Mùl màl, jat khà kờp bơh Ủy ƀan Ñân zân càr Kon Tum dê ai gŏ, ală anih lơh broă mờng chài gơ wèt Ủy ƀan Ñân zân càr, Ủy ƀan Ñân zân ală kơnhoàl, ƀòn dờng, Ủy ƀan Ñân zân kâp xã neh bơsong mơya neh rlau tơngai hơ pơrgon là 18 rbô 394 sră nggal tàm kờp jơh 235 rbô 871 sră nggal. Pal gròi sền là geh 2 rbô 429 sră nggal neh jơh tơngai pơrgon mơya ờ hềt bơsong.

Anih tờm drơng broă hàñ cíñ dà lơgar càr Kon Tum

Tềng đap bơta geh ngan do, ngai 24/10, Ủy ƀan Ñân zân càr Kon Tum geh sră nggal sồr anih lơh broă mờng chài gơ wèt Ủy ƀan Ñân zân càr; Mpồl atbồ tiah lơh sa; Ủy ƀan Ñân zân ală kơnhoàl, ƀòn dờng tơrgùm bơsong jơh sră nggal neh jơh tơngai pơrgon lài mờ ngai 05/11/2022. Bal mờ hơ̆, Củ tịc Ủy ƀan Ñân zân càr Kon Tum kung sồr ală mpồl lơh broă sơlơ tơnguh bơta lơh glài, kơrnuat pal jat hàñ cíñ, lơh glài ală kwang bàng, kông cứk, viên cứk geh broă lơh pơhì pơhà, ờ niam halà lời lơyài, jơla uă dơ̆ tàm broă bơsong sră nggal hàñ cíñ. Gàr niam 100% sră nggal hàñ cíñ lời lơyài, jơla ndrờm pal geh jơnau yal mblàng lơh loh jơnau bơh tài gơbàn bơta do mờ cau atbồ anih lơh broă, mpồl lơh broă mờ dan să làng bol, mpồl lơh sa kă bro jat di jơnau sồr tàm Nghị địñ sồ 61 nam 2018 bơh Cíñ phủ dê.