Rềp bal mờ gơl gùng nhàr dà lơgar đah lơgar Việt Nam mờ lơgar Campuchia, bàr xã Mỹ Quý Đông mờ Mỹ Quý Tây geh sền là tiah geh uă ngan cau nhơl ƀài, kơñao phan, cèng cau lòt gan nhàr dà lơgar nàng nhơl ƀài. Tềng đăp mờ bơta do, nam 2012, Pôs ling sền gàr mpồng nhàr dà lơgar Mỹ Quý Tây neh pơgồp bal mờ Mpồl đơng lam ling klàng, kwang àng kơnhoàl Đức Huệ bal mờ gơnoar atbồ bàr xã do lơh jăt broă lơh “Săp ntas klèng tiah nhàr dà lơgar”, broă lơh do lơh geh làng bol kờñ bal mờ sùm gàr nàng yal mpồl ling sền gàr tiah nhàr dà lơgar in pah tŭ geh bơta ờ niam gơlik geh.

Trung tá Cao Xuân Hiền, Cíñ trị viên, pôs ling sền gàr mpồng nhàr dà lơgar Mỹ Quý Tây, cau ling sền gàr tiah nhàr dà lơgar càr Long An pà git: “Bơh broă lam sồr den làng bol git uă ngan bơta kwơ bơh broă lơh “Săp ntas klèng tiah nhàr dà lơgar”. Bơh jơnau git wă do, làng bol neh tus bal mờ cau ling sền gàr tiah nhàr dà lơgar bal mờ ală mpồl ling ndai tus bal lơh geh cồng nha broă lơh “Săp ntas klèng tiah nhàr dà lơgar”. Bơh tŭ lơh tus tŭ do, bơta lơngăp lơngai ờ do ờ dă tàm xã geh gàr niam, ală bơta ñô bơñul, nhơl ƀài, tam lơh neh gơmù ngan”.

Tŭ sơn đờm lơh, kwang bàng cau ling sền gàr tiah nhàr dà lơgar tus bơto làng bol tàm broă jan klèng jăt mờ kơrnoăt krơi is, bơyai lơh bơsram tàp ală bơta gơlik geh nàng làng bol bal mờ ală mpồl lơh broă geh gơnoar lơh jăt di mờ gùng dà broă lơh geh ai. Bơh broă bơyai lơh bơsram tàp, làng bol git săp ntas klèng lơi là yal ồs sa bơrtoh, săp ntas klèng lơi là tam lơh ha là kơñao phan nàng geh cèng phan di pal tŭ tus bal. Ồng Võ Văn Bình kis tàm ƀòn 3, xã Mỹ Quý Đông, kơnhoàl Đức Huệ, càr Long An pà git: “Jơh ală broă gơlik geh tàm ƀòn den geh làng bol kờñ bal. Mùl màl bè tŭ geh broă gơlik geh tàm hìu nhă lơi, den săp ntas klèng hơ̆ geh jan nàng yal làng bol in tus tơrgùm bal nàng dong kờl hìu nhă hơ̆. Hơ̆ sồng broă pơgồp bal đah làng bol mờ gơnoar atbồ xã bal mờ pôs ling sền gàr tiah nhàr dà lơgar geh lơh nền nòn ngan”.

Lơh broă tàm 2 xã gam gơtìp uă bơta kal ke, uă làng bol ƀuơn ngan gơtìp cau ờ niam sơgràm, den tàng pôs ling sền gàr tiah nhàr dà lơgar Mỹ Quý Tây sùm pơgồp bal mờ mpồl kwang àng, ling klàng tàm do nàng bơyai lơh lam sồr làng bol tus bal sền gàr gùng nhàr dà lơgar, ñjrong nhàr dà lơgar bal mờ sền gàr bơta niam ờ do ờ dă tàm ƀòn, sền gàr bơta lơngăp lơngai dà lơgar. Tus tŭ do, jơh ală hìu geh ù lơh sa rềp bal mờ lơgar Campuchia ndrờm dan cih măt nàng tus bal sền gàr ñjrong nhàr dà lơgar rềp bal mờ sre, suơn hìu tờm, bơh tŭ hơ̆ bơta lơngăp lơngai tàm tiah nhàr dà lơgar rơhời geh kơl jăp, cau tìs mờ adăt boh lam neh gơmù loh làng ngan.

Gơwèt mờ làng bol kis tàm do, kwang bàng, cau ling sền gàr tiah nhàr dà lơgar Mỹ Quý Tây tŭ do neh là ală cau đềt mềr bè cau tàm hìu nhă làng bol dê. Kung kơnờm mờ hơ̆, den tàng tŭ geh gùng dà broă lơh di bơh cau ling sền gàr tiah nhàr dà lơgar dê geh lơh, den geh làng bol ring bal mờ jơh nùs bal mờ ală mpồl sền gàr tiah nhàr dà lơgar, gàr kơl jăp bơta lơngăp lơngai, gơnoar tờm ù tiah dà lơgar. Bơ̆t bơtàu gùng nhàr dà lơgar đah lơgar Việt Nam mờ lơgar Campuchia ring lơngai, tơnguh bơtàu.