VOV4.K’ho - Drim òr (20/09), tàm Hà Nội, Mpồl cau ùr Việt Nam bơyai lơh pơrjum lơh jăt rơndăp broă sồ 08 bè “Lơh jăt jơnau ring bal cau klao mờ cau ùr mờ bơsong ală broă jal mhar gơwèt mờ cau ùr mờ kơnòm dềt” tơngai sơnrờp bơh nam 2021 tus 2025.

Lơh jăt rơndăp broă “Lơh jăt jơnau ring bal cau klao mờ cau ùr mờ bơsong broă jal mhar gơwèt mờ cau ùr bal mờ kơnòm dềt”

Rơndăp broă geh tàm jơnau kờñ dà lơgar tơnguh bơtàu lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030. Rơndăp broă “Lơh jăt jơnau ring bal cau klao mờ cau ùr mờ bơsong ală broă jal mhar gơwèt mờ cau ùr mờ kơnòm dềt” sền kwơ 4 tơngu me, tàm hơ̆ geh: Lam sồr, tam gơl “bồ tơngoh kơlôi sơnơng, broă lơh” tơn jơh ală jơnau ờ niam, broă geh ai cau klao mờ cau ùr tàm hìu nhă bal mờ mpồl bơtiàn, ală bơhiàn chài rơgơi ờ niam mờ ờ uă mpồl bơtiàn jal mhar gơwèt mờ cau ùr bal mờ kơnòm dềt; Bơ̆t bơtàu mờ lơh geh uă ală broă lơh tơnguh uă gơnoar lơh sa ai cau ùr in, chồl pràn broă ring bal cau klao mờ cau ùr; Gàr niam jơnau đơs bal mờ broă tus bal mùl màl bơh cau ùr mờ kơnòm dềt tàm ală broă tơnguh bơtàu lơh sa mpồl bơtiàn, sền gròi mờ jơnau bơh mpồl bơtiàn, tơnguh uă bơta pràn ai kwang bàng cau ùr kòn cau in. Mờ tơnguh uă bơta pràn lơh jăt broă pơgồp bal cau klao mờ cau ùr ai kwang bàng tàm mpồl lơh broă cíñ trị mờ kra ƀòn, kwang atbồ ƀòn, cau geh bơngă pin dờn tàm mpồl bơtiàn. Tàm tơngai bơh nam 2021 tus 2025, rơndăp broă sồ 8 geh ai lơh 9 rơbô Mpồl yal tơngit mpồl bơtiàn; 3 rơbô pang sră tềm pềr priă ai càn ƀòn lơgar in; 1 rơbô anih pin dờn mpồl bơtiàn; 1 rơbô 800 mpồl đơng lam bơh broă tam gơl geh gơguh ha là crơng gơs pa tàm mpồl bơtiàn...

Cau mblàng Ndong Brawl