VOV4.K’ho- Pa do, Kwang đơng lam bồ Đảng mờ dà lơgar neh geh dơ̆ tìp mat Kwang bàng Quôk hội là cau jơi bơtiàn kòn cau dùl êt nă cau khóa 15. Đơs tàm dơ̆ tìp mat, Củ tịc Quôk hội ồng Vương Đình Huệ kơp kờñ mờ pin dờn là, tơl nă kwang bàng Quôk hội jơi bơtiàn kòn cau dùl êt nă cau ngai sơlơ pơn đơl pràn, lơh ngan nàng lơh gơs niam ngan rlau jơh kơnòm broă he dê, sùm lơh ngan, dipal mờ bơta pin dờn, kờñ gơboh, bơta kơp kơnờm bơh cau tĕ khà gùt lơgar dê, kuơmàng là làng bol, cau tĕ khà tiah jơi bơtiàn kòn cau dùl êt nă cau mờ tiah kơh bơnơm.

Dơ̆ tìp mat

Củ tịc Quôk hội ồng Vương Đình Huệ đơs nền, Đảng mờ Dà lơgar sùm ờ tam gơl git nền tam klac dờng ală jơi bơtiàn kòn cau geh gơtha kuơmàng ngan gơwèt tus mờ dà lơgar he, dùl dà lơgar tơrgùm dùl bơh 54 jơi bơtiàn kòn cau oh mi dê ơm kis bal, lòt bal mờ gơp tàm tŭ tơngai bơt bơtàu dà lơgar mờ sền gàr dà lơgar tàm jơh gùt tŭ tơngai kah yau bơh jơi bơtiàn dê mờ sùm ờ tam gơl broă bơt bơtàu broă lơh tam klac dờng jơi bơtiàn, jat bơta ring bal, tam klac, ki ngàm mờ tàm dong kờl bal mờ gơp bơtàu tơnguh. Ală broă lơh dong kờl geh gơ rềng tus làng bol jơi bơtiàn kòn cau dùl êt nă cau, geh đơs nền tàm jơh ală sră cih Sơnua boh lam bơh lơgar Kộng hòa xã hội củ nghĩa Việt Nam dê. Ală nam do, neh geh uă gùng dà, broă lơh dong kờl bơtàu tơnguh lơh sa- mpồl bơtiàn gơ wèt tus mờ tiah jơi bơtiàn kòn cau dùl êt nă cau mờ tiah kơh bơnơm, rài kis phan bơna, nùs nhơm bơh làng bol jơi bơtiàn kòn cau dùl êt nă cau dê hời rơ hời geh bơtàu tơnguh, lơh tam gơl muh mat tiah jơi bơtiàn kòn cau dùl êt nă cau mờ tiah kơh bơnơm.

Bulah bè hơ̆, tài bơta sơn đờm lơyah, ù tiah lơh sa kal ke, ngài mờ tiah tờm, trồ tiah ờ niam, sùm pal kong gơ rềng jơnau gơ lời wơl bơh tam gơl trồ tiah dê, rơndap sap sèng phan bơna gam ờ tơl, siơ̆u siar. Den tàng tŭ do, tiah jơi bơtiàn kòn cau dùl êt nă cau mờ tiah kơh bơnơm kung gam là tiah lơyài bơtàu tơnguh rlau, priă lơh geh kờp bal bơh cau jơi bơtiàn kòn cau dùl êt nă cau dê lơyah rlau mờ khà kờp bal bơh gùt lơgar dê, geh jơnau pơhìn yah ngài gơ lin ngai sơlơ uă.

Củ tịc Quôk hội ồng Vương Đình Huệ đơs tàm dơ̆ tìp mat

Bơh nùs nhơm ală Nghị quyết bơh dà lơgar dê, ngai 18/11/2019, Quôk hội neh ai tơlik Nghị quyết sồ 88 ring bal Rơndap broă tơrgùm jơh ală bơta bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 20230, đơs loh gùng dà: “Ală broă lơh dong kờl bơtàu tơnguh lơh sa- mpồl bơtiàn, sền gàr dà lơgar, sền gàr lơngap lơngai tiah jơi bơtiàn kòn cau dùl êt nă cau mờ tiah kơh bơnơm pal wil tơl, wèt tus jơnau kờñ bơtàu tơnguh kơ̆ kơljap jŏ jòng sùm mờ ngui sùm bơta ƀuơn, bơta pràn bơh tiah do dê mờ nùs nhơm brồ guh is bơh làng bol jơi bơtiàn kòn cau dùl êt nă cau dê” bal mờ ală jơnau kờñ ngan ngồn mờ kơp kơnờm, lơh ngan cíñ trị uă ngan.

