VOV4.K’ho- Ai jơnau đơs tàm Jơnau rơcăng cih Adat Kă bro Ƀảo hiểm (tam gơl), ală kwang bàng sồr ờ gŏ di pơn jăt tai tă mờ tơmŭt tàm Kes priă sền gàr cau geh ƀảo hiểm cih tàm jơnau rơcăng cih Adat. Mơya, Ƀộ Tài cíñ den kung gam sồr gàr nàng Dà lơgar in rơcăng lài tus bal sền gàr gơnoar kwơ bơh cau blơi dê.

Adat Kă bro Ƀảo hiểm gam geh ngui tŭ do mờ Jơnau rơcăng cih Adat Kă bro ƀảo hiểm (tam gơl) geh cih bè Kes priă ơn prăp pal geh mờ Kes priă Sền gàr cau geh ƀảo hiểm. Jơnau kờñ lơh bơh 2 Kes priă do dê ndrờm kơlôi tus sền gàr kơnòl bơh mpồl lơh sa kă bro ƀảo hiểm dê tŭ roh bơta pràn tơm priă, pơgồp bơnah sền gàr cau blơi ƀảo hiểm. Ală kwang bàng kung đơs là, jơnau rơcăng cih Adat kă bro ƀảo hiểm (tam gơl) pal gàr niam rlau gơnoar kwơ bơh cau blơi ƀảo hiểm dê. Ală mpồl lơh sa kă bro lơh broă gah kă bro ƀảo hiểm pal nền cê rlau tàm broă sền gàr gơnoar kwơ bơh cau blơi ƀảo hiểm dê. Cih nền cê kơnòl bơh ală mpồl lơh sa kă bro lơh broă gah kă bro ƀảo hiểm dê tàm broă ngui jơnau yal tơngĭt cau dùl nă să is bơh cau blơi ƀảo hiểm dê.

Cau mblàng Lơ Mu K’Yến