VOV4.K’ho- Lam lơh broă lơh ai càn priă dong kờl jat Broă lơh bơtàu tơnguh wơl mờ bơtàu tơnguh lơh sa mpồl bơtiàn jat Nghị quyết sồ 11 ngai 30/01/2022 bơh Cíñ phủ dê, pa do, sơnĕ Ngân hàng cíñ sác xã hội ală càr tàm tiah Tây Nguyên neh bơyai lơh ală dơ̆ lơh broă, sền sơ wì sră nggan nàng di tŭ tă priă càn tus tê làng bol.

Pa geh Ngân hàng Cíñ sác xã hội ai càn khà priă 50 tơlak đông, bi Săn ơm tàm tàm ƀòn Piơm, thị trấn Đăk Đoa, kơnhoàl Đăk Đoa pà git, bi geh ngui priă do nàng tam pa wơl 1 lồ kơphe bơh bồ kàl mìu do tơn. Nàng geh càn priă dong kờl priă cồng, bi neh yal mờ mpồl ai càn priă mờ tềm pềr ƀòn dê nàng pơyua jơnau đơs bơta kơp kờñ mờ ngân hàng. Tơnơ̆ hơ̆, kwang bàng ngân hàng neh mù tàm suơn, iat bi Săn yal bè broă rơndap lơh tam pa wơl suơn chi he dê: “Añ chờ hờp ngan tŭ geh càn 50 tơlak đông nàng geh priă bơcri tàm bă kơphe do. Dùl êt priă den añ lời wơl blơi phơng sih nàng sơngka sền gàr tờm kơphe in gơs niam. Do là broă lơh gơlik priă jền tờm ngan hìu bơnhă dê den tàng añ geh lơh ngan nàng gơ in geh cồng nha”.

Ai gơwèt mờ bi Nguyễn Hoàng Linh ơm tàm thôn 1, thị trấn Đăk Đoa, kơnhoàl Đăk Đoa den priă càn 400 tơlak đông mờ priă cồng ai càn lơyah tàm pơgap 20 nam neh dong bi gơtùi lơh bơta kơp kờñ he dê là geh dùl nơm hìu ơm kơ̆ kơljap. Ùr bơklau bi geh tềm pềr priă jền tă dơ̆ ngui mờ jòi broă lơh tai nàng geh priă tơm dồs lài mờ tơngai pơrgon: “10 nam do ơm ơpah, geh hìu he dê den chờ hờp ngan. Khà priă cồng ai càn pah nhai lơyah, tơngai tơm dồs jŏ jòng, den tàng 2 nă ùr bơklau añ kung jơngkah dùl êt đau, gàr tơl priă tơm priă cồng mờ priă tờm pah nhai, gàr niam tơm dồs lài mờ tơngai hơ pơrgon”.

Lam lơh Broă lơh bơtàu tơnguh wơl mờ bơtàu tơnguh lơh sa- mpồl bơtiàn jat Nghị quyết sồ 11 ngai 30/01/2022 bơh Cíñ phủ dê, dơ̆ do, Ngân hàng Cíñ sác xã hội càr Gia Lai geh tam pà rlau 100 tơmàn đông nàng lam lơh 3 broă lơh: Ai càn dong kờl broă lơh; ai càn gơ wèt tus mờ kơnòm bơsram, cau bơsram dờng mờ ai càn bè hìu ơm mpồl bơtiàn. Tŭ do, ală tiah gam mhar lam lơh nàng di tŭ ai priă càn dong kờl priă cồng tus mờ làng bol. Ồng Nguyễn Văn Ngọc, Kwang atbồ Cơldŭ lơh sră càn priă Ngân hàng Cíñ sác xã hội kơnhoàl Đăk Đoa, càr Gia Lai pà git: “Jơnau kờñ là dong làng bol geh priă bơcri nàng bơtàu tơnguh lơh sa, gàr kơ̆ kơljap rài kis, bơtàu tơnguh wơl broă lơh sa. Tơnơ̆ tŭ tă priă càn, he geh lòt sền broă ngui priă càn bơh làng bol dê di mờ jơnau kờñ halà ờ; pơgồp bal mờ ală mpồl, gah broă lơh mờ ală mpồl bal, mpồl cau sùm sền sơ wì, jat sền broă ngui priă càn, nàng git gŏ ală broă gơlik geh, pleh hoàc huơr priă càn”.

Bi Săn geh dờp priă càn tàm lồi nhai 4 pa do nàng tam pa wơl kơphe

Bal mờ Gia Lai, lồi nhai 4 pa do, sơnĕ Ngân hàng Cíñ sác xã hội ală càr tàm tiah Tây Nguyên neh lam lơh tă priă càn dong kờl jat Nghị quyết sồ 11 bơh Cíñ phủ dê bè Broă lơh bơtàu tơnguh wơl mờ bơtàu tơnguh lơh sa- mpồl bơtiàn. Mùl màl, tàm càr Dăk Lăk neh tă geh mờr 5 tơmàn đông ai ală cau sơn rờp in càn. Tàm hơ̆ geh 83 nă cau càn priă broă lơh dong kờl ai geh broă lơh, gàr sùm mờ rề ơnàng broă lơh mờ kờp jơh priă ai càn rlau 4 tơmàn 200 tơlak đông. Jat broă rơndap lơh, càr Dăk Lăk geh dà lơgar tam pà rlau 71 tơmàn đông nàng lam lơh 3 tàm 5 broă lơh ai càn priă dong kờl priă cồng jat Nghị quyết sồ 11 bơh Cíñ phủ dê, tàm hơ̆: ai càn dong kờl ai geh broă lơh, gàr sùm mờ rề ơnàng broă lơh là 50 tơmàn đông; ai càn hìu ơm mpồl bơtiàn là 20 tơmàn đông... Tàm Lâm Đồng, sơnĕ Ngân hàng Cíñ sác xã hội càr kung neh lam lơh tă priă càn dơ̆ sơn rờp ală broă lơh ai càn priă dong kờl jat Nghị quyết sồ 11 bơh Cíñ phủ dê. Hơ̆ là broă lơh ai càn priă dong kờl ai geh broă lơh, gàr sùm mờ rề ơnàng broă lơh ai 50 nă cau lơh broă in mờ kờp jơh khà priă mờr 3 tơmàn đông tàm 2 cơldŭ lơh sră càn priă Ngân hàng Cíñ sác xã hội kơnhoàl Di Linh mờ Đam Rông. Cau geh càn priă uă ngan là ală cau lơh broă rê wơl bơh ală tiah drà dờng tơnơ̆ gơ rềng bơh kòp Kovid-19, cau càn priă nàng jòi broă lơh gàr kơ̆ kơljap rài kis. Tơngai lài, Ngân hàng cíñ sác xã hội càr Lâm Đồng neh tă priă càn ai 15 mpồl lơh sa kă bro tơm priă nhai ơm ờ lơh broă ai rlau 4 rbô 600 nă cau lơh broă in mờ kờp jơh priă ai càn rlau 18 tơmàn đông.

Broă lam lơh broă lơh ai càn priă dong kờl ai geh broă lơh, gàr sùm mờ rề ơnàng broă lơh jat Nghị quyết sồ 11 bơh Cíñ phủ dê neh lơh jat jơnau kờñ bơh uă ngan làng bol gơtìp kal ke tài bơh kòp Kovid-19 mờ kờñ bơtàu tơnguh wơl, bơtàu tơnguh lơh sa mpồl bơtiàn.

Cau mblàng K’Duẩn