Tàm càr Thái Nguyên geh 52 jơi bơtiàn kòn cau dùl êt nă cau, geh tus mờr 30% khà kờp làng bol jơh gùt càr. Ală nam do, bal mờ ală broă dong kờl kòn cau bơh Dà lơgar dê ai lơh jăt, càr Thái Nguyên là dùl tàm ală tiah gờñ lơh mờ geh uă broă lơh dong kờl krơi is ai tiah làng bol kòn cau dùl êt nă cau mờ tiah kơh bơnơm in. Bơh hơ̆ nàng kờñ bơtàu tơnguh lơh sa- mpồl bơtiàn, tơrmù ƀà bơta ờ ndrờm bal đah làng bol ală jơi bơtiàn tàm tiah sar lơgar ngài mờ ală tiah ndai tàm càr.

Lồi nam 2020, mờr 50 hìu bơnhă làng bol ƀòn Cao Biền, xã Phú Thượng, kơnhoàl Võ Nhai hơ̆ sồng geh gùng che đèng dà lơgar. Cao Biền kung là ƀòn dŭt ndơl tàm càr tơn jơh geh jơnau ờ geh đèng. Bơta do neh tơngŏ cồng nha Rơndăp broă lơh lơh đèng ƀòn lơgar càr Thái Nguyên, tơngai bơh nam 2016- 2020. Bi Triệu Thị Sinh ơm tàm ƀòn Cao Biền, xã Phú Thượng, kơnhoàl Võ Nhai, yal: Lài do, ngui đèng bơh hìu măy pờ tơlik ồs đèng dềt mìng nàng pờ àng gời lơm ờ gơtùi ngui tùh mrềt. Bơh tŭ geh đèng añ gŏ gơlơh niam ngan, chờ hờp ngan blơi tơn tùh mrềt nàng prăp phan sa.

Ồng Triệu Phúc Tiến, Kwang ătbồ ƀòn Cao Biền, xã Phú Thượng, kơnhoàl Võ Nhai, yal: Geh Đảng, Dà lơgar lơh đèng rê tus ƀòn Cao Biền bol añ chờ hờp ngan. Do là bơta kơ̆p kờñ sùm bơh nđờ jơ̆t nam do bơh làng bol tàm tiah do dê.

Ờ mìng geh đèng lơm, dùl ròt ală broă lơh dong kờl kòn cau krơi is ndai kung neh geh càr Thái Nguyên lơh mờ lam lơh, bè: Broă lơh dong kờl boh i ốt nàng kơryan kòp bòm ngko, bồ tơngoh seh ờ ngar; Broă lơh bơtàu tơnguh lơh sa- mpồl bơtiàn tiah ATK mờ tiah jơi bơtiàn kòn cau dùl êt nă cau kal ke ir; Rơndăp broă lơh Prăp gàr, bơtàu tơnguh bơta niam chài ală jơi bơtiàn kòn cau càr Thái Nguyên tus nam 2020....Ồng Lý Văn Mùa, Ƀí thư Ci ƀộ ƀòn Lũng Luông, xã Thượng Nung, kơnhoàl Võ Nhai, sền gŏ bè do: Bơh ală broă lơh kung dong làng bol klàs bơh rƀah, ai tơl bơta dong làng bol bơtàu tơnguh lơh sa, kung bè bơ̆t bơtàu ală bơhiàn niam chài bơh làng bol, bơh ƀòn lơgar dê.

Pa do, Kơrnoăt sồ 39 bơh Ủy ƀan Ñân zân càr Thái Nguyên dê “Cih tiah rơcăng mpồl kwang bàng ai ală jơi bơtiàn kòn cau in gơwèt cau sac rwah cau bơsram tàm ală hìu bơsram kòn cau ơm sa tơn tàm tiah do dê”, kung là dùl broă lơh krơi is neh di tŭ tă bơsong kal ke tŭ jơnau cih pa bàr pe xã, thôn ƀòn gơwèt thôn ƀòn kal ke ngan neh geh gơmù. Ồng Nguyễn Thái Nam, Phó Kwang ătbồ Mpồl Hòi jà làng bol Tỉn ủy, lài do là Kwang ătbồ Mpồl lơh broă jơi bơtiàn kòn cau càr Thái Nguyên, pà gĭt: Pơrjum dờng Đảng ƀộ càr Thái Nguyên geh broă jàu kwơmàng, lơh ngan 8% oh kòn jơi bơtiàn kòn cau dùl êt nă cau geh bơsram tàm ală hìu bơsram kòn cau ơm sa tơn. Bơh Kơrnoăt 39 gah bơto bơtê càr Thái Nguyên neh rwah sền bal tơl broă jàu rwah kơnòm bơsram.

Dilah bè nam 2016, càr Thái Nguyên gam 48 xã kal ke uă ir den tus jơh nam 2021, mìng gam 14 xã (gơmù 70%), khà hìu bơnhă rƀah tiah kòn cau dùl êt nă cau mờ tiah kơh bơnơm gơmù kờp bal 3% pah nam. Jơh nam 2021, jơh gùt càr Thái Nguyên geh 73 tàm 100 xã tiah làng bol kòn cau dùl êt nă cau mờ tiah kơh bơnơm lơh jơh tơl broă jàu bơ̆t bơtàu ƀòn lơgar pa, gơguh tus 3 dơ̆ kờp bal bơh gùt lơgar dê. Ală khà sồ niam ngan do pà gŏ cồng nha bơh ală broă lơh dong kờl kòn cau krơi is, geh ngan, gơlik bơh bơta geh ngan, gùng dà broă lơh kơrnoăt boh lam di tŭ tàm càr Thái Nguyên.