VOV4.K’ho- Poh lài, tàm pơrjum dơ̆ 4, Hội đồng Ñân zân càr Dăk Lăk khóa 10, ală kwang bàng neh tơrgùm cribơyai uă tơngume kuơmàng gơ rềng tus ală broă lơh lam lơh jat ală khà geh jàu, kơnòl broă bơtàu tơnguh lơh sa- mpồl bơtiàn, sền gàr dà lơgar- sền gàr lơngăp lơngai 6 nhai lồi nam, ală broă gơ rềng tus rài kis bơh làng bol dê.

Yal tàm pơrjum, 6 nhai bồ nam, bulah kung gam kong gơ rềng bơh kòp Kovid-19, mơya broă lơh sa càr Dăk Lăk dê geh ală tềl tơnggŏ niam tŭ kờp jơh phan lơh gơs kờp dŭ gơguh 7,37%, tă dia geh 4 rbô 860 tơmàn đông, gơguh mờr 40% pơndrờm mờ bal dùl tŭ nam lài, priă geh bơh tac phan hờ lơgar ndai geh 845 tơlak domar Mỹ, gơguh rlau 61%. Ală broă lơh nhơl chờ, kă bro, lơh sa geh uă tam gơl niam. Bulah bè hơ̆, tă priă bơcri dà lơgar gam lơyah, mìng geh rlau 20%, ai geh broă lơh ờ hềt lơh geh jat broă rơndap lơh ai tơlik, khà cit sơnơm vaccine kơryan kòp Kovid-19 ding dơ̆ 3, dơ̆ 4 tàm gùt làng bol lơyah, ală broă lơh jơnau kờñ dà lơgar lam lơh gam lơyài...

Gùt anih pơrjum

Bơh cribơyai, ală kwang bàng neh ring bal mờ jơnau yal cồng nha lam lơh kơnòl broă 6 nhai bồ nam, mờ kung ai tơlik 2, 3 jơnau đơs tă pơgồp nàng kờñ lam lơh jat geh cồng nha kơnòl broă 6 nhai lồi nam bè: sơlơ tơnguh lơh niam sră nggal lơh broă mờ gơ hòi gơ jà bơcri priă; sền gròi bơcri priă, bơtàu tơnguh rơndap tap sèng phan bơna gùng lòt ring bal mờ tam gơl pa... Bè gah lơh sa suơn sre, gơ rềng tus broă sầu riêng Việt Nam ngan ngồn geh tac uă jat sră pơrgon tus lơgar Lo bơh ngai 11/7/2022, kwang bàng Trần Hồng Tiến, Ƀí thư Huyện ủy Krông Pắc đơs là, do ờ mìng là tŭ niam mờ gam là bơta lòng ai tơlik gơ wèt tus mờ gah lơh sa suơn sre càr dê tàm tơngai tus: “Bol hi kơp kờñ ngan Ủy ƀan Ñân zân càr mờ ală gah broă lơh, kuơmàng là gah lơh sa suơn sre geh ală broă lơh, ală jơnau rơcang lài dong làng bol lơh broă sa in. Cau tĕ khà tàm càr sền gròi ngan tài tŭ do bol he geh mờr 12 rbô lồ sầu riêng neh tơnhàu, bal mờ cồng nha tơnhàu geh rlau 125 rbô tấn plai den geh pal tac jơh, dilah bol he lơh ờ niam den kal ke ngan”.

Ồng Y Vinh Tơr, Ủy viên rơcang lài Đảng dà lơgar, Phó Củ ñiệm Ủy ƀan Zân tộk, Kwang atbồ Mpồl kwang bàng Quôk hội càr Dăk Lăk đơs mut pơrjum

