VOV4.K’ho- Nàng kờñ sền sơ wì tơl làm cồng nha lơh geh tàm broă  lơh dră wơl sơrbì jơ yàng ờ ngan Hà Mòn, đal git kơ nòl broă lơh rơcang sơndră, kơryan bơta lơh broă wơl bơh yàng ờ ngan Hà Mòn dê tàm tơngai tus, Tỉñ ủy Kon Tum neh bơyai lơh pơrjum tơn jơh broă lơh dră wơl sơrbì jơh yàng ờ ngan Hà Mòn tàm càr.

Jơnau yal bơh Tỉñ ủy Kon Tum dê tàm pơrjum ai gŏ, lơh jat jơnau đơng lam bơh dà lơgar dê, bơh nam 1999, Ƀan Thường vụ, Thường trựk Tỉñ ủy Kon Tum neh đơng lam ală kâp, ală gah broă lơh lam lơh ală kơ nòl broă, broă lơh dră wơl, kơryan, sơrbì jơh yàng ờ ngan Hà Mòn.

Ƀí thư Tỉñ ủy, Củ tịc Hội đồng Ñân zân càr Kon Tum ồng Dương Văn Trang đơs tàm pơrjum

Tus tŭ do neh sơrbì jơh bè mpồl cau mờ gơtùi bơsong geh bơta cíñ trị, pơr lơ̆ dră, tam cah is, atbồ is bơh yàng ờ ngan Hà Mòn dê. Tŭ do neh geh 7 nă cau atbồ, cau tờm ngan bơh yàng ờ ngan Hà Mòn dê lơh jat jơh tơngai lơh glà kup jàm rê wơl tàm ƀòn lơgar, gam 2 nă cau gam lơh jat kơrnuat lơh glài tàm hìu jàm Gia Trung- Ƀộ Kwang àng mờ ndrờm lơh jat niam kơrnuat lơh glài, geh tơrmù tơngai lơh glài uă dơ̆. Jat jơnau đơs bơh Tỉñ ủy Kon Tum dê, tàm càr tŭ do ờ gam cau đòm, jat yàng ờ ngan Hà Mòn. Ồng Dương Văn Trang, Ủy viên Đảng dà lơgar, Ƀí thư Tỉñ ủy, Củ tịc Hội đồng Ñân zân càr Kon Tum đơs nền: “Bơta lơngăp lơngai, ờdo ờdă tàm ală tiah lài do geh broă lơh bơh yàng ờ ngan Hà Mòn dê geh gàr kơ̆ kơljap. Ală cau neh sang tĕ yàng ờ ngan Hà Mòn geh ƀòn lơgar sền gròi, dong kờl, ai tơlik bơta niam lơh sa, rài kis ngai sơlơ tam gơl niam. Bơta ờ ring bal đah ală cau lài do jat yàng ờ ngan Hà Mòn mờ ală cau ờ jat yàng ờ ngan Hà Mòn neh geh bơta tam gơl niam. Neh gơtùi hòi jà 2, 3 nă cau duh broă yàng tus bal tàm broă lơh sơrbì jơh yàng ờ ngan Hà Mòn, lơh gơlik bơta niam ai ală cau sang tĕ yàng ờ ngan Hà Mòn geh rê wơl pơrjum mờ Yàng Bàp”.

Thượng tướng Lương Tam Quang, Thứ trưởng Ƀộ Kwang àng đơs tàm pơrjum

Yàng ờ ngan Hà Mòn bơh mò Y Gyin lơh broă gru jơnăng crơng gơs tàm lồi nam 1999 tàm xã Hà Mòn, kơnhòal Đăk Hà, càr Kon Tum. Bơta crơng gơs bơh yàng ờ ngan Hà Mòn dê sơn đờm bơh broă mò Y Gyin tơlik jơnau yal pơrlồm “Sền gŏ mè yàng Maria tơlik să” tềng hơđăng rơkàng hìu bơh hìu bơnhă dê mờ să tờm he geh Mè yàng jàu sồr crơng gơs dùl gah jat yàng pa, mờ kung tơlik jơnau yal pơrlồm là cau lơi lòt jat den geh rài kis khat gơboh, gơboh gơbài, kòp jê ờ duh sơm kung bời, dồs gloh (kờp bal mờ dồs ngân hàng) geh sang sơrbì jơh... Tŭ uă ngan rlau jơh tàm nam 2012, yàng ờ ngan Hà Mòn geh tàm 6 kơnhòal, ƀòn dờng ; 10 xã, sơnah ƀòn, thị trấn; 21 thôn ƀòn tàm càr Kon Tum mờ rlau 2 rbô 300 nă cau jat yàng, 92 nă cau atbồ, cau tờm, 48 nă cau ơm pồn, dô pleh bơh ƀòn lơgar; yàng ờ ngan Hà Mòn geh bơta crơng gơs bè mpồl rơndap broă, cau drơng broă ală anih pơrjum; 2, 3 nă tờm ngan tàm ƀòn lơgar gam geh bơta lơh bal, tàm yal jơnau, bơtàu tơnguh yàng ờ ngan Hà Mòn tus càr Gia Lai mờ Dăk Lăk.