Nàng gơtùi lơh geh ală jơnau kờñ mờ jơnau sồr jal mhar tŭ do, Củ tịc Quôk hội ồng Vương Đình Huệ sồr ală kwang bàng Quôk hội đơs bal, ngan là Hội đồng Zân tộk mờ ală kwang bàng là cau jơi bơtiàn kòn cau dùl êt nă cau khóa 15 bulah là lơh broă sùm halà at tơn gơnoar broă tàm ală mpồl pal sền gròi, pơgồp bơnah bal mờ Quôk hội tơrgùm jat sền, nàng anih lơh broă geh gơnoar geh gơ rềng in lam lơh geh cồng nha 2, 3 kơnòl broă tờm: “Rơcang lài, jơh nùs mờ sơbac mhar rlau tai tàm broă rơcang lài bơt bơtàu broă rơndap lơh jat sền, nàng anih lơh broă geh gơnoar in lam lơh jat di nùs nhơm Nghị quyết bơh Quôk hội dê, pơn jat tai tơnguh niam nùs nhơm brồ guh is, tàm kờñ gơboh, dong kờl bal mờ gơp, tam pà bal mờ gơp đah ală jơi bơtiàn kòn cau, đah ală tiah, bơta tus bal jơh nùs, geh cồng nha bơh ală mpồl lơh sa kă bro mờ làng bol jơi bơtiàn kòn cau dùl êt nă cau dê, sơlơ tơnguh mpồl tam klac dờng jơh gùt jơi bơtiàn. Kwang bàng Quôk hội jơi bơtiàn kòn cau dùl êt nă cau pal pơn jat tai tơnguh rlau tai jơnau git wă bè broă lơh kòn cau gơ wèt tus mờ kwang bàng, kâp ủy, gơnoar atbồ, mặt trận, mpồl cau ală kâp tàm ală anih lơh broă cíñ trị, lam lơh niam broă lơh ring bal, tam klac, ki ngàm, dong kờl bal mờ gơp bơtàu tơnguh, tơnguh jơnau rơcang ngac mờ kơryan ală kai sơmờm broă kòn cau, tam cah is mpồl tam klac dờng jơh gùt jơi bơtiàn; bơsong nú nhơm bàs sìl kòn cau”.

Củ tịc Quôk hội ồng Vương Đình Huệ kơp kờñ ală kwang bàng Quôk hội là cau jơi bơtiàn kòn cau dùl êt nă cau jơh nùs kơlôi sơnơng, ai tơlik mờ lam lơhjat ngan ngồn gùng dà, broă lơh, bơta dong kờl kòn cau bơh Đảng mờ dà lơgar he dê gơs ală broă lơh, jơnau kờñ, kơnòl broă ngan ngồn; sền gròi kơ cế, broă lơh gàr niam lam lơh geh cồng nha ală gùng dà, broă lơh bơh dà lơgar dê tàm tiah kơh bơnơm, tiah nhàr dà lơgar, tiah jơi bơtiàn kòn cau dùl êt nă cau; tơrgùm bơt bơtàu tiah jơi bơtiàn kòn cau dùl êt nă cau mờ tiah kơh bơnơm bơtàu tơnguh mhar bè lơh sa, niam chài, mpồl bơtiàn, pràn kơldang, kơ̆ kơljap bè sền gàr lơngăp lơngai, sền gàr dà lơgar, mut gơ rờm bal mờ bơta bơtàu tơnguh bal bơh gùt lơgar dê, dipal mờ gơnoar broă kuơmàng bơh dà lơgar dê.

Củ tịc Quôk hội sồr ală kwang bàng Quôk hội là cau jơi bơtiàn kòn cau dùl êt nă cau tơrgùm ai tơlik jơnau đơs bơt bơtàu, tam gơl, bơtơl ală broă lơh adat boh lam di mờ bơta geh ngan mờ jơnau sồr tơnguh bơcri priă, ai lài bơtàu tơnguh tiah jơi bơtiàn kòn cau dùl êt nă cau mờ tiah kơh bơnơm, tiah nhàr dà lơgar in; kuơmàng là sền gròi tus broă lơh dong kờl bơtàu tơnguh lơh sa, tơnguh niam rài kis, bơtàu tơnguh broă lơh bơto bơsram, kwang bàng cau jơi bơtiàn kòn cau dùl êt nă cau; broă lơh dong kờl bơto broă lơh, ai geh broă lơh, gàr ờdo ờdă rài kis mpồl bơtiàn, bơtàu tơnguh kơ̆ kơljap; pơgồp bal bơtàu tơnguh lơh sa- mpồl bơtiàn mờ sền gàr tiah ơm kis brê bơnơm; bơtàu tơnguh lơh sa- mpồl bơtiàn mờ sền gàr lơngăp lơngai- sền gàr dà lơgar; bơt bơtàu ƀòn lơgar pa; lơh gơlik phan bơna ai broă lơh tam gơl pa dà lơgar; sền gàr mờ bơtàu tơnguh niam chài bơh jŏ niam bơnĕ tàm mpồl bơtiàn ală jơi bơtiàn kòn cau Việt Nam.

Cau mblàng K’Duẩn