VOV4.K’ho- Broă lơh tă pơgồp priă jền tàm dong kờl gơp sơrlèt gan kal ke bơh Mpồl đơng lam ling klàng xã Hòa Phú, ƀòn dờng Buôn Ma Thuột, càr Dăk Lăk dê ală nam do neh tơnguh cồng nha. Bơh kes priă do, ală cau ling griăp ƀòn neh tam pà bơta kờñ gơboh, dong kờl gơp bơtàu tơnguh lơh sa hìu bơnhă, gàr kơ̆ kơljap rài kis, iang nùs lơh broă, đềt mềr mờ kơnòl broă.  

Là cau tam kơphe mờ tiêu, gơtìp kal ke tài bơh tờm chi kra ràm, khà priă tac gơmù, bi Phan Sự ơm tàm thôn 1, xã Hòa Phú neh geh tŭ kờp dŭ tus jơnau tac hìu nàng lòt Bình Dương lơh kông ñân.

Bi Sự gròi sền mpồl jơrke sơntìl pa

Bulah bè hơ̆, bơnah priă càn 20 tơlak đông bơh kes priă ling griăp ƀòn xã dê tàm nam 2016 neh dong bi lơh wơl tàm suơn rlau 1 lồ hìu bơnhă dê. Bi Sự khin cha dus sang kơphe mờ tiêu, tam gơl tam lơ u, pơ nat thái; lơh wàng ròng jơrke me sơntìl pa. Broă ròng phan ƀuơn ƀuài, chi tam gơs niam, den tàng broă lơh sa hìu bơnhă hời rơ hời bơtàu tơnguh: “Oh mi dong kờl ai càn 20 tơlak đông, bơh kes priă hơ̆ añ blơi 2, 3 yô jơrke sơntìl hơ̆ sồng ròng hời rơ hời. Bơh hơ̆ añ ròng jơrke kòn gơs jơrke me, hơ̆ sồng dùl nam deh 2 dơ̆ geh pơgap bơh 100 tus 150 nơm sur kòn. Bơh khà hơ̆ añ tac, ai priă pơn jat tai lơh wàng ròng, rề ơnàng broă ròng phan, tŭ do, priă jền lơh geh kơ̆ kơljap sùm rlau 200 tơlak đông dùl nam”.Ờ mìng tàm dong kờl gơp bơtàu tơnguh lơh sa, kes priă ling griăp ƀòn bơh Mpồl đơng lam ling klàng xã Hòa Phú dê gam di tŭ dong kờl ală hìu bơnhă geh rài kis ờ bơtuah. Bi Nguyễn Đăng Huỳnh, Phó kwang atbồ Mpồl đơng lam ling klàng xã Hòa Phú pà git, dilah ờ geh oh mi dong kờl, den bi neh dan ơm rlô, jòi broă ndai tài bơh kòn dềt sùm gơtìp kòp jê, tàm tŭ rài kis lơh sa hìu bơnhă dê gam uă kal ke: “Añ geh 2 nă kòn, kòn tơnhua añ dê ờ bơtuah gơtìp kòp plai nùs. Tàm tơngai hơ̆, oh mi geh tă pơgồp ai añ in càn mờr 40 tơlak đông nàng reh sau in mờ ai ai càn tai 20 tơlak đông. Kes priă neh dong añ sơrlèt gan kal ke, kòn añ dê tŭ do neh pràn kơldang”.

Kes priă ling griăp ƀòn dờng ală cau geh jơng bơtàu tơnguh lơh sa

Bi Nguyễn Văn Tuyển, Kwang atbồ Mpồl đơng lam ling klàng xã Hòa Phú, là cau geh jơng tàm mpồl tă pơgồp priă jền pà git: Kes priă geh kơrnuat lơh broă loh làng den tàng cau lơi kung jơh nùs tus bal. Pah nhai, tơl nă cau geh jơng tàm kes priă gơ wèt tàm bơta geh ngan broă lơh sa hìu bơnhă dê mờ tă pơgồp bơh 200 tus 500 rbô đông. Hìu bơnhă kal ke geh dong kờl êt ngan rlau jơh là 10 tơlak đông, uă ngan rlau jơh là mờr 100 tơlak đông. Kes priă sùm ai lài ală cau geh jơng geh rài kis kal ke in: “Priă dong kờl oh mi dê dùl êt ngan, ờ tơl nàng gàr broă lơh sa hìu bơnhă dê, ƀảo hiểm y tế den ờ geh. Kung geh uă oh mi broă lơh sa gam kal ke, ùr bơklau pa bau. Bol hi crơng gơs kes priă do nàng kờñ dong kờl nàng bal mờ gơp sơrlèt gan tŭ tơngai kal ke mờ gàr niam nùs nhơm tŭ lam lơh kơ nòl broă. Nàng oh mi pin dờn, ai bơnah priă càn do, priă càn tàm pơ dờn mùl geh nàng ală oh mi ờ duh pal lòt leng càn bơdìh, halà càn priă sa priă cồng uă halà geh uă tŭ càn ngân hàng mơya tus tơngai hơ̆ den broă lơh sa gam kal ke. Dilah ờ geh kes priă do den uă oh mi digơlan neh sang broă”.

Jat ồng Nguyễn Hữu Toàn, Củ tịc Ủy ƀan Ñân zân xã Hoà Phú pà git, bơh bơnah priă dong kờl ai càn do, ală oh mi geh jơng neh bơcri bơtàu tơnguh lơh sa, ròng kơn rồ, sur, iar, ơda, tam biap sàng goh, bơtàu tơnguh lơh sa sươn chi, pờ broă drơng ala tac bro phan nàng tơnguh tai priă jền lơh geh, bơtàu tơnguh rài kis, brồ guh lik klàs rƀah: “Kes priă do lơh broă dùl bă loh làng. Ală oh mi lơi gơtìp kal ke den geh tă bơh kes priă do nàng ai càn, nàng tàm dong kờl bal mờ gơp lơh sa sươn chi, lơh sa hìu bơnhă gơ in niam rlau. Hơ̆ sồng ală oh mi 2 nam lòt lơh kơ nòl ling klàng rê wơl tàm ƀòn lơgar ờ hềt geh broă lơh den ală oh mi kung dong kờl ai càn priă nàng lơh sa hìu bơnhă. Hơ̆ sồng ling klàng xã tus bal mờ ơruh pơnu, pơgồp bal mờ gơ noar atbồ mut lùp tàm anih lơh sa mờ măi mok nàng yal tơnggit cau lơh broă ai ală hìu măi, xí nghiệp in”. 

Kes priă ling griăp ƀòn xã Hòa Phú geh crơng gơs mờ lơh broă bơh nam 2016, geh 20 nă cau tus bal. Tơ nơ̆ 7 nam, ală cau tus bal neh tă pơgồp tàm kes priă rlau 360 tơlak đông. Bơh kes priă do, ală cau geh jơng neh geh càn priă nàng bơcri lơh sa, kă bro. Rài kis hời rơ hời kơ̆ kơljap neh dong ală cau geh jơng iang nùs lơh broă, đềt mềr mờ kơ nòl broă.

Cau mblàng K’Duẩn