Broă lơh bơ yàng ờ ngan Hà Mòn dê neh lơh gơlik uă bơta kal ke bè lơngăp lơngai, ờdo ờdă bè: ală bol FULRO ơm kis lềng làng tàm tơrbŏ, sồr ală cau tàm yàng ờ ngan Hà Mòn lam lơh ală broă lơh dră wơl gơ noar atbồ. Broă lơh bơh yàng ờ ngan Hà Mòn dê neh lơh gơlik bơta pơhìn lơh gơbàn tam cah is gah jat yàng, tam cah is jơi bơtìan, lơh gơ rềng tus rài kis bơh 2, 3 mpồl làng bol jơi bơtìan kòn cau dùl êt nă cau tàm càr dê.

Thượng tướng Lương Tam Quang, Thứ trưởng Ƀộ Kwang àng jàu Ƀằng khen bơh Ƀộ trưởng Ƀộ Kwang àng dê ai ală mpồl cau mờ cau dùl nă să in

Đơs tàm pơrjum tơn jơh broă lơh dră wơl sơrbì jơh yàng ờ ngan Hà Mòn tàm càr Kon Tum, Thượng tướng Lương Tam Quang, Ủy viên Đảng dà lơgar, Thứ trưởng Ƀộ Kwang àng đơs niam bơta kuơ dờng màng bơh pơrjum dê. Thứ trưởng Lương Tam Quang đơs là, bơh mờng chài dră wơl sơrbì jơh yàng ờ ngan Hà Mòn bơh càr Kon Tum dê geh ai geh ă broă rơndap lơh, bơta kươmàng, bơta tờm, là bơnàng jă ngan ngồn kơ̆ kơljap ngan nàng pơgồp bơnah sang sơrbì ală yàng ờ ngan, yàng krơi is, ală mpồl lơh broă tìs mờ adat boh lam tàm tiah jơi bơtìan kòn cau dùl êt nă cau ndrờm bè do tàm gùt lơgar: “Bơh bơta ngan ngồn lơh broă dră wơl sơrbì jơh yàng ờ ngan Hà Mòn tàm ală nam pa do tàm càr Kon Tum neh ai gŏ: tŭ lơi kâp ủy, gơ noar atbồ, ngan là cau lam bồ tơnguh nùs nhơm geh kơ nòl, sền gròi đơng lam, pơlam, ngui ring bal ală broă lơh, hòi jà bơta pràn tơrgùm bal bơh ală anih lơh broă cíñ trị mờ ală rơnàng làng bol dê, bơta lơh bal bơh ală kâp, ală gah broă lơh dê tềng đap bơta đơng lam tơl làm tơn bơh kâp ủy Đảng dê, tàm hơ̆ mpồl kwang àng geh gơ noar broă tờm ngan den bơta kal ke bè lơngăp lơngai ờdo ờdă hơ̆ sồng gơtùi bơsong jơh, lơh gơlik bơnàng jă kơ̆ kơljap jŏ jòng sùm ai bơtàu tơnguh lơh sa- mpồl bơtìan in mờ sơ lơ̆u wơl bơtàu tơnguh lơh sa- mpồl bơtìan kung là bơta pràn nàng gàr niam lơngăp lơngai dà lơgar mờ sền gàr lơngăp lơngai”.

Bơh cồng nha 23 nam đơng lam, kơ̆ nùs, kơ̆ dơn dră wơl sơrbì jơh yàng ờ ngan Hà Mòn, Tỉñ ủy Kon Tum đal git kơ òl broă tờm tàm tơngai tus là Rơcang lài sơndră, kơryan geh cồng nha, ờ lời gơlik geh bơta bơtàu tơnguh wơl, lơh broă wơl bơh yàng ờ ngan Hà Mòn dê. Cih dờp ală cồng nha jak ngan bơh ală mpồl cau, cau dùl nă să dê tàm broă lơh dră wơl sơrbì jơh yàng ờ ngan Hà Mòn, pơgồp bơnah sền gàr lơngăp lơngai dà lơgar mờ gàr niam ring lơngai ờdo ờdă mpồl bơtìan tàm càr Kon Tum, di dơ̆ do, Ƀộ trưởng Ƀộ Kwang àng neh pà Ƀằng khen ai 5 mpồl cau mờ 12 nă cau dùl nă să in; Củ tịc Ủy ƀan Ñân zân càr Kon Tum pà Ƀằng khen ai 3 mpồl cau mờ 5 nă cau dùl nă să in.

          Cau cih Khoa Điềm – Cau mblàng K’Duẩn