VOV4.K’ho- Đơs tàm dơ̆ bơyai lơh tơngkah 67 nam Ngai cau lơh sơnơm Việt Nam (27/02), Thủ tướng Cíñ phủ ồng Phạm Minh Chính đơs loh, broă lơh sơnơm là dùl broă kuơmàng mờ broă lơh gròi sền, sền gàr pràn kơldang să jan làng bol ngai sơlơ niam rlau sùm là bơta geh gròi sền lài ngan, là bơta kơlôi rơcang bơh kwang đơng lam bồ Đảng, dà lơgar he dê.

Thủ tướng Cíñ phủ ồng Phạm Minh Chính

Cíñ phủ sồr ală Ƀộ, gah broă lơh mhar kơlôi sơnơng, ai tơlik broă lơh dong kờl krơi is gơ wèt tus mờ cau lơh sơnơm, bơsong ală bơta ờ niam, lơh gơlik bơta ƀuơn nàng kham mờ sơm kòp ai làng bol in. Bol he gam uă broă pal lơh nàng drơng niam rlau tai bơta kơp kơnờm bơh làng bol dê. Làng bol kơp kờñ ală anih kham sơm kòp sàng goh rlau, ngac ngar rlau, ƀuơn rlau; khà priă sơm kòp, sơnơm sơm kòp, siñ phẩm, phan lơh sơnơm geh atbồ niam rlau, loh làng, song dơpă rlau; kơ cế, broă lơh dong kờl ƀảo hiểm y tế, ƀảo hiểm xã hội dipal mờ geh cồng nha rlau.

Cau mblàng K’Duẩn