VOV4.K’ho- Ală ngai do, mpồl ling ling klàng gam geh mat tàm ală tiah tàm tiah tàm gùl lơgar mờ Tây Nguyên nàng dong làng bol sơndră mờ mìu càl rbŭt dờng sồ 4. Gĭt nđờ nă kwang bàng, cau ling neh tus ală tiah ƀuơn gơbàn aniai,  cèng bal ală rơndeh rơndồ, măy măy, phan bơna nàng dong kờl làng bol căng, lơh kơ̆ kơljap  wơl hìu đam; tơnhào phan tam lơyah ngai mờ ntrờn làng bol, phan bơna lik bơh tiah ngòt rơngơ̆t.

 Lơh jat jơnau sồr bơh Quân khu 5 dê, Gah đơng lam mpồl ling klàng càr Gia Lai neh sồr 17 Mpồl đơng lam ling klàng kơnhoàl, thị xã, ƀòn dờng, ai mpồl ling, rơndeh rơndồ, măy mok geh mat tàm ală tiah ƀuơn gơtìp aniai ngan rlau jơh tàm ù tiah do dê nàng rcang sơndră mờ mìu càl rbŭt dờng sồ 4 jat jơnau đơs “4 dùl bă tiah”.

Tàm ù tiah càr dê neh geh mìu di mơ, mìu dờng tus mìu dờng ngan; bơta pơhìn gơlik geh dà kŏ dà cò tàm ală dà dờng, dà croh mờ tơrlah ù, ñcùn ù tàm ală xã, sơnah ƀòn bơh ƀòn dờng Pleiku dê; bàr pe xã gơwèt ală kơnhoàl: Kbang, Krông Pa, Kông Chro, Phú Thiện mờ Chư Prông.

Tàm ù tiah kơnhoàl Ia Pa, Mpồl đơng lam ling klàng kơnhoàl neh pơgồp bal mờ ală mpồl ling ling klàng, kwang àng lơh pôs đồng tàm ù tiah do dê ai mờr 1 rơbô nă kwang bàng, cau ling lòt tàm 26 thôn, ƀòn là tiah ƀuơn gơbàn aniai bơh 6 xã bơh kơnhoàl dê pơgồp bal mờ mpồl ling tàm tiah do lơh ală mpồl, anih lơh broă rcang sơndră mờ mìu càl rơbŭt dờng; bal mờ gĭt nđờ jơ̆t nơm măy rơghị, ka nô, anih ơm ing mờ toal tang, măy pờ tơlik đèng, măy ƀồm dà; ală phan ngui sa neh gơm sin, phe, phan tĕ, phan chu.... Mơkung ai 100% kwang bàng, cau ling griăp ƀòn ală xã, thị trấn ơm lơh broă ơn tàm ală tiah.

Gĭt nđờ rơbô nă kwang bàng, cau ling phàu crong neh geh mat tàm ală tiah ƀuơn gơtìp aniai nàng pơgồp bal mờ ală mpồl căng, kìng hìu đam; tơnhào phan tam lơyah ngai mờ ntrờn làng bol, phan bơna lik bơh tiah geh bơta pơhìn aniai tus màng kis mờ phan bơna bơh làng bol dê.

Lơh jat jơnau sồr bơh Thủ tướng Cíñ phủ mờ Ƀộ Quôk phòng dê bè broă lơh rcang sơndră mìu càl rơbŭt dờng sồ 4, Ƀộ Tư lệñ Mpồl ling sền gàr tiah nhàr lơgar neh đơng lam jơh gùt mpồl ling, ngan là Mpồl ling sền gàr tiah nhàr lơgar tàm ală càr tiah tàm ngùl lơgar mờ Tây Nguyên tơrgùm uă ngan rlau jơh mpồl ling, rơndeh rơndồ, măy mok, dong kờl ală tiah rcang sơndră mờ mìu càl rơbŭt dờng sồ 4 mờ rcang bơsong jơnau gơ lời wơl tài bơh mìu càl rơbŭt dờng, dà kŏ dà cò lơh gơlik.

