VOV4.K’ho- Drim ngai 08/03, Mpồl lơh broă bơh Mpồl duh broă Jơi bơtiàn kòn cau Quôk hội dê bơh Phó Củ tịc Mpồl duh broă Jơi bơtiàn kòn cau Quôk hội dê là mò Cao Thị Xuân lơh kwang ătbồ mpồl neh geh dơ̆ lơh broă mờ Ủy ƀan Ñân zân càr Dăk Lăk nàng kờñ sền swì bơta gơrềng bè sac rwah gĭt nền tiah jơi bơtiàn kòn cau dùl êt nă cau jăt bồ tơngoh bơtàu tơnguh pa do tus broă lơh jăt broă dong kờl jơi bơtiàn kòn cau tàm càr.

Mò Cao Thị Xuân đơs tàm dơ̆ lơh broă

Jăt jơnau cih pa, tàm tơngai bơh nam 2021- 2025, càr Dăk Lăk geh 54 xã tiah III, 5 xã tiah II, 71 xã tiah I, 519 thôn kal ke uă ngan gơwèt tiah làng bol jơi bơtiàn kòn cau dùl êt nă cau mờ tiah kơh bơnơm. Bè hơ̆, jơh gùt càr geh 54 xã ờ gam gơwèt tiah làng bol jơi bơtiàn kòn cau dùl êt nă cau mờ tiah kơh bơnơm, 4 xã lik bơh tiah kal ke uă ngan mờ 143 thôn, ƀòn kal ke uă ngan ờ gam tai là thôn, ƀòn kal ke uă ngan. Ală broă dong kờl ờdo ờdă rài kis mpồl bơtiàn gam lơh tàm ù tiah ală xã, thôn pa yal geh ờ geh pơn jăt tai lơh. Tàm dơ̆ lơh broă, ală kwang bàng neh cribơyai bè cồng nha lơh jăt broă dong kờl ờdo ờdă rài kis mpồl bơtiàn tàm ală xã, thôn, ƀòn kal ke uă ngan tiah jơi bơtiàn kòn cau dùl êt nă cau mờ tiah kơh bơnơm, tơngai bơh nam 2016- 2022; sền swì bơh gơrềng bơh Kơrnoăt pa dê tŭ lơh jăt tàm ù tiah do.

Bơh hơ̆, dan Mpồl duh broă Jơi bơtiàn kòn cau dan mờ Quôk hội kĭ ring bal gùng dà bơcri priă broă lơh dong kờl krơi is gơwèt mờ ală xã, thôn, ƀòn klàs bơh tiah kal ke uă ngan tàm tơngai bơh nam 2021- 2025 mờ lơh sa- mpồl bơtiàn gam kal ke; ai gơnoar pơn jăt tai lơh ală broă dong kờl nàng gàr niam ờdo ờdă rài kis mpồl bơtiàn.

Cau mblàng Lơ Mu K’Yến