VOV4.K’ho- Dùl broă geh cau tĕ khà sền gròi ngan tàm poh lài hơ̆ là broă dơ̆ sơn rờp Ủy ƀan Thường vụ Quôk hội ai jơnau đơs tàm Rơndap lơh Adat ù tiah (tam gơl). Do là dùl rơndap lơh adat dờng, geh kuơ dờng màng ngan, gơ rềng uă ngan tus uă gah rài kis lơh sa- mpồl bơtiàn bơh dà lơgar dê. Tàm pơrjum, Ủy ƀan Thường vụ Quôk hội sồr lơh loh broă ai wơl ù nàng bơtàu tơnguh lơh sa- mpồl bơtiàn tài bơta kuơ dà lơgar, mpồl bơtiàn. Mờ kung sồr gròi sền tus kơrnuat priă jền bè ù tiah, kuơmàng là rơcang sơndră bơta ờ niam, kờñ ai geh kuơ tàm tŭ bơt bơtàu adat boh lam.

Củ ñiệm Ủy ƀan sền gàr adat boh lam mò Lê Thị Nga 

Broă tam gơl Adat Ù tiah nàng kờñ lơh sir kơrnuat boh lam, broă lơh bè ù tiah; bơsong bơta gơ tàm rơndap rơndồl, ờ ring bal tàm ală broă lơh, adat boh lam gơ rềng tus ù tiah. Gàr niam ring bal gơnoar mờ bơta kuơ bơh dà lơgar, cau ngui ù mờ cau bơcri priă dê. Loh làng, niam bơnĕ drà kă bro ù tiah, hìu đam. Mờ kung tơnguh bơta làng bol lơh tờm, tơrmù ƀà bơta yal yă yal khài bè ù tiah.

Tàm pơrjum, Củ ñiệm Ủy ƀan sền gàr adat boh lam mò Lê Thị Nga sồr đal git loh ală tơl khà, bơta pal geh gơ wèt broă dà lơgar ai wơl ù nàng bơtàu tơnguh lơh sa- mpồl bơtiàn tài bơta kuơ dà lơgar, mpồl bơtiàn nàng pleh sơ mờm, ai wơl ù bu ba, ờ di mờ bơta geh ngan, gàr niam gơnoar kuơ dipal bơh cau geh ù gơtìp ai wơl dê. Kuơmàng ai wơl nàng lam lơh ală rơndap broă lơh tiah drà, hìu ơm tac bro: “Tàm bơta do den pal ngui kơrnuat ring bal is đah làng bol mờ mpồl lơh sa kă bro jat di jơnau sồr tàm Nghị quyết sồ 18. Nghị quyết sồ 18 cih pơn jat tai lam lơh jat kơrnuat ring bal is đah làng bol mờ mpồl lơh sa kă bro tàm broă tac bro ù nàng lam lơh ală rơndap broă lơh tiah drà, hìu ơm tac bro. Broă do ờ tơmut tàm broă ai wơl ù mờ nàng kờñ geh kơrnuat ring bal đah làng bol mờ mpồl lơh sa kă bro”.

Củ tịc Quôk hội ồng Vương Đình Huệ sồr tàm tŭ bơt bơtàu adat boh lam pal tam cah loh làng gơ rềng ù tiah cèng bơta dà lơgar mờ dùl nă să is

Mblàng lơh loh tàm pơrjum, Ƀộ trưởng Ƀộ Tài nguyên mờ Môi trường ồng Trần Hồng Hà pà git gam bơt bơtàu tơl khà gơ wèt mờ broă dà lơgar ai wơl ù nàng bơtàu tơnguh lơh sa- mpồl bơtiàn tài bơta kuơ dà lơgar, mpồl bơtiàn, dilah ờ gơtùi cribơyai den geh broă lơh yal tơnggit loh làng: “Bol hi git là broă lơh yal tơnggit den ờ hềt dipal. Dơ̆ 2 là kơrnuat boh lam cih bè lơi nàng wă bơta kuơ dà lơgar, bơta kuơ mpồl bơtiàn den pal pơn jat tai kơlôi sơnơng gàr niam tơngume do gơ in loh làng rlau. Bơta do bol hi dan cih dờp, geh pơn jattai lời tŭ jơ nàng kơlôi sơnơng. Mờ ală broă nàng bol he pơn jat tai ai tơlik tơngume bè bơta kuơ dà lơgar, mpồl bơtiàn. Pơn yơu bè tŭ do nàng lơh gơlik khà ù drơng ai broă lơh gùng lòt nàng ai wơl, nàng lơh gơlik bơta pràn gơtùi sac rơ wah khà priă mờ ai bơta ƀuơn ù tiah do nàng bơtàu tơnguh tai phan bơna gùng lòt”.

Đơs tàm pơrjum, Củ tịc Quôk hội ồng Vương Đình Huệ đơs nền, Jơnau rơcang cih Rơndap ù tiah (tam gơl) là rơndap lơh adat kuơmàng ngan, geh gơ rềng uă ngan tus bơtàu tơnguh lơh sa- mpồl bơtiàn. Đơs niam broă rơcang lài rơndap lơh adat, Củ tịc Quôk hội tơngkah anih cih gơs pal pơn jat tai kờp sền nền nòn, gàr niam gơnoar mờ bơta kuơ bơh jơh ală gah dê. Kuơmàng, rơcang sơndră bơta ờ niam, kờñ ai geh bơta kuơ tŭ bơt bơtàu adat boh lam: “Tam gơl, bơ tơl ală jơnau cih nàng bơsong ală kòl yan, ờ niam tàm bơta geh ngan, mơya pal gàr bơta tơrgùm jơh ală bơta kuơmàng jŏ jòng. Bañ lơh gơs dipal ală broă lơh tìs tŭ do ai tơmut tàm rơndap lơh adat boh lam. Rơcang sơndră bơta ờ niam, kờñ ai geh bơta kuơ tàm tŭ bơt bơtàu adat boh lam mờ ală broă gơlik geh tàm bơta geh ngan mơya cèng bơta jat kàl, cèng bơta gơlik geh, dềt, rah rài, krơi is bơh 2, 3 broă tàm tiah lơi hơ̆ dê. Bơh bơta kuơ dà lơgar, jơi bơtiàn, bơta kuơ mpồl bơtiàn dê, bơta kuơ mpồl lơh sa kă bro dê, bơta kuơ bơh làng bol dê, gơnoar mờ bơta kuơ dipal bơh tơl nă cau tờm dê”.

Do là rơndap lơh adat ai jơnau đơs dơ̆ sơn rờp, kờp dŭ geh yal Quôk hội sền sơ wì, ai jơnau đơs dơ̆ sơn rờp tàm pơrjum dơ̆ 4 tus mờ geh sền sơ wì, ring bal tơnơ̆ 3 dơ̆ pơrjum. Rơndap lơh Adat ù tiah (tam gơl) do geh lơh gơs kơrnuat bơh lam Nghị quyết sồ 18 bơh Ƀan Cấp hàñ Đảng dà lơgar bè pơn jat tai tam gơl pa, lơh sir kơrnuat boh lam, broă lơh, tơnguh cồng nha atbồ mờ ngui ù, lơh gơlik bơta pràn lam lơgar he gơ gơs lơgar bơtàu tơnguh geh priă jền lơh geh uă.

Cau mblàng K’Duẩn