VOV4.K’ho- Ƀộ trưởng Ƀộ Nội vụ mò Phạm Thị Thanh Trà pà gĭt, nam 2022 do, jơh gùt lơgar kờñ pal bơtơl 27 rbô 850 nă cau lơh broă sa priă nhai gah lơh pơgru. Dilah ờ bơsong geh, den do geh gơ gơs là dùl bơta ờ suk bơh mpồl bơtiàn dê. Jăt tơrgùm kờp, khà cau pơgru ờ tơl tàm jơh gùt lơgar tŭ do là 94 rbô 714 nă. Jăt tàm khà ai cau pơgru kơnòm bơsram tàm ơdŭ, tŭ do, gah bơto bơtê gam ờ tơl 65 rbô 980 nă cau pơgru.

Ƀộ trưởng Ƀộ Nội vụ mò Phạm Thị Thanh Trà đơs, dilah ờ bơtơl den ờ suk ngan ai broă cau pơgru tŭ do in. Tài bơh khà kờp làng bol gơguh, geh gơguh khà kơnòm bơsram uă ngan gơwèt mờ mầm non. Uă broă gam gơkòl bơh bơto bơtê dê tŭ do kờñ pal bơsong jơh, dilah ờ den geh kal ke ngan nàng lơh geh jơnau sồr bơtàu tơnguh bơh broă lơh bơto bơtê dê. Mờr tus, Mpồl Rơndăp broă dà lơgar mờ Ƀộ Nội vụ geh tơrgùm kờp wơl khà cau pơgru nàng bơh hơ̆ Ƀộ Cíñ trị lơh nền bè broă ătbồ cau lơh broă sa priă nhai dà lơgar.

Cau mblàng Lơ Mu K’Yến