VOV4.K’ho- Tus tŭ do, tàm càr Kon Tum neh geh uă cau gơtìp pơrlồm mờ tăc tus lơgar Campuchia lơh “broă nggờk mơya priă nhai uă” mờ jơh ală cau gơtìp pơrlồm sơnam gam kơnòm ngan. Nàng làng bol, ngan là tàm tiah nhàr lơgar mờ tiah jơi bơtiàn kòn cau dùl êt nă cau ờ gơtìp gơkuĕ tàm kai lơh “broă nggờk mơya priă nhai uă, mpồl ling Sền gàr tiah nhàr lơgar càr Kon Tum mờ gơnoar ătbồ tiah do gam lơh pràn broă lơh mblàng yal, dong làng bol tơnguh uă jơnau gĭt kơrhia lài mờ rơcăng ngăc.

Tơnơ̆ tŭ mpồl ling Sền gàr tiah nhàr lơgar càr Kon Tum dong klàs geh oh Y Liên, 16 sơnam, ơm tàm thôn Kei Joi, xã tiah nhàr lơgar Đăk Xú, kơnhoàl Ngọc Hồi bơh lơgar Campuchia rê hờ lơgar tàm lồi nhai 08 pa do, kwang bàng, cau ling tàm Pôs đồng ling Sền gàr tiah nhàr lơgar Đăk Xú pơgồp bal mờ gơnoar ătbồ tiah do sơlơ mblàng yal, yal lơh loh nàng làng bol in gĭt, jơnau “broă nggờk priă nhai uă” mìng là jơnau lơh pơrlồm gời lơm bơh cau ờ niam dê. Trung tá ồng Nguyễn Đình Thạch, Kwang ătbồ Pôs đồng ling Sền gàr tiah nhàr lơgar Đăk Xú, pà gĭt: Mpồl pơgồp bal mờ gơnoar ătbồ tiah do bơyai lơh mblàng yal tàm ƀòn lơgar in bè jơnau kai, kai kơrmơi rơlăc rơliang ngan bơh ală cau dê lơh pơrlồm ală sau ơruh pơnu kơnòm pa tàu lòt hờ lơgar ndai, uă ngan là tus tàm lơgar Campuchia lơh broă nggờk priă nhai uă. Pôs đồng ling kung neh ai Mpồl hòi jà làng bol tus tàm ală ƀòn lơgar mblàng yal ai ală hìu bơnhă in gĭt, rơcăng ngăc mờ ală jơnau bè hơ̆.

Kwang bàng cau ling Pôs đồng ling Sền gàr tiah nhàr lơgar Đăk Xú lòt còp mờ pơndờm pơnđiang oh Y Liên bal mờ hìu bơnhă

Jăt ồng Đào Tuấn, Củ tịc Ủy ƀan Ñân zân xã Đăk Xú, kơnhoàl Ngọc Hồi dê yal, tàm rlau 7 rbô nă làng bol bơh xã dê, làng bol kòn cau dùl êt nă cau geh rlau 60%. Bal mờ lơh pràn mblàng yal nàng làng bol in tơnguh uă jơnau rơcăng ngăc, kơrhia ngan mờ kai “broă nggờk priă nhai uă”, Đảng ủy, gơnoar ătbồ xã kung jơh nùs ngan jòi broă lơh nàng cau lơh broă bơh xã dê geh broă lơh dipal mờ jŏ jòng. Ồng Đào Tuấn, yal: Ci ƀộ, mờ kwơmàng là Mpồl ătbồ thôn gĭt nền oh kòn geh jơnau kờñ lơh broă tàm càr halà bơdìh lơgar. Đảng ủy, gơnoar ătbồ lùp bơh ală gah yal tơngĭt jơnau ngan ngồn yal tơngĭt broă lơh, lòt lơh broă hờ lơgar ndai nàng geh bơta sền gàr dong kờl bơh Dà lơgar dê pleh jơnau ală oh, ală sau mờ cau lơh broă pơn jăt tai gơtìp sơmờm, pơndờm pơn jồ bè jơnau pa do.

Càr Kon Tum geh gùng nhàr lơgar ơm rềp bal mờ 2 lơgar gơ̆p bơyô Lào mờ Campuchia. Gĭt nền ală cau ờ niam geh pơn jăt tai sơmờm nùs nhơm song dơ pă, mhar ngan pin dờn bơh làng bol dê kung bè bơta ờ hềt wă wờng ngan, ờ hềt geh uă bơta mờng chài tàm rài kis bơh bàr pe nă ơruh pơnu geh nùs nhơm kờñ ơm gời sa gời, mhar pas dê, mpồl ling Sền gàr tiah nhàr lơgar càr Kon Tum gam pơn jăt tai pơgồp bal niam ngan mờ gơnoar ătbồ mờ ală mpồl cau jơh nùs ơm rềp mờ ƀòn lơgar, lùp nàng gĭt nền ală jơnau gơlik geh tàm ƀòn lơgar nàng kơryan di tŭ ờ lời làng bol lơi gơgìp gơkuĕ tàm kai “broă nggờk mơya priă nhai uă”.

Mpồl ling Sền gàr tiah nhàr lơgar càr Kon Tum ơm rềp tàm ƀòn lơgar mblàng yal ờ lời làng bol gơtìp gơkuĕ tàm kai “broă nggờk mơya priă nhai uă”

Đại tá Lê Quốc Việt, Kwang ătbồ Mpồl ling Sền gàr tiah nhàr lơgar càr Kon Tum, pà gĭt: Gah đơng lam kung neh sồr ală Pôs đồng pơn jăt tai mblàng yal làng bol in tơnguh uă jơnau rơcăng ngăc, gĭt kơrhia lài ờ lời ală cau in pơndờm pơn jồ, hoài jà ală cau, ngan là ơruh pơnu, cau kơnòm să gơtìp gơtŭp tàm ală mpồl cau pơndờm pơn jồ, hoài jà lòt tus lơgar Campuchia. Mờ Gah đơng lam mpồl ling Sền gàr tiah nhàr lơgar kung neh geh jơnau sồr ală mpồl ling, ală gah bơh càr dê pal pơgồp bal lơh niam broă do. Bol añ kung neh lơh broă mờ 4 kơnhoàl tiah nhàr lơgar mờ sồr ală kơnhoàl sồr ală gah geh gơrềng pơgồp bal mờ mpồl ling sền gàr tiah nhàr lơgar lơh niam broă lơh ătbồ ƀòn lơgar mờ mblàng yal, bơto pơlam làng bol in ờ gơtìp cau tăc blơi nùs nhơm, hoài jà lòt tus lơgar Campuchia.

Cau cih Khoa Điềm- Cau mblàng Lơ Mu K’Yến