Ală kwang bàng neh cribơyai tàm mpồl bè Jơnau rơcang cih Nghị quyết lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk. Ală jơnau đơs ring bal pal geh Nghị quyết bè lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột, tài do là ƀòn dờng ơm tàm tiah tờm Tây Nguyên dê, tàm tơrbŏ bal mờ ală tiah tờm bơtàu tơnguh bơh tiah đah jum tàm gùl lơgar, tiah đah jum mat tơngai lik dà lơgar mờ 3 mum bơtàu tơnguh bơh Lào- Việt Nam- Campuchia dê; geh bơta gơ rề bè lơh sa, niam chài mờ geh kuơ dờng màng ngan bè lơh sa, mpồl bơtiàn, sền gàr dà lơgar, sền gàr lơngăp lơngai tiah Tây Nguyên mờ gùt lơgar dê. Ồng Trần Văn Tiến, mpồl kwang bàng Quôk hội càr Vĩnh phúc đơs loh: “Broă ai tơlik Nghị quyết bơh Quôk hội dê bè lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột là pal geh, nàng kờñ tơnguh mhar broă bơt bơtàu Buôn Ma Thuột là tiah drà tờm bơh Tây Nguyên dê mờ là bơta pràn bơtàu tơnguh lơh sa- mpồl bơtiàn bơh tiah Tây Nguyên dê, do là tiah geh ù tiah kuơmàng ngan, tàm broă sền gàr dà lơgar, sền gàr lơngăp lơngai bơh dà lơgar dê mờ là tiah geh uă làng bol jơi bơtiàn kòn cau dùl êt nă cau ơm kis, mơya broă lơh sa mpồl bơtiàn lơyài bơtàu tơnguh den tàng pal geh dùl gùng dà krơi is nàng chồl pràn lơh sa mpồl bơtiàn bơh tiah do dê bơtàu tơnguh”.

Ồng Lê Ngọc Hải, mpồl kwang bàng càr Dăk Lăk đơs nền, tŭ do, Buôn Ma Thuột kung gam ờ tơl mờ ờ pràn uă bơta, ngan là phan bơna, den tàng jơnau rơcang cih Nghị quyết pal lơh gơlik broă lơh krơi is, tam gơl pa nàng gơ hòi gơ jà bơcri priă ai tiah do in: “Broă lam lơh lài ngan ai ală mpồl lơh sa kă bro in, tài bơh tàm tơrbŏ bal gùng lòt là kal ke, den tàng broă ală mpồl lơh sa kă bro lơh broă tàm ală càr Tây Nguyên kung bè ƀòn dờng Buôn Ma Thuột là ờ huan uă, den tàng jat añ pal geh dia dong kờl ai ală mpồl lơh sa kă bro in nàng gơ hòi gơ jà ală mpồl lơh sa kă bro rê mờ làng bol ală jơi bơtiàn kòn cau bơh Tây Nguyên dê nàng bơtàu tơnguh lơh sa mpồl bơtiàn gơ in niam. Kung bè pal atbồ rơndap ù tiah mờ dong kờl ală cau jak chài, cau kơlôi sơnơng nàng geh pràn jak krơi is nàng gơ hòi gơ jà bơt bơtàu ƀòn dờng Buôn Ma Thuột gơ in niam”.

Củ ñiệm Ủy ƀan Priă jền, Kes priă bơh Quôk hội dê ồng Nguyễn Phú Cường yal jơnau yal sền sơ wì jơnau rơcang cih Nghị quyết bè lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk

Ală jơnau đơs, đơs là, ală tơngume gơ rềng tus ală broă lơh krơi is bè priă jền, nam priă jền, bơcri priă pal geh sền sơ wì nền nòn, tài geh 2, 3 tơngume ờ hềt dipal mờ broă lơh bal. Bè dong kờl dia, tŭ do gam dong kờl dia jơh bal mờ mpồl lơh sa kă bro mờ cau dùl nă să gơ wèt mờ tiah kal ke, tiah uă kal ke,mơya tŭ ngui broă lơh dong kờl tàm jơnau rơcang cih Nghị quyết do den sền sơ wì tàm dơlam is càr Dăk Lăk den dong kờl ai tiah bơtàu tơnguh ngan rlau jơh in, ală tiah ndai ờ geh dong kờl. Bè hơ̆ den tàng pal geh bơta sền sơ wì nàng gàr bơta ring niam, ndrờm bal tàm broă lam lơh jat adat boh lam bơh Quôk hội ai tơlik. Đơs nền pal lơh gơlik bơta gơ hòi gơ jà gơ wèt mờ cau lơh broă geh bơta niam uă ai Buôn Ma Thuột in, ồng Đỗ Tiến Sỹ, mpồl kwang bàng Quôk hội càr Hưng Yên đơs là: “Nghị quyết lam lơh tàm 5 nam jat añ den digơlan lơh pơgap bơh 7 tus 10 nam, tài do là ù tiah geh bơta kuơ dờng màng ngan bè jơnau pơn dut sồ 67 bơh Ƀộ Cíñ trị dê. Dùl bơta tai là dong kờla lă cau jak chài, cau kơlôi sơnơng geh pràn jak krơi is lơh broă tàm ală anih lơh broă mờng chài, tàm tơngai lam lơh jat Nghị quyết do geh ờ sa priă dia priă lơh geh tàm tơngai 5 nam. Jat añ nàng lơh gơlik bơta gơ hòi gơ jà den lời pơgap 10 nam nàng lơh gơlik bơta gơ hòi gơ jà”.

