Tàm ngai chờ ală kwang bàng bal mờ làng bol kis tàm thôn Đăk Tiêng Kơ Tu, xã Đăk La, kơnhoàl Đăk Hà, càr Kon Tum neh yal wơl bơhiàn jăk chài bơh Mặt trận Dà lơgar Việt Nam bơh 92 nam bơ̆t bơtàu mờ tơnguh bơtàu.

Dờp bal Dơ̆ lam sồr “Gùt làng bol tam klăc bal bơ̆t bơtàu ƀòn lơgar pa, ƀòn drà gơguh jăk” mờ Dơ̆ lam sồr “Lơh tam gơl bồ tơngoh kơlôi sơnơng, broă lơh bơh làng bol kòn cau, lơh làng bol kòn cau brồ guh sơrlèt mờ kal ke klàs rơƀah kơl jăp”, nam pa do geh 147 hìu làng bol mờ mờr 1 rơbô nă cau mìng là làng bol kòn cau Bahnar kis tàm thôn Đăk Tiêng Kơ Tu neh lơh ngan lơh broă sa, tam klăc bal, dong kờl bal nàng tơnguh bơtàu lơh sa, tơnguh rài kis. Tŭ do, gùt thôn mìng gam 3 hìu gơwèt hìu rơƀah mờ 9 hìu ndrờm mờ rơƀah; 136 hìu geh dờp hìu nhă chài rơgơi.

Ala măt kwang đơng lam Đảng, Dà lơgar, Ủy ƀan Mặt trận Dà lơgar Việt Nam Đại tướng Phan Văn Giang, Phó Ƀí thư Quân ủy Dà lơgar, Ƀộ trưởng Ƀộ Quốk phòng chờ gờm, đơs niam ală cồng nha mờ làng bol kis tàm thôn Đăk Tiêng Kơ Tu neh lơh geh. Đại tướng đơs tờm: Tam klăc bal là gùng dà, broă lơh dờng bơh Đảng mờ Wa Hồ nàng lơh nàng ngui uă ngan bơta pràn gùt jơi bơtiàn kòn cau. Neh gơs bơta mờng, bơh uă nam do, broă bơyai lơh Ngai chờ tam klăc dờng gùt làng bol tàm ală ƀòn di tơnkah Ngai crơng gơs Mặt trận Zân tộk thống nhất Việt Nam neh gơs bơta niam ờs mờng, ai broă mặt trận rê mờ mpồl bơtiàn ƀòn lơgar, wèt tus tơl hìu nhă mờ tơl nă làng bol. Ngai chờ tam klăc dờng gùt jơi bơtiàn kòn cau nam do sơlơ geh kwơ màng rơlao tơnơ̆ mờ rơlao 2 nam gơtìp gơrềng tài bơh kòp Kovid-19, mơya tềng đăp mờ broă đơng lam bơh Đảng, Dà lơgar, broă tus bal bơh ală mpồl lơh broă cíñ trị mờ broă dùl nùs tus bal bơh gùt làng bol, dà lơgar neh lơh geh ală cồng nha dờng màng tàm jơh ală gah broă.

Gơwèt mờ kơnòl tàm tơngai tus, Đại tướng Phan Văn Giang, Ƀộ trưởng Ƀộ Quốk phòng sồr càr Kon Tum, kơnhoàl Đăk Hà bal mờ làng bol kis tàm thôn Đăk Tiêng Kơ Tu pơn jăt tai ngui nùs nhơm tam klăc bal dờng lơh geh cồng nha ală jơnau kờñ tơnguh bơtàu mờ Đảng, Dà lơgar neh geh ai: “Rơcang mùl màl jơh mờ lơh geh cồng nha Nghị quyết sồ 19 bè lơh sa suơn sre, làng bol lơh broă sa mờ ƀòn lơgar tus nam 2030 mờ wèt tus nam 2045. Nghị quyết sồ 23 bơh Ƀộ Cíñ trị bè tơnguh bơtàu lơh sa mpồl bơtiàn gàr niam bơta lơngăp lơngai dà lơgar tàm Tây Nguyên wèt tus nam 2045. Bơyai lơh niam ală broă pơrlòng kờñ gơboh mờ dà lơgar bơh làng bol. Lam sồr, pơlam ală cau geh pơnrơ jăk, ală mpồl, ală cau geh pơnrơ jăk nàng lơh bơta pràn pơrlòng pa. Tus bal bơ̆t bơtàu Đảng, bơ̆t bơtàu gơnoar atbồ, bơ̆t bơtàu ală mpồl lơh broă cíñ trị, mpồl bơtiàn kloh niam, pràn kơl dang. Lơh jăt niam Dơ̆ lam sồr Gùt làng bol tam klăc bơ̆t bơtàu ƀòn lơgar pa, ƀòn drà gơguh jăk”.

Di tàm dơ̆ tus bal Ngai chờ Tam klăc dờng gùt jơi bơtiàn kòn cau mờ làng bol kis tàm thôn Đăk Tiêng Kơ Tu, ala măt kwang đơng lam Đảng, Dà lơgar, Ủy ƀan Mặt trận Dà lơgar Việt Nam, Đại tướng Phan Văn Giang, Ƀộ trưởng Ƀộ Quốk phòng pà 100 nơm hìu tam klăc dờng ai làng bol ală kòn cau càr Kon Tum in mờ kờp jơh khà 5 tơmàn đong. Đại tướng bal mờ mpồl kwang bàng lơh broă, Ủy ƀan Mặt trận Dà lơgar Việt Nam mờ càr Kon Tum kung neh pà mờr 100 pò phan ai hìu geh sră dong kờl bơh dà lơgar bal mờ hìu rơƀah tàm xã Đăk La in.

Kung tàm dơ̆ lơh broă tàm càr Kon Tum do, Đại tướng Phan Văn Giang, Ƀộ trưởng Ƀộ Quốk phòng neh tus còp, lơh broă tàm Sư đoàn 10, Quân đoàn 3. Còp mờ sền broă tàp ling tàm ală mpồl ling, Ƀộ trưởng Phan Văn Giang neh lam sồr ală kwang bàng, cau ling, tàm hơ̆ uă ngan là ală cau ling kòn cau, pal tơmù ală kal ke, ngui niam nùs nhơm tam klăc bal, tus bal bơsram tàp nàng git ngui phào crong, phan ling klàng pa.

Đại tướng Phan Văn Giang sồr kwang đơng lam ală mpồl ling pal lơh jăt nền nòn broă bơsram tàp ală gùng dà tam lơh, lơh jăt kơnòl ling klàng, sền gàr dà lơgar tàm ù tiah kwơ màng Tây Nguyên dê. Đại tướng Phan Văn Giang sồr, tàm tơngai tus, ală mpồl ling tàm Sư đoàn 10 pal pơgồp bal nền nòn mờ kấp ủy, gơnoar atbồ bal mờ ală mpồl ling tàm càr do git ală bơta ù tiah, lơh niam broă lam sồr làng bol, tus bal dong kờl làng bol tơnguh bơtàu lơh sa, tơmù rơƀah, bơ̆t bơtàu anih lơh broă cíñ trị tàm tiah do pràn kơl dang.