VOV4.K’ho- Di tơngkah kir sơnrai 75 nam Ngai Cau ling sồt să, cau ling chơ̆t màng, ngai 10/07, Tỉñ ủy, Hội đồng Ñân zân, Ủy ƀan Ñân zân, Ủy ƀan Mặt trận dà lơgar Việt Nam càr Hà Giang yŭ rơyùm ki ngàm ngan bơyai lơh dơ̆ ies mờ tơ̆p 10 ƀồc ntìng cau ling chơ̆t màng neh khin cha jak chài chơ̆t phi să tàm dơ̆ tam lơh sền gàr Dà lơgar tàm ƀlàng tơ̆p ƀồc cau ling chơ̆t màng Vị Xuyên.

Tus bal dơ̆ bơyai lơh do geh Củ tịc lơgar lài do ồng Trương Tấn Sang, Phó Thủ tướng Cíñ phủ ồng Vũ Đức Đam. Tàm nùs nhơm ki ngàm, kah ưn ngài, ală kwang bàng chu ñàng, kun bồ kah kơlôi tus dà kơlhề dờng ngan bơh ală cau ling chơ̆t màng dê neh khin cha jak chài chơ̆t phi să tàm dơ̆ tam lơh mờ sền gàr Dà lơgar. Do là ală cau ling neh lòt bal mờ ling klàng bal mờ làng bol ală jơi bơtiàn kòn cau càr Hà Giang kơ̆ nùs sền gàr ù tiah dà lơgar, khin cha jak chài tam lơh mờ phi să, jơh nùs lơh ngan sền gàr tơl pèt ù ndu gơnrơh dờng màng ngan bơh Dà lơgar dê tàm dơ̆ tam lơh sền gàr tiah nhàr lơgar đah tô dà lơgar.

Tàm dơ̆ bơyai lơh, gal ngan làng bol mờ ală cau ling yau neh geh tŭ lòt tam lơh tàm tiah tam lơh Vị Xuyên tơngŏ nùs nhơm ngoh rơngăc ngan tŭ sền gŏ ală cau ling, cau lòt ling bal bơh he dê geh jòi bàn mờ rê tơ̆p tàm Ƀlàng tơ̆p ƀồc cau ling chơ̆t màng Dà lơgar Vị Xuyên.

Cau mblàng Lơ Mu K’Yến