VOV4.K’ho- Poh lài, geh lơh pơrjum dơ̆ 7 bơh Ủy ƀan Thường vụ Quôk hội dê, ai jơnau đơs tàm uă tơngume kuơmàng nàng yal Quôk hội in tàm pơrjum dơ̆ 3 geh lơh tàm nhai 5 tus do. Tàm hơ̆, broă bơ tơl “Gai lòng ơruh pơnu lam lài pơn iờ saw’ tàm rơndap lơh adat tàm pơrlòng, pà khà jờng (tam gơl) là tơngume geh ală kwang bàng mờ cau tĕ khà sền gròi ngan.

Ủy ƀan Thường vụ Quôk hội neh tơrgùm ai jơnau đơs bè 2, 3 broă dờng gam geh jơnau đơs krơi is nàng yal Quôk hội in sền sơ wì, ring bal tàm pơrjum dơ̆ 3, geh: Sền sơ wì, bơ tơl khà jờng xã pơn rơ jak, sơnah ƀòn, thị trấn pơn rơ jak; bơ tơl Gai lòng ơruh pơnu lam lài pơn iờ să; bè huy hiệu gai lòng kir sơnrai kấp càr tàm hơ̆ geh Hội đồng Ñân zân kấp càr, tơn jơh broă pà khà jờng cồng nha tam lơh; lơh glài broă lơh tìs tàm broă tàm pơrlòng, pà khà jờng.

Ring bal bơ tơl khà jờng “Gai lòng ơruh pơnu lam lài pơn iờ să” tàm rơndap lơh adat tam gơl dơ̆ do, Kwang atbồ Mpồl lơh broă kwang bàng bơh Quôk hội dê mò Nguyễn ThịThanh đơs nền, mpồl ơruh pơnu lam lài geh uă ngan dà kơl hề, phi să, tă pơgồp dờng ngan ai broă lơh bal bơh jơi bơtiàn dê in: “Tàm jơnau yal sồ 120 geh đơs, là pal tơrmù ƀà broă lơh pà khà jờng kấp dà lơgar. Jat añ den hơ̆ là gùng dà di ngan, mơya ngui ai broă tàm pơrlòng, pà khà jờng tŭ do mờ tơnơ̆ do in. Ai ơruh pơnu lam lài là jơnau gơ rềng tus rài tam lơh mờ ală broă gam jơngkah wơl mờ gam ờ tơl tàm tơngai pa do bol he ờ hềt bơ tơl di tŭ. Ală cau do, sơnam do, ală ồng mò geh kra jơh ờ gam tai. Jat añ bơta lơi geh kuơ rlau, niam rlau tŭ cih den pal sền sơ wì nàng cih tàm adat boh lam.”

Kung geh jơnau đơs bè hơ̆ sơl, Kwang atbồ Ủy ƀan Văn hóa, Giáo dụk bơh Quôk hội dê ồng Nguyễn Đắc Vinh đơs là: “Do là mpồl geh uă tă pơgồp tàm ală rài tam lơh. Pal đơs là dipal ngan. Bè adat boh lam mờ bol he gơtùi geh dùl Huân cương nàng dờp ală mpồl lơh broă tàm rài tam lơh den jat añ hơ̆ là dipal ngan. Mìng geh mpồl dân kông hỏa tuyến mờ 2, 3 mpồl ndai tus bal drơng broă tam lơh in den bol he geh jòi ală broă lơh nàng bơsong tai bơta ring bal do.”

Củ tịc Quôk hội ồng Vương Đình Huệ đơs tàm pơrjum

Ală kwang bàng sồr Cíñ phủ pơn jat tai kờp sền ală mpồl cau ơruh pơnu lam lài tus bal tàm rài tam lơh ờ hềt geh dờp broă lơh pà khà jờng tam lơh jat jơnau cih. Bè hơ̆ nàng ờ lời huĭ broă pà khà jờng ală cau geh màng mờ kac màng, geh màng tàm rài tam kơh mờ đơng lam ală kấp gơnoar atbồ tàm ƀòn lơgar sền gròi, lam lơh tơl làm ală broă lơh, bơta dong kờl gơ wèt tus mờ ơruh pơnu lam lài tus bal tam lơh, lam lơh niam bơhiàn ờs mờng hùc dà kah tô dà, kis git jơnau git adat. Kwang atbồ Ủy ban kơrnuat boh lam bơh Quôk hội dê ồng Hoàng Thanh Tùng geh jơnau đơs: “Broă lơh pà khà jờng do dilah geh den bol he tam gơl cau geh dờp, broă pà khà jờng tơrmù wơl, tơl khà jơnhua rlau nàng tơrmù ƀà bơta tam cah bè broă lơh gai lòng kir sơnrai. Gai lòng kir sơnrai bơh Đoàn ơruh pơnu Kộng sản Hồ Chí Minh dê tàm bơta là dùl mpồl lơh broă cíñ trị- mpồl bơtiàn bơh ơruh pơnu dê pà ală ơruh pơnu lam lài in, ờ di là broă lơh pà khà jờng gai lòng tàm kấp dà lơgar bơh Củ tịc lơgar lơh nền jơnhua rlau bè do. 2 bơta do là krơi is gơ dê. Den tàng ờ gơtùi đơs là geh gai lòng kir sơnrai den ờ geh gai lòng.”

Tàm dơ̆ pơrjum, Củ tịc Quôk hội ồng Vương Đình Huệ sồr lơh loh tơl khà bè sền sơ wì pà khà jờng, mờ kung kờñ broă tơrmù ƀà broă sền sơ wì, mìng pà khà jờng ai ală cau geh cồng nha, geh màng tàm rài tam lơh in: “Sền sơ wì bơta gơ rềng tai. Dilah bol he ờ tơrgùm wơl, ờ di là jơh ală. Jơh ală den ndrờm mờ gai lòng kir sơnrai. Mìng lời ai cau tus bal tam lơh in. Bơta hơ̆ là dipal mờ broă pơgồp bal mờ jơnau đơs pơn dut bơh Ƀan Ƀí thư dê. Ai Ƀộ Cíñ trị đơs bal là tơrmù ƀà broă sền sơ wì, ờ di là ờ geh gơlik tai. Dơ̆ 2 là gơtùi cih ờ di là sền sơ wì jơh ală cau geh gròi sền dùl dơ̆. Cau lơi lơh loh lài ờ di là bol he mìng krơi dùl dơ̆, ờ hềt đơs là tơnơ̆ do geh cau bè hơ̆ den bol he pơn jat tai sền sơ wì.”

Kung tàm pơrjum dơ̆ 7 bơh Ủy ƀan Thường vụ Quôk hội dê, ală kwang bàng sồr bơ tơl khà jờng xã pơn rơ jak, sơnah ƀòn, thị trấn pơn rơ jak là dipal mờ gùng dà lam srơh tàm pơrlòng wèt hờ kấp hơ đơm mờ cau lơh broă tơn. Bè broă lơh glài broă lơh tìs tàm pơrlòng, pà khà jờng kung geh ală kwang bàng cribơyai, sồr lơh loh broă lơh glài broă lơh tìs gơ wèt tus mờ ală cau tŭ neh geh broă lơh pà khà jờng halà mat khà jờng tàm pơrlòng, tŭ do đal git là broă lơh tìs.

Cau mblàng K’Duẩn