Bơta ơruh pơnu kòn cau dùl ết nă cau lòt lơh broă tiah ngài ngai sơlơ uă neh gơrềng ờ dùl ết tus broă lơh jat broă lơh bơtàu tơnguh lơh sa- mpồl bơtiàn tàm ală kơnhoàl tiah kơh bơnơm càr Nghệ An. Den tàng bè hơ̆, lơh geh broă lơh ai ơruh pơnu kòn cau dùl ết nă cau in tŭ do pal geh lơh uă rlau mờ lơh pràn rlau tai.   

Tàm sră cih mat atbồ, đoàn xã yal kơnhoàl Kỳ Sơn geh rlau 421 nă đoàn viên ơruh pơnu, mơya bơta geh ngan, pah tŭ lam lơh dùl ròt broă tờm lam lài den khà ơruh pơnu geh tơrgùm mìng geh mờr nggùl lơm,  den tàng, đoàn xã gơtìp uă ngan bơta kal ke nàng lơh geh cồng nha bè jơnau sồr geh ai. Bi Lương Văn Tạc, Ƀí thư đoàn xã Phà Đánh, kơnhoàl Kỳ Sơn, càr Nghệ An, đơs: Lòt lơh ală broă lơh ơruh pơnu, bơnah broă ơruh pơnu pah nam dê den tơrgùm ơruh pơnu kung ờ geh uă sơl tài bơh ơruh pơnu lòt lơh broă tiah ngài jơh lơm mờ dơ̆ sa tềp dà lơgar hơ̆ sồng khi rê tơrgùm uă wơl.

Bơta bè xã neh yal tŭ do gam gơlik tàm jơh ală kơnhoàl tiah đah mat tơngai mŭt càr Nghệ An dê. Broă do ờ mìng lơh gơlik geh bơta ờ tơl mpồl cau lơh broă tàm ală srơh bơh đoàn ơruh pơnu dê, tàm broă tơn jơh jơgloh tơrmù rƀah tàm tiah sar lơgar ngài lơm mờ gam gơrềng ờ dùl ết tàm broă bơtàu tơnguh đảng viên là làng bol kòn cau dùl ết nă cau. Bi Nguyễn Đình Thuận, Ƀí thư huyện đoàn Quỳ Hợp, càr Nghệ An, đơs: Khà ơruh pơnu ơm wơl tàm ƀòn lơgar ết ngan gơrềng tus broă tơrgùm ơruh pơnu tàm mpồl kung bè tàm broă lơh jat srơh tàm ù tiah do dê.

Ai bi Lữ Thị Băng Châu, Ƀí thư huyện đoàn Con Cuông, càr Nghệ An, đơs: Bơta kơlôi sơnơng kung bè bơta gĭt wă bơh ơruh pơnu dê gơwèt mờ ală bơta gĭt wă bè bơtàu tơnguh lơh sa den gam ờ hoan uă, den tàng bè hơ̆ ală broă lơh ơruh pơnu bơtàu tơnguh lơh sa den gam rah rài, ờ uă mờ cồng nha ờ hềt uă.

Wèt tus jơnau kờñ bơsong broă lơh ai ơruh pơnu kòn cau dùl ết nă cau in, kấp ủy, gơnoar atbồ ală kấp mờ mpồl đoàn tàm Nghệ An neh lơh uă broă lơh, rơndap broă lơh dong kờl ơruh pơnu kòn cau tàm tiah do halà ơruh pơnu rê wơl tàm ƀòn lơgar sơnđờm mŭt lơh broă, lơh broă bơtàu tơnguh lơh sa, hời rơ hời lơh pas tàm ƀòn lơgar. Bi Vi Thái Thuận, Ƀí thư huyện đoàn Kỳ Sơn, càr Nghệ An pà gĭt: Ƀan cấp hàñ đoàn lơh jat niam ală bơta pràn nàng dong kờl ai ơruh pơnu tàm broă sơnđờm mŭt lơh broă. Bơdìh hơ̆ den Ƀan cấp hàñ huyện đoàn geh pơn jat tai sền gròi, pơgồp bal mờ ală gah, sơnah lơh broă pờ ală ơdŭ bơto bơtê broă lơh, bơto bơtê broă lơh lơyah tơngai kung bè jŏ tơngai, den hơ̆ sồng pờ ală ơdŭ bơto pơlam tàm jàu bơta chài ngui măy mok pa ai đoàn viên ơruh pơnu in nàng dong ai đoàn viên ơruh pơnu in sơnđờm mŭt lơh broă.