Sền gròi tus broă bơtàu tơnguh tiah làng bol jơi bơtiàn kòn cau dùl êt nă cau, ồng Y Ca Êñuôl, phó kwang atbồ Ƀan Zân tộk Hội đồng Ñân zân càr Dăk Lăk kơlôi rơcang tŭ jat tơl khà rƀah pa den khà hìu bơnhă rƀah bơh càr dê gơguh uă ngan. Tàm hơ̆, tiah jơi bơtiàn kòn cau dùl êt nă cau gơguh tus 65,3%. Ồng Y Ca Êñuôl sồr, pal geh broă lơh sền gròi rlau tai tus ală cau do: “Sồr Ủy ƀan Ñân zân càr sền gròi đơng lam mờ geh broă lơh jơh nùs rlau tai bè broă lơh tơrmù rƀah. Lam lơh tơrmù rƀah geh cồng nha, lam lơh lài ală broă dong kờl gơ wèt tus mờ tiah sar lơgar ngài nàng kờñ tơrmù rƀah mhar mờ kơ̆ kơljap. Tơrmù khà hìu bơnhă rƀah tàm tiah jơi bơtiàn kòn cau dùl êt nă cau, ngan là hìu bơnhă rƀah tàm tiah jơi bơtiàn kòn cau dùl êt nă cau ơm kis bơh jŏ tàm càr, lam lơh ring bal mờ ală broă lơh ndai”.

Cribơyai bè gah lơh sơnơm, ồng Nguyễn Ngọc Hùng, Phó kwang atbồ Ƀan niam chài mpồl bơtiàn Hội đồng Ñân zân càr Dăk Lăk kơlôi rơcang bè bơta ƀák sĩ lơh broă tàm hìu sơnơm dà lơgar dan ơm rlô ờ lơh broă tai mờ broă cok khà priă blơi sơnơm, phan ngui lơh sơnơm lơyài, lơh gơ rềng tus broă sền gàr pràn kơldang să jan làng bol. Den tàng, ồng sồr pal sền gròi tus broă bơsong 2 tơngume do: “Dilah bơta do ờ geh ală broă lơh nàng ngui niam den añ rơngòt là tàm tơngai tus, ală hìu sơnơm dà lơgar, ngan là kâp càr geh gơtìp ờ tơl cau lơh broă. Den tàng bol he pal geh ală broă lơh bè lơi nàng ală ƀák sĩ iang nùs lơh broă nàng bơh hơ̆ den hơ̆ sồng bol he gơtùi gàr niam ală broă lơh”.

Tàm 6 nhai lồi nam, Ủy ƀan Ñân zân càr Dăk Lăk ờ mìng pơn jat tai tơrgùm rơcang sơndră kòp Kovid-19, mờ gam bơtàu tơnguh wơl, bơtàu tơnguh lơh sa- mpồl bơtiàn. Nàng lơh gơs ală khà geh jàu bơtàu tơnguh nam 2022, ồng Trần Phú Hùng, Phó Củ tịc Hội đồng Nân zân càr Dăk Lăk sồr Ủy ƀan Ñân zân càr tơrgùm tă bơsong ală bơta kòl yan bè broă tă priă bơcri dà lơgar: “Sồr Ủy ƀan Ñân zân tàm tŭ ring bal ală rơndap broă, ală anih lơh broă ai tơlik jơnau đơs pal kờp sền nền nòn, pleh bơta tŭ Hội đồng lơh nền gùng dà bơcri priă den bulah tŭ geh nghị quyết ai tơlik mơya gơtìp kòl yan pal tam gơl rơndap broă, hơ̆ là broă lơh ai ù lam lơh rơndap broă lơyài. Den tàng roh tŭ tơngai uă, sồr Ủy ƀan pal bơsong broă do”.

Bal mờ broă sền sơ wì bơta geh ngan, cồng nha lam lơh cồng nha lam lơh jat broă rơndap lơh bơtàu tơnguh lơh sa- mpồl bơtiàn, sền gàr lơngăp lơngai, sền gàr dà lơgar 6 nhai bồ nam mờ ală kơnòl broă, broă lơh tờm 6 nhai lồi nam. Tàm pơrjum dơ̆ do, Hội đồng Ñân zân càr Dăk Lăk geh cribơyai, ring bal uă nghị quyết kuơmàng bè: Nghị quyết cih bè tam pà kờp dŭ ai priă dia gơguh uă gơ wèt tus mờ broă lơh bơt bơtàu tàm càr; Nghị quyết cih bè khà priă ai ală bơta priă tă lơh broă, Nghị quyết bè broă tam gơl gùng dà bơcri priă ală rơndap broă lơh dong kờl bơtàu tơnguh tiah nhàr dà lơgar- Rơndap broă lơh dềt càr Dăk Lăk; Nghị quyết cih bè kơrnuat pal jat, tơl khà, ai tơlik khà tam pà kes priă dà lơgar lam lơh Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm, tơngai bơh nam 2021 tus nam 2030.

Cau mblàng K’Duẩn