VOV4.K’ho- Drim ngai 17/10, Thượng tướng Trần Quang Phương, Phó Củ tịc Quôk hội neh geh dơ̆ tìp mat cau tĕ khà là kwang bàng, cau lơh broă Kông ty jồr gơs zờu Bình Sơn, càr Quảng Ngãi.

Phó Củ tịc Quôk hội ồng Trần Quang Phương tìp mat cau tĕ khà tàm càr Quảng Ngãi

Tàm dơ̆ tìp mat, uă cau tĕ khà tàm Kông ty jồr gơs zờu Bình Sơn neh đơs bơta ờ niam tàm tiah lơh sa Dung Quất tŭ ờ hềt geh bơta tam gơl pa tàm bơcri priă bơtàu tơnguh gah jồr gơs zờu. Tus tŭ do, dà lơgar kung ờ hềt geh bơta bơcri priă kuơmàng nàng kờñ lơh gơlik dùl anih tờm tơrgùm jồr gơs zờu niam kâp dà lơgar bulah neh geh bơta ƀuơn là geh Hìu măi jồr zờu Dung Quất. Uă cau tĕ khà kung geh jơnau đơs bè broă khà kông ñân lơh broă tàm Tiah lơh sa Dung Quất mờ tàm Hìu măi jồr zờu Dung Quất uă ngan mơya ờ tơl hìu ơm ai kông ñân in. Phó Củ tịc Quôk hội ồng Trần Quang Phương cih dờp ală jơnau đơs bơh cau tĕ khà Kông ty jồr gơs zờu Bình Sơn dê mờ đơs là, dơ̆ tìp mat cau tĕ khà tơngume do kuơmàng ngan nàng git bơta kơp kờñ bơh kông ñân dê drơng ai dơ̆ pơrjum dơ̆ 4, Quôk hội khoă 15 in.

VOV/Cau mblàng K’Duẩn