VOV4.K’ho- Tơnơ̆ rlau 10 nam lơh jăt broă lơh tă tơm priă drơng broă sền gàr brê, rlau 15 rbô hìu bơnhă cau K’ho tàm càr Lâm Đồng dê neh dờp kwơ tơn, tơnguh priă lơh geh bơh brê, tam gơl broă lơh sa ơm kis mờ rơhời brồ guh kơ̆ kơl jăp rài kis pa. Kơnờm bè hơ̆ mờ bulah gơrềng bơh kòp dờng Kovid-19 dê, mơya sa tềp do làng bol jơi bơtiàn kòn cau dùl êt nă cau tàm tiah do kung gam rơcăng sơl phan bơna nàng chờ hờp wă rò sơnam pa, sa tềp dùl bă hờm ram, chờ hờp mờ wil tơl.

Gĭt nền geh chờ hờp sơnam pa tàm rài kis bè ờs pa, gơdờp bal mờ kòp bơtờp Kovid-19 bè ală hìu bơnhă ndai tàm ƀòn sơl, mơya wă rò sơnam pa sa tềp nam do gơwèt mờ hìu bơnhă ồng Liêng Jrang Ha Solly ơm tàm thôn 2, xã Dà Sar, kơnhoàl Lạc Dương, càr Lâm Đồng dê gơlơh duh hồl hô hơng nggồr nggàc rlau mờ nam lài. Ờ chờ hờp mbè gơtùi hơ̆ tŭ mờ lơh kơphê bơh hìu bơnhă dê bulah geh gơmù dùl êt mơya giă tăc bro den gơguh uă wơl, bal mờ priă jền dờp geh bơh broă tă tơm priă drơng broă sền gàr brê tai...ờ mìng gàr tơl jơnau kờñ ngui sa tàm rài kis pah ngai lơm mờ tàm nam 2021 pa do, hìu bơnhă ồng Solly gam tềm pềr tai geh dùl bơnah priă jền kung uă đau sơl. Lơh sa kơ̆ kơl jăp, hìu bơnhă kung blơi prăp sơl wil tơl ală phan bơna ngui sa pal geh tàm rài kis nàng tam pà bal bơta chờ hờp, wă rò sơnam pa bal mờ oh mi tàm ƀòn lơgar. Ồng Liêng Jrang Ha Solly, chờ hờp yal: Lài, do tŭ rài kis geh uă ir kal ke, tŭ geh broă lơh tă tơm priă drơng broă sền gàr brê den dong làng bol lơh geh tai priă jền, geh priă nàng ngui sa tàm rài kis pah ngai ai hìu bơnhă in. Sa tềp bơhiàn dà lơgar do dê hìu lơi klung blơi prăp lơm wil tơl ală phan ngui sa kờñ pal geh, chờ hờp bal mờ jơh tơl nă cau, sa chờ hờp bal mờ wă rò sơnam pa kơ̆p kờñ geh tai uă cồng nha pa.

Kềng bơnhă ồs gam hìt sùm nàng tơn roh ƀà bơta mrềt noăt ngan bơh trồ mang tiah kơh bơnơm jơnhoa dê tàm dùl nơm hìu kù geh lơh tàm gùl dòr bồ dòr bơnơm jơnhoa, gơwèt brê rơcăng gàr bồ tô dà Dà Ñim, ngài mờ gùng rơndeh dờng 27C, gơl gùng tàm tơrbŏ bal 2 ƀòn dờng: Dà Làc mờ Nha Trang jòng pơgăp 5 kơi sồ rê hờ đah tô măt tơngai lik, kra ƀòn ồng Păng Ting Doan, Ƀí thư Ci ƀộ thôn 1, xã Dà Sar mờ rlau jơ̆t nă cau tàm mpồl dờp ătbồ sền gàr brê tơrgùm să lơh anih gròi sền tàm do nàng rơcăng sơndră ồs sa brê tàm kàl prang. Kra ƀòn ồng Pang Ting Doanh pà gĭt, tài bơh kơnòl broă ătbồ sền gàr brê den tàng ală cau tàm mpồl dờp ătbồ sền gàr brê tơrgùm jơh să tàm do. He neh hơ dờp ătbồ sền gàr brê ai Dà lơgar in den he pal geh kơnòl.    