Đơs nền, mờ 4 mpồl broă lơh geh ai tơlik tàm jơnau rơcang cih Nghị quyết bè gùng dà krơi is ai ƀòn dờng Buôn Ma Thuột in, ồng Nguyễn Tuấn Anh, mpồl kwang bàng càr Long An đơs là, dilah Nghị quyết do geh Quôk hội ring bal, den do geh là dơ̆ sơn rờp Quôk hội lơh nền gùng dà, broă lơh krơi is ai dùl ƀòn dờng là mpồl háñ cíñ kâp kơnhoàl in, bè hơ̆ den tàng ồng kơp kờñ ală jơnau sồr, jơnau dan bơh kwang bàng Quôk hội dê kung bè cau tĕ khà dê geh kơlôi sơnơng, sền sơ wì, bơ tơl nàng gơtùi bơt bơtàu gơs dùl broă lơh lài nàng gơtùi bơtàu tơnguh ai ală tiah ndai in. Bơdìh mờ 4 mpồl gùng dà, broă lơh neh geh đơs tàm jơnau rơcang cih Nghị quyết, ồng Nguyễn Tuấn Anh sồr mpồl cih Nghị quyết pal sền sơ wì tai 2, 3 jơnau dan bơh cau tĕ khà ƀòn dờng dê. Mùl màl, jàu Hội đồng Ñân zân ƀòn dờng geh gơnoar lơh nền ai kes priă ƀòn dờng nàng tă dơ̆ ngui priă lơh geh kờp bal gơguh uă ai kwang bàng, công chức, viên chức gơwèt tiah atbồ dà lơgar, mpồl cíñ trị mpồl bơtiàn mờ mpồl lơh broă dà lơgar bơh ƀòn dờng atbồ jat cồng nha lơh broă bơdìh mờ geh tă tơm priă lơh geh gơguh uă jat jơnau cih bơh adat boh lam gam ngui tŭ do dê bè gùng dà lơh tờm is priă jền gơwèt mờ anih lơh broă hàñ cíñ, mpồl lơh broă dà lơgar. Gùng dà do kung ndrờm bè Quôk hội neh ai gơnoar lam lơh jat tàm Nghị quyết sồ 54 nam 2014 bè lơh tơrlòng lài gùng dà, broă lơh krơi is bơtàu tơnguh ƀòn dờng Hồ Chí Minh.

Ồng Lê Tấn Tới, mpồl kwang bàng càr Long An, Củ ñiệm Ủy ƀan sền gàr dà lơgar, sền gàr lơngăp lơngai

Ring bal mờ 4 mpồl broă lơh krơi is ai Buôn Ma Thuột in, ồng Lê Tấn Tới, mpồl kwang bàng càr Long An, Củ ñiệm Ủy ƀan sền gàr dà lơgar sền gàr lơngăp lơngai kung sồr bơ tơl tai broă lơh nàng tơnguh priă jền bè sền gàr dà lơgar, sền gàr lơngăp lơngai ai ƀòn dờng in, tài Buôn Ma Thuột ơm tàm tiah Tây Nguyên, tàm tŭ Tây Nguyên geh ù tiah kuơmàng ngan bè sền gàr dà lơgar, ờ mìng tàm tiah đah mat tơngai lik mờ gam jơh bal tàm tiah đah mat tơngai mut dà lơgar dê, bè hơ̆ gùng dà krơi is nàng bơtàu tơnguh lơh sa mpồl bơtiàn bơh Buôn Ma Thuột dê là kuơmàng ngan mơya pal pơgồp bal bơtàu tơnguh lơh sa mờ sền gàr dà lơgar, sền gàr lơngăp lơngai, tài gơtùi gàr kơ̆ lơngăp lơngai dà lơgar den hơ̆ sồng gơtùi bơtàu tơnguh lơh sa. Den tàng, ồng Lê Tấn Tới sồr pal geh jơh bal broă lơh krơi is gơwèt mờ mpồl kwang àng, ling klàng, ling sền gàr tiah nhàr dà lơgar tàm tiah hơ̆.