VOV4.K’ho- Kòp Kovid-19 tàm jơh ală càr, ƀòn dờng tàm jơh gùt lơgar, neh geh uă cau pơgru mờ kơnòm bơsram bơtờp kòp. Nàng gàr niam ờdo ờdă, gơdờp bal tàm bơta bè ờs pa, gơ jăt tàm bơta geh ngan ngồn, ală tiah geh uă broă bơto mờ bơsram lơh wơl ngăc ngar nàng kơnòm bơsram in geh lòt bơsram tàm hìu bơsram.           

Gĭt nền kòp Kovid-19 gam gơbàn kal ke, mơya hìu bơsram ờ gơtùi til mpồng jơh den tàng ală càr, ƀòn dờng ndrờm sồr ală hìu bơsram geh gùng dà broă lơh bơto bơsram tơn pơgồp bal mờ bơto bơsram bơh tàm internet nàng di tŭ tam gơl broă lơh bơto bơsram jăt bơta gơbàn bơh kòp bơtờp dê tàm tiah he dê. Gùng dà broă lơh mờ ală tiah lam lơh tŭ do hơ̆ là ai kơnòm bơsram tàm ală xã, sơnah ƀòn, thị trấn ờdo ờdă in halà geh pơhìn kòp bơtờp dùl êt geh lòt bơsram tơn tàm hìu bơsram.

Ồng Nguyễn Thế Bình, Kwang ătbồ Sở Giáo zụk mờ Đào tạo càr Hà Tĩnh pà gĭt, jăt tàm nùs nhơm bơyai lơh bơto bơsram ngac ngar jăt bơta gơbàn bơh kòp bơtờp dê, Ủy ƀan Ñân zân càr Hà Tĩnh neh lơh nền ai kơnòm bơsram ală tiah ờdo ờdă in lòt bơsram wơl bơh lồi nhai 11 nam lài tơnơ̆ 4 poh ai kơnòm bơsram in ơm ing lòt bơsram tàm hìu bơsram nàng rơcăng sơndră kòp. Ồng Nguyễn Thế Bình đơs: Gơwèt mờ ƀòn lơgar mờ geh bơta kòp bơtờp kâp dùl, kâp 2, ală hìu bơsram lam bơsram tơn bè ờs mờ lơh jăt niam ală broă lơh nàng rơcăng sơndră kòp. Gơwèt mờ ƀòn lơgar geh kòp bơtờp kâp 3, kâp 4 den ală tiah do ơm ing ờ ai kơnòm bơsram in lòt bơsram tàm hìu bơsram mờ lam lơh broă lơh bơto mờ bơsram ndai, gơtùi lơh jăt broă bơsram bơh tàm  internet, kung gơtùi lơh jăt broă jàu jơnau lơh jơnau bơsram, halà jàu sră bơsram sră, jàu rơndăp broă lơh bơsram sră ai ală kơnòm bơsram in, halà bơsram wơl, lơh wơl bơsram wơl bơh broă jàu jơnau lơh jơnau bơsram rê tàm hìu ai ală oh in. Tus tơngai do, den jơh gùt càr neh geh 430 hìu bơsram tàm kờp jơh 633 hìu bơsram ai kơnòm bơsram in lòt bơsram wơl tàm hìu bơsram, geh 68%.

