VOV4.K’ho- Càr Kon Tum geh rlau 50 rbô 600 nă cau geh màng mờ dà lơgar. Kơnờm lam lơh niam broă lơh dong kờl bơh Đảng, Dà lơgar dê mờ bơta tă pơgồp bơh mpồl bơtiàn dê geh srơh “Kis git jơnau git adat” den tàng tus tŭ do, 99,82% hìu bơnhă geh sră dong kờl bơh dà lơgar càr dê neh geh rài kis ndrờm halà jơnhua rlau mờ rài kis kờp bal bơh làng bol tàm tiah ơm kis dê.  

Tàm xã Hiếu, kơnhoàl Kon Plông, càr Kon Tum, hìu bơnhă cau ling kòp tê jê să ồng Đinh Lôi ơm tàm ƀòn Vi Ching là dùl tiah pôs đồng kac màng. Tàm ală nam do, gơnoar atbồ kung bè ală mpồl cau bơh xã Hiếu dê sùm lời ai bơta sền gròi, sền gàr cau ling kòp tê jê să mờ hìu bơnhă.

Kông ty ồs đèng Kon Tum pà phan kah ưn ngài hìu bơnhă cau geh màng mờ dà lơgar tàm xã Mường Hoong, kơnhoàl Đăk Glei

Bal mờ ală broă lơh dong kờl lài ngan bơh Đảng, Dà lơgar dê tàm bơtàu tơnguh lơh sa, gròi sền rài kis làng bol tiah uă kal ke, hìu bơnhă cau ling kòp tê jê să ồng Đinh Lôi gam sùm geh dong kờl, pơlam bơtàu tơnguh lơh sa, tơnguh niam rài kis. Tàm ală ngai chờ, ngai sa tềp, ngai Cau ling sồt să- cau ling chơt màng 27/7... ala mat gơnoar atbồ, mpồl cau bơh xã dê ndrờm tus tàm hìu nàng lùp còp, pà phan pơn jờng nùs nhơm cau ling kòp tê jê să mờ hìu bơnhă. Cau ling kòp tê jê să, ồng Đinh Lôi pà git: “Kung kơnờm geh Đảng, Dà lơgar sền gròi, dong kờl gơwèt tus mờ cau ling kòp tê jê să dùl bă tơl làm, di tŭ. Hơ̆ sồng gơnoar atbồ, mpồl cau bơh xã dê dong kờl den tàng añ bal mờ hìu bơnhă gơtùi bơtàu tơnguh lơh sa, rài kis kung ndrờm bè làng bol tàm ƀòn lơgar. Chờ gờp den tàng kung pràn đau sơl, añ gam tus bal mờ kòn sau tam chi, lơh sre tai”.

Là càr geh broă lơh sa mpồl bơtiàn gam uă kal ke, mơya Đảng ƀộ, gơnoar atbồ càr Kon Tum sùm đal git, broă lơh Cau ling sồt să- cau ling chơt màng, gròi sền, bơsong broă dong kờl gơ wèt tus mờ cau geh màng mờ dà lơgar là kơnòl cíñ trị tờm ngan mờ pal lơh sùm. 

Ủy ƀan Ñân zân càr Kon Tum pà ƀằng khen ai ală xã, sơnah ƀòn, thị trấn lơh niam broă lơh Cau ling sồt să- cau ling chơt màng in

Mờ nùs nhơm do, ờ mìng tiah ƀuơn ƀuài mờ jơh bal tàm tiah sar lơgar ngài, tiah uă kal ke, tiah jơi bơtiàn kòn cau dùl êt nă cau, broă lơh gròi sền, kah ưn ngài gơwèt tus mờ cau geh màng mờ kac màng ndrờm geh sền gròi uă ngan. Mò Mai Thị Luận, Phó Củ tịc Ủy ƀan Ñân zân xã Đăk Rơ Ông, kơnhoàl Tu Mrông pà git, jơh gùt xã geh 56 nă cau ling sồt să mờ hìu bơnhă cau ling chơt màng. Broă lơh “Kis git jơnau git adat” là broă lơh sùm gơwèt tus gơnoar atbồ mờ mpồl cau tàm xã: “Sền gròi tus ală ồng mò, Đảng ủy, Hội đồng Ñân zân, Ủy ƀan Ñân zân xã bơyai lơh tìp mat di tơngkah ngai Cau ling sồt să- cau ling chơt màng. Di tàm dơ̆ sa tềp den lam lơh lùp còp, pơn jờng ală ồng, ală mò hơ̆ sồng ală hìu bơnhă cau pròc mhàm tờm duh khoai cau ling chơt màng. Bơdìh hơ̆ tai tàm ƀòn lơi kung jàu ai ală Ƀí thư Ci đoàn, hơ̆ sồng hòi jà đoàn viên ơruh pơnu, cau ùr dong kờl ngai lơh broă bè koh lòng, jì nhơt bùm blàng, lơh nhơt kòi hơ̆ sồng lơh ală broă dong ală ồng, ală mò in’.

