VOV4.K’ho- Ngai 19/08, Hội đồng Ñân zân càr Dăk Lăk khoă X, tơngai lơh broă bơh nam 2021- 2026 bơyai lơh dơ̆ pơrjum tơngume dơ̆ 5 nàng sền swì, mờ lơh nền uă gùng dà broă lơh dờng. Tàm dơ̆ pơrjum, ală kwang bàng neh sền swì mờ ring bal 12 kơrnoăt kwơmàng, tàm hơ̆ geh 7 kơrnoăt geh gơrềng tus 3 broă lơh jơnau kờñ dà lơgar bè bơtàu tơnguh lơh sa- mpồl bơtiàn tiah làng bol kòn cau mờ tiah kơh bơnơm, broă lơh tơn jơ̆ rƀah kơ̆ kơl jăp, bơ̆t bơtàu ƀòn lơgar pa tơngai bơh nam 2021- 2025.

Mùl màl, kơrnoăt bè bơtàu tơnguh lơh sa- mpồl bơtiàn tiah làng bol kòn cau mờ tiah kơh bơnơm nam 2022, càr geh tơrmù 3,5% khà hìu rƀah. Kờp jơh priă lơh jơnau kờñ do là rlau 443 tơmàn đong. Kơrnoăt lơh jăt Broă lơh jơnau kờñ dà lơgar bơ̆t bơtàu ƀòn lơgar pa, tus nam 2025, Dăk Lăk lơh ngan geh 4 mpồl kâp kơnhoàl, 100 xã lơh geh tơl broă jàu bơ̆t bơtàu ƀòn lơgar pa. Nàng lơh geh jơnau kờñ pa yal, Hội đồng Ñân zân càr Dăk Lăk ring bal broă rơndăp lơh priă bơcri bơtàu tơnguh ai bơh kes priă Dà lơgar tơngai 5 nam bơh nam 2021- 2025 là 1 rbô 557 tơmàn đong, tàm hơ̆ priă ai bơh kes priă Dà lơgar dê là 657 tơmàn đong, priă càr dê là 900 tơmàn đong.

Cau mblàng Lơ Mu K’Yến