Jat hơ̆, tàm Dăk Lăk, Gah đơng lam mpồl ling klàng càr mờ ală mpồl ling sền gàr tiah nhàr lơgar càr dê neh lam lơh ală gùng dà broă lơh, mpồl cau, rơndeh rơndồ măy mok rcang lài rcang sơndră mờ mìu càl rbŭt dờng sồ 4 (hơ̆ là mìu càl rơbŭt dờng Noru). Ală anih lơh broă, mpồl lơh broă gơwèt Gah đơng lam Mpồl ling klàng càr dê lơh niam sùm lơh broă đơng lam, lơh broă mpồl, lơh broă sơndră wơl; bơdìh mờ mpồl lơh broă rcang lài sơndră jat jơnau sồr dê gam geh tai mpồl lơh broă rcang sơndră trồ tiah lơh aniai tàm ală kấp nàng di tŭ bơsong ală bơta gơlik geh; gàr niam jơnau tàm yal tơngĭt bal geh niam sùm nàng drơng broă đơng lam, sồr lơh rcang sơndră mờ bơta aniai tài bơh trồ tiah lơh aniai mờ lòt jòi cau gơtìp rềs àr.

Ală mpồl lam lơh jat ală broă lơh gàr niam bơta ờdo ờdă tàm tiah ơn prap phan bơna, pôs đồng, tiah măy mok, rơndeh rơndồ, broă lơh lam lơh mờ ală broă lơh bơh mpồl ling dê; lòt sền măy mok, rơndeh rơndồ, rcang phan, phan bơna rcang lài lơh kơnòl broă. Tŭ gơlik geh ală bơta do, ală anih lơh broă, mpồl Gah đơng lam ling klàng càr rcang cribơyai, dong kờl gơnoar atbồ ală tiah lơh ală broă lơh rcang sơndră, bơsong di tŭ, lơh jat jơnau đơs “4 dùl bă tiah’. Rcang mhar tus bal dong kờl ală tiah mờ làng bol rcang sơndră, bơsong jơnau gơ lời wơl bơh mìu càl rơbŭt dờng tàm ală tiah dê.

Rcang sơndră mờ mìu càl rbŭt dờng sồ 4, Gah đơng lam mpồl ling sền gàr tiah nhàr lơgar càr neh đơng lam ală Pôs đồng ling sền gàr tiah nhàr lơgar, Tiểu đoàn Pơlam tàp- Kơ động rcang lài lam lơh dùl ròt bal ală broă lơh, gùng dà broă lơh rcang dong làng bol sơndră mờ mìu càl rbŭt dờng, dà kŏ dà cò, nàng kờñ tơrmù lơyah ngan rlau jơh bơta hoàc huơr. Ù tiah tiah nhàr lơgar kơnhoàl Ea Súp, tàm hơ̆ geh ală xã Ia Lốp, Ia R’vê mờ Ea Bung geh yal lài kong uă bơta gơrềng bơh mìu càl rơbŭt dờng dê. Nàng rcang lài rcang sơndră, ală pôs đồng ling sền gàr tiah nhàr lơgar pơgồp bal mơ gơnoar atbồ ală tiah mblàng yal tus mờ làng bol bè ală bơta bè mìu càl rbŭt dờng mờ broă lơh rcang sơndră, pleh dà tih, dà kŏ dà cò. Ală mpồl lơh broă bơto pơlam làng bol broă lơh rcang sơndră mờ pleh lài bè rcang lài plung, ào soh pơrđồng, ƀè, mảng, phan pơrđồng, lơh kơ̆ kơljap wơl hìu đam; prap kơ̆ phan bơna nàng rcang mờ dà tih pơn jat tai gơguh tih uă; ai sồ điện thoại mờ tiah ơm rcang lài tàm tŭ jal mhar.

Ngan là gơwèt mờ làng bol gam lơh broă sa tàm sre, mìr tàm ală tiah lơyah, thòng, rềp ală dà dờng, dà croh, ală mpồl ling mblàng yal hòi jà làng bol rê tàm hìu, ntrờn tus tiah ơm pleh niam lơngap lơngai.

Quốc Học tơrgùm wơl- Cau mblàng K’Hạnh