Jơnau yal bơh Sở Lao động, Thương ƀiñ mờ Xã hội càr Kon Tum dê ai gŏ, tàm 5 nam do, càr neh lam lơh lùp còp mờ pà mờr 99 rbô bơnhă phan ai cau geh màng mờ dà lơgar in tàm dơ̆ sa tềp bơhiàn yai mờ ngai Cau ling sồt să- cau ling chơt màng 27/7 mờ kờp jơh priă tă lơh mờr 24 tơmàn 200 tơlak đông. Bal mờ hơ̆, kes priă “Kis git jơnau git adat” bơh càr dê gam hòi jà tă pơgồp geh mờr 5 tơmàn đông pơgồp bơnah lơh niam ƀlàng tơp ƀồc cau ling chơt màng; lùp còp tŭ kòp jê, dong kờl kham sơm kòp ai cau geh sră dong kờl bơh dà lơgar; dong kờl lơh pa, lơh niam wơl rlau 1 rbô 200 nơm hìu ơm ai cau geh màng mờ dà lơgar mờ hìu bơnhă geh sră dong kờl bơh dà lơgar in mờ kờp jơh khà priă rlau 37 tơmàn 200 tơlak đông. Broă dờp ròng siam, gròi sền hìu bơnhă geh sră dong kờl bơh dà lơgar, mè Việt Nam khin cha jak chài neh mpồl bơtiàn tă pơgồp dong kờl gơ gơs bơta niam bơh srơh “Kis git jơnau git adat dê”.

Ồng Nguyễn Thanh Tính, Phó Kwang atbồ Sở Lao động, Thương ƀiñ mờ xã hội càr Kon Tum dê đơs nền: “Broă lam lơh niam broă dong kờl cau geh màng mờ dà lơgar neh dong cau geh màng mờ dà lơgar geh rài kis kơ̆ kơljap rlau, pơgồp bơnah gàr kŏ kơljap cíñ trị, mpồl bơtiàn. Geh kuơ uă ngan tàm broă bơto bơtê bơhiàn kờñ gơboh dà lơgar, bơhiàn kac màng tàm mpồl kwang bàng, đảng viên, kông cứk, viên cứk mờ ală rơnàng làng bol. Rài kis nùs nhơm, phan bơna bơh ală cau geh sră dong kờl bơh dà lơgar dê ngai sơlơ tam gơl niam”.

Kơnờm lam lơh niam broă lơh dong kờl bơh Đảng, Dà lơgar dê kung bè hòi jà mpồl bơtiàn tă pơgồp geh srơh “Kis git jơnau git adat”, tus tŭ do, 99,82% hìu bơnhă geh sră dong kờl bơh dà lơgar càr Kon Tum dê neh geh rài kis ndrờm halà jơnhua rlau mờ rài kis bè ờs bơh làng bol tàm tiah ơm kis dê, rài kis phan bơna mờ nùs nhơm bơh ală cau geh sră dong kờl bơh dà lơgar ngai sơlơ geh tơnguh niam. Jơnau đơs bơh gơnoar atbồ ală kâp bơh càr Kon Tum dê kung ai gŏ, jơh 102 xã, sơnah ƀòn tàm càr ndrờm lam lơh niam srơh “Kis git jơnau git adat” mờ broă lơh Cau ling sồt să- cau ling chơt màng jat 6 broă jàu bơh Ƀộ Lao động, Thương ƀiñ mờ Xã hội dê.

Cau mblàng K’Duẩn