Nam 2016, bi Mong Văn Sơn lơh nền rê wơl tàm ƀòn Phà Khảo, càn priă bơh Ngân hàng cíñ sác xã hội, Ngân hàng Nông nghiệp, bơcri priă ròng rơpu, kơnrồ. Bơh chờm, bơh 1 nơm rơpu mờ 3 nơm kơnrồ den geh tai gơnoar atbồ xã Phà Đánh dong kờl lơh tiah ròng lềng ơnàng 3 lồ, tus tŭ do bi neh geh 1 suơn dờng ròng phan pah nam lơh geh priă jền rlau 100 tơlak đong. Mờ bơta tryang tryồng, pơnđơl pràn lơh ngan, bi Mong Văn Sơn gơ gơs broă lơh ơruh pơnu lơh sa jak bơh ƀòn Phà Khảo dê kung bè làng bol kòn cau Khơ Mú ơm tàm kơnhoàl Kỳ Sơn. Bi Mong Văn Sơn chờ hờp đơs:

Oh bơcri priă ròng rơpu, kơn rồ, gah đoàn den kung dong kờl bè càn priă mờ gah ơruh pơnu mŭt lơh broă geh pờ ală ơdŭ bơto pơlam tàp bè bơta chài ròng phan mờ sền gròi phan ròng. Oh kung bơsram bè bơta chài ròng kơn rồ, rơpu den oh neh mŭt ngui tàm broă ròng phan.

Nàng lam lơh ală rơndap broă lơh dong kờl ơruh pơnu kòn cau dùl ết nă cau, tàm tơrbŏ lơh geh broă lơh ai ơruh pơnu bơtàu tơnguh lơh sa kung bè pơgồp bơnah lơh broă lơh tơn jơh jơgloh, tơrmù rƀah tàm tiah do kung bè lơh gơ kờñ mờ lơh jat niam nùs nhơm lam lơh lài khin cha kơlôi, khin cha lơh, khin cha sơnđờm mut lơh broă bơh mpồl ơruh pơnu dê geh gơtha kwơ màng ngan. Gơwèt mờ đoàn xã Minh Hợp, kơnhoàl Quỳ Hợp, dong kờl lơh bal, lơh geh broă lơh ai ơruh pơnu kòn cau dùl ết nă cau geh sền gĭt là dùl tàm ală kơnòl broă kwơ màng tàm srơh ơruh pơnu sơnđờm mut lơh broă bơh mpồl đoàn dê. Bơdìh mờ lơh ală broă lơh đoàn xã Minh Hợp tơrgùm lam lơh broă lơh tam gơl rơndap tap sèng wơl lơh sa tàm đoàn viên, ơruh pơnu, bơh hơ̆ pơgồp bơnah tàm broă lơh jat Nghị quyết Pơrjum dờng Đảng bộ xã dê tơngai lơh broă bơh nam 2020-2025.

Tŭ neh geh broă lơh dong kờl di tŭ, geh dong kờl bè jơnau lơh broă sa bè bơta gĭt wă den ơruh pơnu kòn cau dùl ết nă cau geh pơnđơl pràn lơh ngan ờ mìng lik klàs rƀah, brồ guh lơh pas ai hìu bơnhă in lơm mờ gam gơ gơs là dùl mpồl cau tờm ngan pơgồp bơnah tàm broă lơh jat ală broă lơh bơtàu tơnguh lơh sa- mpồl bơtiàn bơh tiah do dê.