VOV4.K’ho- Tàm ƀòn dờng Hồ Chí Minh, Ủy ƀan Thường vụ Quôk hội pa bơyai lơh Pơrjum tơn jơh broă lơh Hội đồng Ñân zân ală càr, ƀòn dờng tiah đah jum dà lơgar nam 2021 mờ lam lơh broă rơndap lơh nam 2022. Tus bal pơrjum geh rlau 160 nă kwang bàng là kwang đơng lam bồ Hội đồng Ñân zân, ală Mpồl kwang bàng Quôk hội bơh 20 càr, ƀòn dờng tiah đah jum dà lơgar. Đơs pơn dut pơrjum, Củ tịc Quôk hội ồng Vương Đình Huệ đơs tus 8 broă pal gròi sền.

Nàng broă lơh bơh Hội đồng Ñân zân dê geh cồng nha tàm tơngai tus, tàm pơrjrum, ală kwang bàng neh ai tơlik uă mờng chài kung bè ală jơnau đơs, jơnau dan mờ Quôk hội. Jat Phó Củ tịc Hội đồng Ñân zân càr Vĩnh Long ồng Nguyễn Minh Dũng đơs, Ủy ƀan Thường vụ Quôk hội pal gờñ ai tơlik jơnau cih bal bè quy cế lơh broă bơh Hội đồng Ñân zân dê nàng ală tiah in rơcang lài, ngac ngar tàm broă bơt bơtàu quy cế lơh broă bơh kâp he dê dipal mờ bơta geh ngan: “Ủy ƀan Thường vụ Quôk hội pal ai tơlik kơ cế gròi sền broă bơsong jơnau đơs bơh cau tĕ khà dê ngan ngồn mờ loh làng rlau. Broă bơsong jơnau yal yă, yal khài den adat boh lam neh geh cih wil tơl bloh, mơya cê tài gơ wèt tus mờ broă bơsong jơnau đơs den ờ hềt geh jơnau cih nàng lơh niam. Mùl màl tŭ do tàm 2, 3 anih lơh broă bơsong lơyài ngan, cau ờ ring bal, uă broă geh tơrgùm đơs tàm dơ̆ pơrjum do, mơya geh tŭ tus pơrjum tơnơ̆ hơ̆ sồng geh sră nggal hơ wơl, lơyài ngan”.

Đơs pơn dut pơrjum, Củ tịc Quôk hội ồng Vương Đình Huệ đơs niam broă lơh bơh ală anih lơh broă làng bol pồ dê, tàm nam 2021 là dùl nam kuơmàng ngan, nam sơn rờp lam lơh jat Nghị quyết pơrjum dờng Đảng gùt lơgar dơ̆ 13, nam bơyai lơh tĕ khà kwang bàng Quôk hội, Hội đồng Ñân zân ală kâp mờ kuơmàng là nam geh uă kal ke tài gơ rềng kơn jơ̆ kơn jut ngan bơh kòp dờng Kovid-19 dê: “Ndrờm bè geh dùl bơta pa niam rlau, ngac ngar, bơceh pa rlau, lơh jat bơta geh ngan bơh rài kis dê uă rlau, drơng ală jơnau kờñ jal mhar ngan bơh anih lơh broă làng bol pồ kấp hơ đơm dê mờ pơgồp bơnah kuơmàng ngan bal mờ jơh gùt anih lơh broă cíñ trị, tềng đap bơta đơng pơlam bơh Đảng dê, lam lơh jat Nghị quyết pơrjum dờng Đảng gùt lơgar, Nghị quyết pơrjum dờng Đảng ƀộ ală càr, ƀòn dờng, pơgồp bơnah bal mờ gùt lơgar lam lơh niam kơnòl dơ̆ lĕ bal, ờ mìng rơcang sơndră kòp Kovid-19 geh cồng nha mờ gam gàr sùm broă lơh sa mờ ală broă bè ờs ndai mờ bơtàu tơnguh wơl lơh sa- mpồl bơtiàn”.

Củ tịc Quôk hội ồng Vương Đình Huệ đơs pơn dut pơrjum

Bơdìh mờ broă bơyai lơh 2 dơ̆ pơrjum ờs mờng, uă càr, ƀòn dờng bơyai lơh pơrjum nisơna nàng lơh nền uă tơngume kuơmàng bè broă lơh rơcang sơndră kòp Kovid-19 jat nùs nhơm Nghị quyết 30 bơh Quôk hội khóa 15 dê mờ kơnòl broă bơtàu tơnguh lơh sa- mpồl bơtiàn tàm ù tiah càr, ƀòn dờng he dê. Hội đồng Ñân zân kâp càr neh ai tơlik uă Nghị quyết lơh gơlik bơnàng jă adat boh lam kuơmàng ai broă lam lơh ală kơnòl broă bơtàu tơnguh lơh sa- mpồl bơtiàn in, rơcang sơndră kòp Kovid-19. Kuơmàng, geh uă tiah lơh gơs ală tơngume lơh broă ai jơh gùt tơngai lơh broă in.