Ồng Pang Ting Doanh yal, lài do tơl hìu dờp ătbồ sền gàr brê geh pà rlau 400 rbô đong dùl lồ dùl nam den tŭ do neh gơguh tus 650 rbô đong dùl lồ dùl nam. Kờp bal tơl hìu dờp ătbồ sền gàr bơh 20 tus 25 lồ brê, lơh geh priă jền sùm bơh 13 tus 16 tơlak đong tàm dùl nam. Bal mờ ală priă jền lơh tờm bơh tam biăp, phan tam ală bơta, tờm chi jŏ nam mờ ròng tai sur iar, rơpu kơnrồ...rài kis làng bol dê neh rơhời kơ̆ kơl jăp rlau mờ lài uă ngan. Mìng is nam do, kơnòm bơh kơphê gơguh giă, bal mờ priă tă tơm bơh broă lơh drơng broă sền gàr brê geh dờp tàm lồi nam den tàng làng bol làm gùt ƀòn lơgar ndrờm geh lơm priă jền nàng rơcăng wă rò sơnam pa sa tềp hờm ram mờ chờ hờp. Kra ƀòn ồng Pang Ting Doanh, đơs: Geh priă jền bơh broă dờp ătbồ sền gàr brê den rài kis làng bol dê kơ̆ kơl jăp rlau mờ lài uă ngan, dong geh priă ngui sa tàm rài kis pah ngai. Dilah ờ geh priă jền do den ngan ngồn rài kis làng bol dê geh kal ke ngan. Sa tềp bulah làng bol bơyai lơh wă rò sơnam pa sa tềp chờ hờp, bơyai lơh bè ờs sơl mơya broă ătbồ sền gàr brê kung gam pal sơlơ lơh uă sơl, ờ gơtùi ờ gŏ rơcăng ngăc ờ. Tài bơh priă jền lơh geh bơh broă dờp ătbồ sền gàr brê là geh sùm, ờ gơtìp rềs àr ờ geh tơnhàu roh giă bè tam phan, den tàng bè hơ̆, he pal lơh niam mờ broă bè neh hơ, sùm geh kơnòl uă ngan bè ătbồ sền gàr brê.

Broă lơh jăt broă lơh tă tơm priă drơng broă sền gàr brê tàm càr Lâm Đồng, tàm hơ̆ geh tiah brê bơh Mpồl ătbồ brê rơcăng gàr bồ tô dà Dà Ñim dê tàm kơnhoàl Lạc Dương ờ mìng cèng wơl broă lơh broă sa kơ̆ kơl jăp jŏ jòng ai làng bol in mờ gam tơnguh tai bơta gĭt wă gơwèt mờ broă lơh ătbồ sền gàr brê gơwèt mờ cau K’ho tàm do. Jăt ồng Đinh Hữu Đạo, Phó Kwang ătbồ Mpồl ătbồ brê rơcăng gàr bồ tô dà Dà Ñim dê yal, jơh ală bă ù rlau 40 rbô 800 lồ bơh mpồl dê ndrờm jàu ai ală mpồl cau, cau dùl nă să is in ătbồ mờ sền gàr. Tàm hơ̆, geh 37 rbô 690 lồ geh jàu ai mờr 1 rbô 500 hìu bơnhă cau K’ho in tàm xã Dà Sar, Dà Chais mờ Dà Ñim, kơnhoàl Lạc Dương in dờp ătbồ sền gàr brê. Bơdìh mờ dong làng bol geh tai priă jền, geh sùm broă lơh broă sa, broă lơh ătbồ sền gàr brê kung ngai sơlơ lơh geh cồng nha niam rlau. Ồng Đinh Hữu Đạo pà gĭt: Tŭ priă jền tă tơm priă drơng broă sền gàr brê gơguh tai den bơta gĭt wă mờ kơnòl bơh ală hìu bơnhă dờp ătbồ sền gàr brê dê kung sơlơ gơguh uă sơl, ngan là broă lơh rơcăng sơndră ồs sa mờ crùh ồs brê tàm kàl brê. Ală mpồl tàm jàu kơnòl drơng sền tàm ală anih neh rơndăp nàng gŏ mờ crùh gơ sơ̆t tơn ồs sa tàm tiah hơ̆ gơ in di tŭ. Den tàng bè hơ̆, ală nam rềp ndo tàm bă brê bơh mpồl dê ờ geh dơ̆ ồs sa lơi gơtìp. Tàm ală ngai mờr tus ngai sa tềp dà lơgar dê, ală hìu bơnhă dờp bă brê ătbồ sền gàr tơnơ̆ tŭ geh priă blơi phan rơcăng sa tềp, wă rò mang tàm jàu sơnam sir jơh den làng bol tus bal mờ mpồl tàm ală trạm nàng drơng sền ồs sa kung bè lòt sền mờ sền gàr brê.

Bal mờ broă tơnguh tai priă tă tơm drơng broă sền gàr brê, dong cau dờp bă brê ătbồ sền gàr geh sùm broă lơh broă sa, làng bol cau K’ho tàm ală xã: Dà Sar, Dà Ñim, Dà Chais bơh kơnhoàl Lạc Dương, càr Lâm Đồng dê gam geh dờp tai uă bơta kwơ bơh uă broă lơh, broă dong kờl ndai bơh Đảng mờ Dà lơgar dê bơcri, bè broă lơh gơmù rƀah mhar mờ kơ̆ kơl jăp, bơ̆t bơtàu ƀòn lơgar oa, bơto pơlam bơta chài tam phan, tam gơl rơndăp tăp sèng chi tam...Do ngan ngồn là ală broă dong kờl loh làng mờ geh kwơ ngan, dong ƀòn lơgar kòn cau K’ho bơh kơnhoàl Lạc Dương dê đơs is mờ càr Lâm Đồng dê đơs bal geh tai priă jền, bơta pràn gơn kơnờm nàng bơtàu tơnguh rlau tai.

                                          Cau cih Quang Sáng- Cau mblàng Lơ Mu K’Yến