VOV4.K’ho- Bal mờ kơnòl broă sền gàr kơ̆ kơljap tiah nhàr dà lơgar bơh dà lơgar dê, uă nam do, ală cau ling cèng groăt tơlir lơh pôs tàm ù tiah ală kơnhoàl tiah kơh bơnơm càr Quảng Nam gam dong làng bol jơi bơtiàn kòn cau dùl êt nă cau bơtàu tơnguh lơh sa, tơn jơh jơgloh tơrmù rƀah. Gơ wèt mờ làng bol tiah do, kwang bàng, cau ling sền gàr tiah nhàr dà lơgar bơh jŏ neh gơ gơs là ală cau kòn bơh ƀòn dê, nùs nhơm ling klàng làng bol ngai sơlơ rềp mềr.

Nđờ nhai do, cau ling mpồl lam sồr, hòi jà làng bol, Pôs ling sền gàr tiah nhàr dà lơgar La Êê, kơnhòal Nam Giang tàm pơ dờn gơp tus hìu bi Blúp Út ơm tàm thôn Đăk Ngol, xã La Êê pơlam hìu bơnhă bi lơh wàng ròng, lam lơh broă lơh ròng sur jù bơh jŏ tàm tiah do. Bi Blúp Út pà git, lài do, hìu bơnhă bi dê gơ wèt hìu bơnhă uă kal ke bơh xã dê, rài kis kơ nờm jơh tàm sươn mìr lơm. Ờ bài kong mờ bơta jơgloh, rƀah, bi khin cha càn priă bơh Ngân hàng Cíñ sác xã hội blơi 1 yô sur sơntìl nàng ròng, mờ kung ƀĕ tơr nờm nàng ngui lơh phan siam sur in. Tềm pềr geh priă jền, bi tơnguh broă ròng sur tus 15 nơm, hơ̆ sồng gơguh tus 20 nơm. Bulah bè hơ̆, ờ geh jơnau git wă, ờ geh bơta mờng chài tàm broă ròng phan den tàng mpồl sur gơtìp kòp lơh aniai, bat dờng. Git bơta kờñ brồ guh lik klàs rƀah bơh bi Blúp Út dê, Pôs ling sền gàr tiah nhàr dà lơgar La Êê neh sồr kwang bàng, cau ling tus tàm hìu, pơlam bi bơt bơtàu broă lơh ròng sur jù bơh jŏ tàm tiah do. Ală bi dŏ blờt tê àu bal mờ hìu bơnhă bi lơh wàng ròng sàng goh, rơcang phan siam ai mpồl sur in... Bi Blúp Út yal: “Khi kung tơngkah añ là pal wàs sàng goh, tŭ tah ju siam sur in den pal jơm lài ju mờ dùl êt boh i-ot mờ kañ nàng siam sur in den sur ờ gơtìp jê ndul. Pôs ling sền gàr tiah nhàr dà lơgar La Êê kung tus tàm hìu jơh nùs dong kờl mờ tơngkah añ”.

Kwang bàng, cau ling sền gàr tiah nhàr dà lơgar càr Quảng Nam lòt bal dong làng bol bơtàu tơnguh lơh sa, tơn jơh jơgloh, tơrmù rƀah kơ̆ kơljap