Bè gùng dà, kơnòl broă mờ ală broă lơh nam 2022 bơh Hội đồng Ñân zân càr, ƀòn dờng dê, Củ tịc Quôk hội ồng Vương Đình huệ neh ai tơlik 8 broă pal gròi sền, tàm hơ̆ sồr, pơn jat tai pơlam lơh jat, git loh gơnap gơnoar, kơnòl broă bơh Hội đồng Ñân zân dê geh cih tàm Adat mpồl duh broă gơnoar atbồ kâp hơ đơm. Pơn jat tai kờp sền, bơt bơtàu halà lơh sir mờ lam lơh rơndap broă pơn jat tai tam gơl pa, tơnguh cồng nha, bơta niam lơh broă bơh Hội đồng Ñân zân ală kâp dê ngan là kâp càr. Bơt bơtàu rơndap broă bal ai 5 nam in, tơl broă lơh ngan ngồn. Lam lơh niam ngan rlau jơh broă bơt bơtàu gơnoar atbồ bè broă lơh kwangbàng bè ai sră pin dờn gơnoar broă, đùh sră pin dờn gơnoar broă; lơh nền ală broă kuơmàng tàm ală gah mờ gròi sền broă lơh jat Sơnua boh lam mờ adat boh lam tàm kấp hơ đơm, gròi sền sră nggal pơlam lơh jat jơnau cih adat boh lam bơh Ủy ƀan Ñân zân dùl kâp bal mờ sră nggal bơh Hội đồng Ñân zân kơnhoàl dê. Củ tịc Quôk hội ồng Vương Đình Huệ đơs nền: “Hội đồng Ñân zân ală càr, ƀòn dờng pal di tŭ ai tơlik ală Nghị quyết nàng lam lơh jat mờ gròi sền broă lơh jat ală Nghị quyết bơh Quôk hội, Cíñ phủ dê bè bơtàu tơnguh lơh sa- mpồl bơtiàn, priă jền- kes priă, bơcri priă dà lơgar nam 2022, ală broă lơh jơnau kờñ dà lơgar, ngan là Broă lơh rơcang sơndră kòp Kovid-19 tơngai bơh nam 2022 tus nam 2023 jat jơnau đơs gơ dờp ờdo ờdă, ngac ngar, gròi sền geh cồng nha kòp Kovid-19 mờ Broă lơh bơtàu tơnguh wơl lơh sa- mpồl bơtiàn. Lam lơh ngan ngồn, geh broă lơh dong kờl bơ tơl pal gròi sền 2 broă lơh do mờ ală Nghị quyết bè lơh sa- mpồl bơtiàn bơh Quôk hội, Cíñ phủ mờ jơnau pơn dut bơh Đảng dà lơgar dê”.

Củ tịc Quôk hội ồng Vương Đình Huệ cùp rùp kir sơnrai

Củ tịc Quôk hội ồng Vương Đình Huệ sồr Hội đồng Ñân zân ală càr, ƀòn dờng sơlơ tơnguh broă lơh yal tơnggit, mblàng yal mờ ngui kông nghệ thông tin drơng broă lơh Hội đồng Ñân zân dê in bè là ală dơ̆ pơrjum ờ geh sră pơ àr, pờ tê ring bal tàm điện tử bơh ngài tài tam gơl sồ, gròi sền mờ rùp hin; pơn jat tai kờp sền, lơh sir mờ lam lơh niam quy cế pơgồp bal đah Mpồl kwang bàng Quôk hội mờ Hội đồng Ñân zân, Thường trựk Hội đồng Ñân zân, ală Ƀan bơh Hội đồng Ñân zân dê mờ Ủy ƀan Ñân zân, Mặt trận dà lơgar Việt Nam càr, ƀòn dờng nàng tơnguh cồng nha lơh broă bơh tơl anih lơh broă, mpồl bal dê. Mờ kung lam lơh niam Quy cế lơh broă bơh Thường trựk Hội đồng Ñân zân càr dê; Quy cế wă làng bol bơh Thường trựk Hội đồng Ñân zân càr, kwang bàng Hội đồng Ñân zân càr dê; tơngume pơrjum Hội đồng Ñân zân càr nàng gàr niam kơrnuat tơrgùm làng bol lơh tờm mờ tơnguh gơnoar broă, bồ tơngoh jak bơh mpồl bal dê.

Củ tịc Quôk hội ồng Vương Đình Huệ pà git, Ủy ƀan Thường vụ Quôk hội pơn jat tai lơh loh tơngume, lơh sir ală sră nggal pơlam lơh jat mờ gròi sền broă lơh bơh Hội đồng Ñân zân dê.

Cau mblàng K’Duẩn