VOV4.K’ho- Poh lài, mpồl kwang bàng gròi sền tơngume bơh Mpồl kwang bàng Quôk hội càr Dăk Lăk dê neh lam lơh gròi sền tàm Sở Tài nguyên mờ Môi trường bè broă lam lơh broă lơh, adat boh lam bè lam lơh ngan ngồn tềm pềr, sơndră hoàc huơr. Tàm dơ̆ lơh broă, mpồl kwang bàng gròi sền neh sồr Sở do lơh loh 2, 3 tơngume kuơmàng, tàm hơ̆ geh broă gơguh kas khà priă tac bro ù tàm càr tàm tơngai rềp ndo, lơh gơbàn jơnau gơ lời wơl jŏ jòng.

Tềng đap broă khà priă ù gơguh kas nisơna, lơh gơlik bơta gơguh kas khà priă tac bro ù tàm tơngai lài tàm ală tiah rơcang lam lơh ală rơndap broă lơh dờng tàm ƀòn dờng Buôn Ma Thuột mờ ală kơnhoàl rềp bal lơh làng bol ờ gơtùi iang nùs lơh broă, lơh sa. Kuơmàng, uă cau jơi bơtiàn kòn cau dùl êt nă cau neh tac jơh ù tiah lơh sa he dê. Mpồl kwang bàng gròi sền kơlôi rơcang bè bơta broă lơh kơ̆ kơljap sùm mờ atbồ geh cồng nha ù tiah. Mò Nguyễn Thị Xuân, Mpồl kwang bàng Quôk hội càr Dăk Lăk đơs: “Ală nam lài, càr sền gròi ngan tus broă lơh ngan đơng lam broă ai ù ơm, ù lơh sa ai làng bol jơi bơtiàn kòn cau dùl êt nă cau in. Bulah bè hơ̆, bơh dơ̆ gơguh khà priă tac bro ù ờ ngan bè tŭ do den tơnơ̆ 2, 3 nam tai den geh lơh gơbàn jơnau gơ lời wơl ờ niam là làng bol ờ tơl ù ơm, ù lơh sa. Tŭ hơ̆, bol he ai ù bơh lơi nàng pà làng bol in”.

Jta ồng Trần Đình Nhụân, Kwang atbồ Sở Tài nguyên mờ Môi trường càr Dăk Lăk đơs, 3 nhai bồ nam 2022, khà tac bro ù tiah tàm càr gơguh uă nisơna mờ 103 rbô dơ̆, gơguh mờr 200% pơndrờm mờ bal dùl tŭ nam lài. Khà priă ù kung gơguh jơnhua pơndrờm mờ quý 4 nam 2021. Geh bơta ntrờn, tam gơl dờng ngan bè cau mờ jơnau kờñ, làng bol bơh ƀòn dờng Hồ Chí Minh, Hà Nội rê tiah kềng gah ƀòn dờng Buôn Ma Thuột nàng tơrgùm blơi ù ơm. Ồng Nhuận kung dờp ală bơta ờ niam tàm broă lơh atbồ ù tiah, ngan là broă ai gơnoar tam gơl jơnau kờñ ngui ù tàm jơh bal ală tiah ờ geh tơl phan bơna, ai cau ờ geh jơnau kờñ lơh hìu ơm in. Bơdìh hơ̆ tai, adat boh lam bè ù tiah gam ờ niam, broă tam gơl jơnau kờñ ngui ù ai làng bol in lơh hìu ơm ờ cih bè khà nền nòn, ờ cih bè bơta pal jat, jơnau cih khà priă ù bơh dà lơgar dê cih ờ ndrờm mờ khà priă tàm drà kă bro...

