VOV4.K’ho- Bulah kong uă bơta kơn jơ̆ tàm broă pờ tơlik ồs đèng tàm jơh bal khà lơh gơlik kung bè gơ rềng bơh bơta gơguh khà priă phan bơna drơng ai broă lơh gơlik ồs đèng in, mơya Tập đoàn ồs đèng Việt Nam kung hơ pơrgon gam gàr tơl ồs đèng ai rài lơh sa mờ rài kis in, mờ kung lơh jat nền nòn jơnau đơng lam bơh Cíñ phủ dê tàm broă tam pà ring ồs đèng, tơrmù ƀà ală bơnah priă tă lơh nàng ờ tơnguh khà priă tac rah rài ồs đèng tàm nam 2022 do, nàng kờñ gàr ală bơta ring bal dờng bơh rài lơh sa dê.

Dơ̆ tơnguh khà priă tac rah rài ồs đèng rềp ndo ngan rlau jơh geh Thủ tướng Cíñ phủ ring bal mờ Ƀộ Kông thương tơlik kơrnuat tam gơl khà priă tac rah rài ồs đèng kờp bal bơh ngai 20/3/2019 mờ khà gơguh 8,36% pơndrờm mờ lài hơ̆. Mùl màl, khà priă tac rah rài ồs đèng kờp bal geh tam gơl, ngui bơh nam 2019 tus tŭ do là 1 rbô 864,44 đông tàm dùl kWh đèng (ờ hềt kờp priă dia VAT).

Cau mblàng K’Duẩn