VOV4.K’ho- Tàm kơrnuat sồ 08 tơlik ngai 28/3, Cíñ phủ lơh nền dong kờl tơl nă cau 500 rbô đông pah nhai, tơngai dong kờl uă ngan rlau jơh là 3 nhai gơ wèt tus mờ cau lơh broă tàm mpồl lơh sa kă bro tàm anih lơh sa mờ măi mok, khu cế xuất halà anih lơh sa kuơmàng gam ơm ơpah bơh ngai 01/2 tus ngai 30/6.

Ồng Vũ Trọng Bình, Kwang atbồ Kụk broă lơh (Ƀộ Lao động, Thương ƀiñ mờ Xã hội) pà git, khat dùl nă cau lơh broă lơi gam lơh broă tàm ală mpồl lơh sa kă bro, anih tac bro phan, lơh sa mờ geh kĭ sră pơrgon lơh broă bơh 1 nhai rlau hơđang, mờ kung gam ơm ơpah, geh gơ wèt cau geh dờp bơnah dong kờl do, ờ tam cah là sră pơrgon tơrlòng lơh broă halà lơh broă ngan ngồn. Kung jat ồng Bình đơs, kờp dŭ, bơnah dong kờl jat kơrnuat sồ 08 bơh Cíñ phủ dê bè dong kờl priă ơpah hìu ai cau lơh broă in geh gơ rềng tus 3 tơlak 500 rbô nă cau mờ kờp jơh khà priă geh kes priă tă là 6 rbô 600 tơmàn đông.

Cau mblàng K’Duẩn