Mpồl Kwang bàng Quôk hội càr Dăk Lăk lơh broă mờ Sở Tài nguyên mờ Môi trường Dăk Lăk

Broă gơguh kas khà priă ù neh lơh gơlik 4 jơnau ờ niam gơ lời wơl, geh: Kal ke tàm broă lam lơh mờ atbồ rơndap ù tiah, ai ù; priă tơm wơl, lah yă; ờ ring bal gơguh uă; hoàc huơr kes priă in tŭ tac bro ù tiah. Uă ngan làng bol jơi bơtiàn kòn cau dùl êt nă cau sền gŏ khà priă ù gơguh kas den tac ù hơ̆ sồng ngui priă geh cồng nha, roh ù lơh sa, roh broă lơh... Tềng đap bơta geh ngan do, Sở Tài nguyên mờ Môi trường neh geh sră nggal tă pơgồp jơnau đơs Ủy ƀan Ñan zân càr đơng lam ală kơnhoàl gròi sền nền nòn broă tam gơl jơnau kờñ ngui ù. Ồng Trần Đình Nhuận đơs: “Bol hi tă pơgồp jơnau đơs uă sră nggal nàng lơh niam, đơng lam ală kơnhoàl gròi sền nền nòn broă tam gơl jơnau kờñ ngui ù, mìng ai tam gơl jơnau kờñ ngui gơ wèt tus mờ ù lơh sa suơn sre bơrlŭ tàm ƀòn làng bol ơm kis neh geh phan bơna mờ ai cau ngan ngồn geh jơnau kờñ in. Ai tàm tiah rềp bal rơndap ù tiah lơh tiah drà pa, ƀòn lơgar pa pal jat rơndap broă geh ring bal mờ jat jơnau cih adat boh lam”.

Kwang atbồ Sở Tài nguyên mờ Môi trường càr Dăk Lăk ồng Trần Đình Nhuận kung mblàng lơh loh geh 6 jơnau lơh gơguh kas khà priă bè: Gơ rềng bơh rơndap ù tiah ngui ù tơngai bơh nam 2021 tus nam 2030, gơ rềng bơh ală rơndap broă lơh dờng geh dà lơgar bơcri priă, gơ rềng bơh bơtàu tơnguh rơndap ù tiah tiah drà, gơ rềng bơh kòp Kovid-19, roh bơngă khà priă, bơta ờ ring bal mờ nùs nhơm kờñ jat khà uă. Bơdìh hơ̆ tai, cau bơcri priă sền gròi tus khà tiah ơm kis niam bơh càr dê nàng lơh hìu kuơ̆ gơlang ơm rlô să.

Tơngai lài, Ủy ƀan Ñân zân càr Dăk Lăk kung neh geh uă sră nggal đơng lam, kờp bal mờ jàu ai anih kwang àng in lơh loh ală jơnau yal tơnggit jơnau tiơng pơn rơ tơnguh khà priă ù gơguh kas nisơna nàng kờñ sa priă cồng. Sồr Ủy ƀan Ñân zân kơnhoàl, ƀòn dờng sền gròi nền nòn broă tam gơl jơnau kờñ ngui ù. Pơn jat tai sồr tam gơl khà lơh nền tam cah bă ù lơh sa suơn sre jat gùng dà tàm ƀòn dờng den bơh 1 sàu rlau hơđang, kơnhoàl den bơh 2 sàu rlau hơđang. Bal mờ hơ̆, jàu ală sở, gah broă lơh geh gơ rềng kơlôi sơnơng nàng khà priă ù mờ dà lơgar ai tơlik di mờ khà priă tàm drà kă bro, kông cứng tac bro ù pal di mờ bơta geh ngan...

Mpồl kwang bàng Quôk hội càr Dăk Lăk sồr, Sở Tài nguyên mờ Môi trường càr Dăk Lăk sơlơ tơnguh broă mblàng yal, bơto bơtê adat boh lam nàng lam lơh ngan ngồn tềm pềr, sơndră hoàc huơr geh cồng nha. Mờ kung sền gròi tus broă atbồ kes priă dà lơgar, cau lơh broă, phan bơna, jơtài di mờ jơnau sồr; gàr niam tơnhàu, ngui ală phan kuơ geh is bè ù tiah, phan kuơ tàm ù, dà geh cồng nha, kơ̆ kơljap jŏ jòng sùm.

Cau mblàng K’Duẩn