl jăp gơwèt mờ lŏ Loan ờ tŭ lơi geh. Lŏ Loan yal: Kal ke tài dồs neh càn priă sơm kòp bơklao in lài do, lơh ngan drơng nàng geh piang sào ào soh ală cau tàm hìu nhă bal mờ broă bơsram sră oh kòn in neh lơh lŏ sơlơ gơtìp uă ngan kal ke. Kis tàm hìu sèt, mè mờ kòn, mò mờ sao ờ sŭk ngan pah dơ̆ kàl mìu càl dờng tus. “Moăt tài chơ̆t bơklao, mờ kal ke bè broă lơh sa, mơya bơtoah ngan geh aal8 oh mi tàm Liên đoàn Lao động kơnhoàl gŏ rài kis kal ke añ dê neh dong kờl mè mờ kòn añ bơh tŭ hìu nhă gơtìp rềs àr. Mờ kwơ màng ngan là ală oh mi neh dong kờl mè mờ kòn añ lơh geh hìu nùs nhơm nàng ơm”.

                           Jào priă dong kờl lơh hìu ai đoàn viên kông đoàn gơtìp kal ke in

Nam 2021, lŏ H’ Ni Wong Bkrông, đoàn viên Kông đoàn xã Cư̆ Huê, kơnhoàl Ea Kar chờ hờp rê ơm tàm hìu pa geh Liên đoàn Lao động càr dong kờl priă lơh. Hìu pa geh lơh dờng 70 thơ̆k vuông, geh mờr 180 tơlăk đong. Tàm hơ̆, Liên đoàn Lao động càr dong kờl 50 tơlăk đong, Mpồl đơng lam ling klàng kơnhoàl Ea Kar dong kờl 10 tơlăk đong, khà priă gam tai geh hìu nhă tềm pềr mờ càn ală cau pròc mhàm. Lŏ H’ Ni Wong yal: Rơlao 10 nam do, rài kis hìu nhă gơtìp kal keden tàng ùr bơklao ơm kis bal mờ mè bèp bal mờ ală oh. Tŭ do neh geh hìu pa, dong kờl hìu nhă geh anih nàng ơm nàng lơh ngan tàm broă lơh sa, sơrlèt kal ke mờ brồ guh tàm rài kis. “Tài priă geh ờ ring niam, ờ lơh geh hìu den tàng ơm bal 10 nam do. Tŭ do, neh geh hìu añ ưn ngài broă sền gròi bơh ală kấp ủy đảng, gơnoar atbồ, kơnhoàl kung bè càr neh sền gròi ai tơl bơta niam ai ùr bơklao añ in, nàng ring niam rài kis, nàng bol añ iang nùs lơh broă”.

Jăt khà kờp bơh Liên đoàn Lao động càr Dăk Lăk, tàm nam 2021, bơh kes priă “Hìu ram Kông đoàn” ală kấp Kông đoàn tàm càr neh di tŭ dong kờl lơh pa, lơh niam wơl 120 nơm hìu ai đoàn viên geh rài kis gơtìp kal ke bè hìu ơm mờ kờp jơh khà priă dong kờl rơlao 4 tơmàn 500 tơlăk đong.

Ồng Nguyễn Công Bảo, Củ tịc Liên đoàn Lao động càr Dăk Lăk pà git: broă lơh “Hìu ram Kông đoàn” ală nam do neh dờp geh broă ring bal, kờñ bal bơh ală kấp ủy đảng, gơnoar atbồ, gah mpồl lơh broă tàm càr do, ală mpồl lơh broă, mpồl lơh sa kă bro tàm càr mờ càr ndai. Broă lơh do neh dong kờl ai đoàn viên, cau lơh broă gơtìp kal ke bè hìu ơm, broă lơh sa, geh đềt mềr rơlao mờ mpồl kông đoàn, pơgồp bal tàm broă gàr niam rài kis lơh sa mpồl bơtiàn tàm càr dê. “Tàm nam pa do, hìu ram kông đoàn geh ală mpồl lơh broă ndrờm lơh jăt niam broă lam sồr cau lơh broă tam pà bal, tă pơgồp bal tàm kes priă do. Jăt mờ kơrnoăt bơh bol añ dê, tàm 1 nă đoàn viên 1 nhai tă 5 rơbô đong. Mờ tơnơ̆ mờ hơ̆ bol añ geh jào kông đoàn kấp dờng rơlao mờ kâp hờ đơm 90% nàng rơcang tàm broă lơh jăt rơndăp broă geh ai. Gam 10% bol añ lời wơl nàng tam pà ai ală mpồl lơh broă gơtìp kal ke rơlao in. bơdìh hơ̆ tai, Liên đoàn Lao động càr gam hòi jà ală mpồl lơh broă ndai”.

Ală hìu ram kông đoàn geh jào neh ai geh nùs nhơm chờ hờp tàm đoàn viên kông đoàn, bơh tŭ hơ̆, ală cau do pin dờn mờ bơ̆t bơtàu hìu nhă hờm ram mờ gơboh gơbài.

Cau cih Tuấn Anh-Cau mblàng Ndong Brawl