Pôs ling sền gàr tiah nhàr dà lơgar La Êê kong kơ nòl atbồ rlau 35 kơi sồ gùng nhàr lơgar, gơ wèt 2 xã La Êê mờ Chơ Chun, kơnhòal Nam Giang, càr Quảng Nam. Do là 2 xã ngài ngan rlau jơh, kal ke ngan rlau jơh bơh kơnhòal Nam Giang dê, làng bol uă ngan là kòn cau Cơ Tu, Ve- Tà Riềng, rài kis gơ wèt jơh tàm sươn mìr. Lơh jat jơnau đơng lam bơh Mpồl ling sền gàr tiah nhàr dà lơgar càr Quảng Nam dê, pah nam, Đảng ủy Pôs ling sền gàr tiah nhàr dà lơgar La Êê bơt bơtàu broă rơndap lơh, sồr kwag bàng, cau ling drơng broă tàm ù tiah ƀòn lơgar, dong kờl hìu bơnhă uă kal ke lik klàs rƀah. Tàm hơ̆, tơl nă Đảng viên gơ wèt mpồl lam sồr, hòi jà làng bol dờp dong kờl bơh 5 tus 7 hìu bơnhă, kwang bàng, kwang đơng lam mpồl ling dờp dong kờl bơh 3 tus 5 hìu bơnhă. Ală broă lơh dong làng bol bơtàu tơnguh lơh sa geh Đảng ủy Pôs ling sền gàr tiah nhàr dà lơgar La Êê pơgồp bal mờ gơnoar atbồ tàm ƀòn lơgar bơt bơtàu dipal mờ bơta geh ngan bơh làng bol tiah do dê, bè: tam kòi sre, ròng sur bơh jŏ tàm tiah do, ròng iar, ơda, tam ală bơta chi sa plai bè kruac vinn, plai bung... Thiếu tá Tôn Ui, Cíñ trị viên phó Pôs ling sền gàr tiah nhàr dà lơgar La Êê, kơnhòal Nam Giang, càr Quảng Nam pà git, tàm ală nam do, tàm 2 xã La Êê mờ Chơ Chun neh geh 16 hìu bơnhă jơh rƀah bơh ală broă lơh tam phan, ròng phan bơh pôs đồng pơlam lơh: “Bol hi đal git lơh kơ̆ hời rơ hời, ờ lam lơh ur ar. Bol hi tus tơn tơl hìu bơnhă, pơlam broă bơtàu tơnguh lơh sa, tơrgùm tŭ do là ròng sur jù, iar, ơda, tam ală bơta chi tam jŏ nam, chi sa plai”.

Bơh bơta dong kờl jơh nùs bơh kwang bàng, cau ling sền gàr tiah nhàr dà lơgar dê, nam lài, tàm 2 xã La Êê mờ Chơ Chun geh 22 hìu bơnhă jơh rƀah, khà hìu bơnhă rƀah xã La Êê gơmù gam rlau 31%, xã Chơ Chun gam mờr 38%. Ồng Zơ Râm Huấn, Ƀí thư Đảng ủy xã La Êê đơs nền, ờ mìng lam lơh niam kơ nòl broă sền gàr lơngap lơngai tiah nhàr dà lơgar, kwang bàng, cau ling pôs ling sền gàr tiah nhàr dà lơgar La Êê gam là anih kơldìng kơ̆ kơljap ngan ai làng bol ală jơi bơtìan kòn cau tàm tiah kơh bơ nơm, tiah nhàr dà lơgar Nam Giang in: “Đảng ủy Pôs ling sền gàr tiah nhàr dà lơgar La Êê lam lơh broă lơh ai Đảng viên rê pơrjum tàm ală ci ƀộ thôn mờ tam pà kơ nòl sồr dong kờl ai ală hìu bơnhă in, kuơmàng là dong kờl tàm broă lơh tơn jơh jơgloh tơrmù rƀah kơ̆ kơljap. Pơlam làng bol ngui khoa họk kỹ thuật tàm broă lơh sa, ròng phan. Kuơmàng là tàm broă ròng phan, tơnguh lơh sa, tam kòi sre”.

Mpồl ling sền gàr tiah nhàr dà lơgar pơgồp bal mờ gơ noar atbồ tàm ƀòn lơgar bơt bơtàu di mờ bơta geh ngan bơh làng bol tàm tiah nhàr dà lơgar dê

Lơh jat jơnau đơs “Pôs đồng là hìu, tiah nhàr dà lơgar là ƀòn tờm, làng bol ală jơi bơtìan kòn cau là oh mi tờm pròc mhàm”, kwang bàng, cau ling Mpồl ling sền gàr tiah nhàr dà lơgar càr Quảng Nam sùm ơm rềp làng bol, ơm rềp mờ ƀòn lơgar, lòt bal dong làng bol bơtàu tơnguh lơh sa, tơn jơh jơgloh, tơrmù rƀah kơ̆ kơljap. Mpồl ling sền gàr tiah nhàr dà lơgar càr Quảng Nam kung hòi jà tă pơgồp priă jền lơh mòr 300 nơm hìu tam klac dờng, hìu ơm ai cau rƀah tàm tiah nhàr dà lơgar, bồt dà lềng bal mờ git nđờ rhiang broă lơh drơng rài kis làng bol, dong kờl git nđờ rbô nơm phan ròng 4 jơng, iar ơda mờ priă tă lơh git nđờ jơt tơmàn đông.

Cau mblàng K’Duẩn