Tŭ geh kòp, ală tiah ndrờm ờ kră kơldang ir til mpồng hìu bơsram tàm làm gùt càr, ƀòn dờng mờ ala tàm hơ̆ mìng cang tiah dềt tơl ơdŭ bơsram, tơl nă kơnòm bơsram, cau pơgru geh gơrềng; bơyai lơh xét nghiệm kòp Kovid-19 mờ tam gơl tus bơto bơsram tơn bơh tàm internet, halà ơm ing lòt bơsram tàm hìu bơsram tàm tơngai ờ jŏ nàng kờp sền, jòi cau ơm rềp, tơnơ̆ hơ̆ sơrbac mhar ai kơnòm bơsram lòt bơsram tàm hìu bơsram. Bè tàm càr Hoà Bình, tơnơ̆ tŭ geh kòp Kovid-19, Ủy ƀan Ñân zân càr lơh nền ai kơnòm bơsram, cau bơsram dờng mờ cau bơsram tàm ală hìu bơsram tàm jơh gùt càr in ơm ing broă lòt bơsram tơn tàm hìu bơsram tàm 02 ngai nàng lơh jăt broă lơh kờp sền, sac rwah mờ cĭt vaccine kòp Kovid-19. Tơnơ̆ hơ̆ tơn, ală hìu bơsram neh rơcăng lài lam lơh jăt gùng dà broă lơh bơto bơsram ngac ngar tus tơl ơdŭ bơsram, lơh ngan nàng kơnòm bơsram in geh lòt bơsram tàm hìu bơsram, gàr niam wil tơl ală broă lơh rơcăng sơndră kòp. Mò Bùi Thị Kim Tuyến, Kwang ătbồ Sở Giáo zụk mờ Đào tạo càr Hoà Bình yal: Tàm ù tiah jơh gùt càr dê den kung gam geh sơl hìu bơsram bơyai lơh ai ală oh in lòt bơsram tàm hìu bơsram bè ờs, mơya kung geh hìu bơsram bơyai lơh bơsram pờ tơn tàm internet mờ geh tŭ là tàm hìu bơsram geh ơdŭ dilah mờ geh cau F0 den ơdŭ hơ̆ bơsram bơh tàm internet, ai ală ơdŭ ndai den bơsram bè ờs tàm hìu bơsram. Ngan ngồn là kung pal tơnơ̆ tŭ kham sac rwah ală cau F1 geh gơrềng ndai ndrờm là ờ bơtờp kòp, den hơ̆ sồng gàr niam ờdo ờdă ai ală kơnòm bơsram bal mờ pơgru in.

Ồng Nguyễn Việt Hà, Phó Kwang ătbồ Phòng Cíñ trị Bồ tơngoh, Sở Giáo zụk mờ Đào tạo càr Vĩnh Phúc kung pà gĭt, bàr pe hìu bơsram tàm ală kơnhoàl: Sông Lo, Vĩnh Tường, Yên Lạc, ƀòn dờng Phúc Yên mờ Vĩnh Yên gam bơyai lơh bơto mờ bơsram bơh tàm internet nàng rơcăng sơndră kòp. Nàng gàr niam tơngume jơnau bơsram tàm nam bơsram, ală hìu bơsram ndrờm bơyai lơh bơto bơsram jăt broă lơh tam gơl dipal mờ bơta geh ngan bơsram bơh tàm internet. Ồng Nguyễn Việt Hà, đơs: Gơwèt mờ ală jơnau tŭ tam gơl tus jơnau bơsram bơh tàm internet den kung là jăt broă lơh là jal mhar lơm, ing lơm gơdờp bal mhar lơm gơ dê. Tơnơ̆ mờ tŭ kòp geh gròi sền ală tiah lơh bơtờp kòp den tơnơ̆ hơ̆ tơn ală hìu bơsram tam gơl tus jơnau bơsram tơn tàm hìu bơsram. Nàng gàr niam cồng nha lam lơh jăt broă lơh bơsram bơh tàm internet, ală hìu bơsram neh sac rwah ală modul jơnau gĭt wă dipal tàm ală ƀộ môn nàng gàr niam geh tơngume broă lơh broă rơndăp lơh jăt broă lơh neh ai tơlik.

 Ƀộ Giáo zụk mờ Đào tạo đơs, broă bơyai lơh bơto mờ bơsram tàm ală tiah tŭ do ndrờm ngac ngar ngan bal mờ broă lơh ngan tơrmù uă ngan bơta gơrềng ờ niam bơh kòp bơtờp dê tus broă lơh hìu bơsram. Broă bơyai lơh pơgồp bal ală broă lơh bơto bơsram bơh ală tiah dê dong gàr niam ờdo ờdă ai cau bơto mờ bơsram in mơkung gàr niam lơh sir gơs broă lơh mơkung gam gàr geh sơl cồng nha. Do kung là jơnau kờñ mờ Ƀộ Giáo zụk mờ Đào tạo dê neh ai tơlik tơn bơh bồ nam bơsram tơn, Ƀộ neh bơto pơlam mờ ală tiah gam lam lơh jăt ngac ngar tus tơl hìu bơsram, nàng lơh sir gơs broă rơndăp lơh nam bơsram.

Cau cih VOV4- Cau mblàng Lơ Mu K’Yến