VOV4.K’ho- Broă 42 nă làng bol Việt Nam ntoat dô bơh casino tàm tiah nhàr lơgar Campuchia- Việt Nam mờ ală broă lơh kòn gùng ai cau lòt lơh broă ờ di mờ adat boh lam hờ lơgar ndai tàm tơngai rềp ndo geh mpồl bơtiàn sền gròi uă ngan. Tàm dơ̆ pơrjum ƀău ờs mờng Ƀộ Ngoại giao dê geh lơh lồi poh lài, cau sơ pơ̆ bơr Ƀộ Ngoại giao Việt Nam mò Lê Thị Thu Hằng đơs nền, ală anih lơh broă geh gơnoar mờ ală tiah pal rơcang ngac, tơnguh jơnau git wă mpồl bơtiàn dê, làng bol dê gơ wèt mờ broă lòt lơh broă hờ lơgar ndai, tàm hơ̆ geh Campuchia.

Tềng đap bơta ngai sơlơ geh uă broă cau Việt Nam gơtìp cau lơh kòn gùng ai lòt lơh broă tìs mờ adat boh lam hờ lơgar Campuchia mờ geh kal ke tàm tŭ lơh broă, cau sơ pơ̆ bơr Ƀộ Ngoại giao mò Lê Thị Thu Hằng pà git: “Do là broă mờ bol hi kung sền gròi ngan. Ƀộ Ngoại giao, ală anih lơh broă ala mat lơgar Việt nam tàm lơgar Campuchia pơgồp bal jơh nùs mờ ală ƀộ, gah broă lơh dà lơgar, ală càr, ƀòn dờng tàm lơgar, ngan là ală càr rềp gùng nhàr mờ lơgar Campuchia mờ pơgồp bal mờ anih lơh broă lơgar Campuchia nàng dờp jơnau yal, đal git, lam lơh uă broă lơh sền gàr làng bol mờ di tŭ dong kờl ală làng bol kal ke, rềs àr. Pa do, ală anih lơh broă geh gơnoar neh dong klàs mờ jun rê hờ Việt Nam pơgap rlau 500 nă làng bol rê wơl hờ lơgar ờdo ờdă, dong kờl sră nggal ai git nđờ rbô nă làng bol ndai in”.

Tàm 6 nhai bồ nam do, Ƀộ Kwang àng neh kup bàn uă mpồl, kup uă cau jun cau lòt lơh broă tìs mờ adat boh lam hờ lơgar Campuchia mờ geh ală jơnau đơs lài làng bol gơ rềng tus bơta do. Jat cau sơ pơ̆ bơr Ƀộ Ngoại giao đơs, tŭ ală cau lơh broă lơgar Việt Nam tus lơgar Campuchia, uă cau gơtìp kal ke tàm tŭ lơh broă. Mơya tŭ lam lơh broă lơh sền gàr làng bol, ală anih ala mat lơgar Việt Nam kung gơtìp 2, 3 bơta kòl yan sơl. Mò Lê Thị Thu Hằng pà git: “Lài ngan, hơ̆ là broă dong kờl pal geh bơta tàm pơgồp bal jơh nùs bơh anih lơh broă lơgar Campuchia dê. Uă cau lơh broă ờ geh sră pơ àr, ờ geh sră mut, lik lòt hờ lơgar ndai tài bơh dô pồn gan tiah nhàr dà lơgar tìs mờ adat boh lam den tàng roh uă tŭ tơngai nàng lùp khàu jơnau tơnggit să tờm kung bè lơh gơbàn uă kal ke, kòl yan tàm tŭ tàm jàu, dờp cau geh jàu. Ală anih ala mat lơgar Việt Nam tàm lơgar Campuchia neh lơh ngan rơcang lài rơndap ală dơ̆ lơh broă, tìp mat mờ sùm tàm yal jơnau mờ đah lơgar Campuchia nàng bơsong broă do”.

Mò Lê Thị Thu Hằng kung đơs nền, tàm tơngai tus, Ƀộ Ngoại giao mờ ală anih ala mat lơgar Việt Nam tàm lơgar Campuchia geh pơgồp bal mờ ală anih lơh broă geh gơnoar, ală tiah tàm lơgar mờ đah lơgar Campuchia nàng lam lơh ală broă lơh kung bè sơlơ tơnguh rlau tai bơta dong kờl, sền gàr làng bol tàm lơgar Campuchia, jun rê hờ lơgar ală làng bol gơtìp pơrlồm, cau lơh kòn gùng ai lòt lơh broă tìs mờ adat boh lam, gàr niam gơnoar, bơta kuơ dipal bơh làng bol Việt Nam dê. Ală tiah kung sơlơ tơnguh broă jat sền, đơs lài làng bol tàm ƀòn lơgar tŭ lòt lơh broă tàm lơgar ndai.

Tàm dơ̆ pơrjum ƀău, yal bè broă git nđờ jơt nă cau Việt Nam re dà dờng, dô pồn bơh casino tàm tiah nhàr lơgar Campuchia, mò Lê Thị Thu Hằng pà git, Đại sứ quán Việt Nam tàm lơgar Campuchia neh lơh broă mờ ală anih lơh broă geh gơnoar lơgar Campuchia sồr mhar lùp khàu, lơh loh jơnau bơh tài mờ geh kơnòl bơh ală gah dê tàm broă gơlik geh. Tŭ do, pràn kơldang să jan bơh ală làng bol rê hờ lơgar neh niam mờ cồng nha xét nghiệm ai gŏ ndrờm ờ geh ngui ma túy.

Cau mblàng K’Duẩn