Tê gam pĭc ală plai kơphe neh dum, bi Y Thuyên, kis tàm ƀòn Dăk Sắk, xã Dăk Săk, kơnhoàl Dak Mil, càr Dăk Nông chờ hờp pà git, nam do kơphe geh uă plai. Suơn kơphe rơlao 1 lồ, tam bơrlŭ bal uă bơta tờm chi sa plai bè sầu riêng, ƀơ, pơnăt là cồng nha bơh broă tam gơl phan tam tàm ală nam pa do. Bi pà git, kơnờm mờ broă geh càn priă sa priă cồng ờ uă bơh ngân hàng cíñ sác xã hội tàm 6 nam lài mờ bi geh tơl pràn nàng tam gơl broă lơh sa mờ rơhời tơnguh uă rài kis. Bơh dùl tàm ală hìu gơtìp rơƀah ngan tàm ƀòn, hìu nhă bi neh klàs mờ rơƀah: “Kơnờ mờ broă geh càn priă bơh ngân hàng cíñ sác, hìu nhă añ geh priă nàng lơh sa. Rơlao 1 lồ ù tŭ do neh tam geh kơphe mờ uă bơta tờm chi sa plai, geh ờ uă phan tam neh geh plai, rài kis kung geh niam rơlao, geh tơl bơta nàng drơng gàr oh kòn in lòt bơsram. Hìu nhă añ geh lơh ngan rơlao tai nàng klàs mờ rơƀah”.

Jăt ồng Y Tơn, kwang atbồ ƀòn, cau atbồ mpồl càn priă ƀòn Dăk Sắk, xã Dăk Sắk, kơnhoàl Dăk Mil, càr Dăk Nông đơs, priă càn sa priă cồng ờ uă là bơta pràn uă ngan là làng bol tàm ƀòn geh priă lơh sa mờ tơnguh rài kis. Ƀòn geh 205 hìu den tŭ do geh tus 70 hìu rơƀah mờ 93 hìu ndrờm mờ rơƀah, geh 80%. Mờ rài kis bè do, priă càn nàng lơh sa làng bol mìng gơtùi geh càn bơh ngân hàng cíñ sác mờ jơh ală hìu gơwèt hìu rơƀah, hìu ndrờm mờ rơƀah ndrờm geh càn priă. Priă càn kung geh mpồl atbồ ƀòn, ală mpồl lơh broă tàm ƀòn bơto sồr nàng ală hìu ngui geh cồng nha tàm broă tam gơl phan tam mờ ròng rơpu, kơnrồ, sur iar. Uă hìu kơnờm mờ hơ̆ den tàng tơnguh uă priă geh, rài kis sơlơ ngai sơlơ gơguh: “Kơnờm ngân hàng cíñ sác den tàng ƀòn lơgar geh càn priă sa priă cồng ờ uă nàng tă, sền gàr kơphe, ròng kơnrồ, sur iar. Làng bol càn priă bơh ngân hàng kung ƀuơn, sră nggal lơh ƀuơn mờ kwang bàng jơh nùs bơto. Uă hìu tàm ƀòn rơhời klàs rơƀah, geh hìu lơh sa jăk gam brồ guh lơh pas tai”.

Ồng Trần Thanh Hải, Củ tịc UɃÑZ xã Dăk Sắk, kơnhoàl Dăk Mil, càr Dăk Nông pà1 git, priă càn sa priă cồng ờ uă neh pơgồp bal uă ngan nàng tơnguh uă rài kis làng bol mờ dong kờl xã bơ̆t bơtàu ƀòn lơgar pa: “Ngân hàng kung neh ai tơl bơta niam nàng jơh ală cau geh càn priă in tơn jơh jơgloh, tơmù rơƀah, tơnguh bơtàu lơh sa tàm tiah kal ke. Tus tŭ do den jơh ală cau ndrờm neh geh càn priă, rài kis làng bol kung neh gơguh uă loh làng ngan, xã kung neh geh khà ƀòn lơgar pa”.

Ồng Phạm Hoà, Kwang atbồ Ngân hàng cíñ sác xã hội kơnhoàl Dăk Mil, càr Dăk Nông pà git, đah ngân hàng mờ gơnoar broă bồ xã geh broă pơgồp bal nền nòn. Kơnờm mờ hơ̆, broă sền wơl, git ală bơta mờ ai càn priă ală hìu gơwèt hìu rơƀah, hìu ndrờm mờ rơƀah mhar ngan, di tŭ. Bal mờ hơ̆, broă tus bal tàm ală ƀòn kung geh dong kờl ai broă sền gròi priă bal mờ dong kờl hìu rơƀah niam rơlao: “Kwang bàng ai càn priă drơng lơh tàm xã neh bal mờ UɃÑZ ală xã, ală kwang atbồ ƀòn, mpồl ƀòn, ală cau atbồ mpồl ai càn priă nàng ai càn jăt khà măt mờ broă kờñ càn neh geh ai lài mờ hơ̆. Bơh priă geh ai càn, geh mpồl lơh broă dờp dong kờl kung bè ală mpồl lơh broă bơto sồr nàng làng bol in ngui priă di pal. Jăt mờ bơta geh bơh tơl hìu mờ geh bơto sồr nàng làng bol lơh sa geh cồng nha”.

Jăt Ngân hàng cíñ sác càr Dăk Nông yal, lơh jăt Nghị định sồ 78, tus tŭ do, ngân hàng do gam ai càn 18 broă ai càn priă dong kờl krơi is, gơguh 15 broă lơh pơn drờm mờ tŭ pa crơng gơs càr nam 2004. Broă lơh gơguh, ndrờm bal mờ priă ai càn kung gơguh sơl pah nam. Tus nggùl nam do, priă jơnkah dồs ai càn priă tàm Ngân hàng cíñ sác xã hội càr neh geh tus rơlao 3 rơbô 500 tơmàn đong. Bơh broă ai càn priă do, uă hìu rơƀah mờ ală cau geh sră dong kờl bơh dà lơgar ndai geh tai priă nàng bơcri tơnguh bơtàu lơh sa, brồ guh klàs mờ rơƀah kơl jăp. Tus jơh nam 2021, hìu rơƀah tàm càr Dăk Nông mìng gam 11,19%, gơmù 44,81% pơn drờm mờ nam 2004. Gùt càr geh 35 tàm 61 xã geh khà ƀòn lơgar pa. Bơh dùl càr geh khà rơƀah uă, càr Dăk Nông neh klàs mờ mpồl càr rơƀah, ờ pràn tơnguh bơtàu.