VOV4.K’ho- Broă tơn jŏ bơta bơsram pờ tơlik tơn tàm internet ờ mìng gơ rềng tus cồng nha bơto bơsram mờ gam gơ jat bal mờ ală bơta ờ niam bè pràn kơldăng să jan, nùs nhơm, bơta dờng pràn să jan kơnòm bơsram dê. Uă tiah pà git, rơcang ai kơnòm bơsram lòt bơsram wơl tơnơ̆ sa tềp bơhiàn bè jơnau đơng lam bơh Thủ tướng Cíñ phủ dê.

Là dùl tàm ală càr kong gơ rềng kơn jơ̆ kơn jut ngan bơh kòp Kovid-19 dê mờ khà cau bơtờp kòp pah ngai sùm gơguh jơnhua, Tây Ninh neh hời rơ hời rê wơl mờ broă hời rơ hời kơryan kòp bơtờp mờ cit sơnơm vaccine ai kơnòm bơsram tàm sơnam lòt bơsram in. Tŭ do, khà cit sơnơm vaccine ding dơ̆ 1 mờ ding dơ̆ 2 ai kơnòm bơsram bơh ơdŭ 7 tus ơdŭ 12 in ndrờm geh rlau 90%. Ồng Võ Đức Trong, Phó Củ tịc Ủy ƀan Ñân zân càr Tây Ninh pà git, kờp dŭ, càr geh pờ mpồng hìu bơsram nàng rò jơh ală kơnòm bơsram tus hìu bơsram bơsram tơn: “Tơnơ̆ tŭ ai jơnau đơs bơh ală mè bèp kơnòm bơsram dê den Tây Ninh neh lam lơh tơrlòng lài ai 2 ơdŭ là ơdŭ 9 mờ ơdŭ 12. Tàm nđờ ngai rềp ndo den khà bơsram tơn là 76%, ai bơsram tàm hìu là mờr 24%. Tơnơ̆ nđờ ngai bơsram den sền bal ală bơta niam lơm, hơ̆ là ờ hềt geh cau lơi bơtờp kòp. Nùs nhơm bal là Tây Ninh kờp dŭ là tơnơ̆ sa tềp bơhiàn den bol hi geh ai lòt bơsram tơn tàm jơh ală ơdŭ bơsram. Ală broă lơh rơcang lài den tus tŭ do là Tây Ninh neh rơcang di jat jơnau pơlam bơh Ƀộ Giáo zụk kung bè Ƀộ Y tế dê.”

Tŭ do, 2, 3 tiah gơ ơm tàm tiah tờm gơbàn kòp bơh dơ̆ bơtờp kòp Kovid-19 dơ̆ 4 bè ƀòn dờng Hồ Chí Minh gam hời rơ hời pờ mpồng wơl hìu bơsram. Ồng Nguyễn Văn Hiếu, Kwang atbồ Sở Giáo zụk mờ Đào tạo ƀòn dờng Hồ Chí Minh pà git, tŭ do, khà kơnòm bơsram bơh ơdŭ 7 tus ơdŭ 12 lòt bơsram tơn geh rlau 98%, khà kơnòm bơsram lòt bơsram bơtờp kòp Kovid-19 dùl êt ngan, den tàng ƀòn dờng gam sền sơ wì nàng ai kơnòm bơsram dềt sơnam rlau geh tus hìu bơsram: “Bơh broă lam lơh ai lòt bơsram tơn den 2 gah là gah lơh sơnơm mờ gah Giáo zụk mờ Đào tạo geh broă rơndap lơh yal mờ Ủy ƀan Ñân zân ƀòn dờng, pơn jat tai ai tơlik jơnau sồr, bơh ngai 07/02, hơ̆ là tơnơ̆ sa tềp bơhiàn geh ai ală kơnòm bơsram bơh ơdŭ 6, kơnòm bơsram kấp 1 mờ kơnòm bơsram mầm non geh tus hìu bơsram jat bơta kờñ is bơh mè bèp kơnòm bơsram dê.”

Uă tiah ndai kung neh geh jơnau kờp dŭ ai 100% kơnòm bơsram lòt bơsram wơl tàm hìu bơsram tơnơ̆ sa tềp bơhiàn, mơya broă geh ai tơlik là pal geh ală broă lơh gàr niam ờdo ờdă mờ mblàng yal jơnau nàng lơh iang nùs mè bèp kơnòm bơsram, lơh gơlik bơta ring bal mờ pơgồp bal lam lơh ală broă lơh rơcang sơndră kòp. Hà Nội kung neh geh tŭ gơbàn bè do tŭ pờ mpồng hìu bơsram, mìng is geh ơdŭ tài rơngòt kòp bơtờp den tàng mìng geh 1 nă kơnòm bơsram tus ơdŭ bơsram. Ồng Trần Thế Cương, Kwang atbồ Sở Giáo zụk mờ Đào tạo ƀòn dờng Hà Nội pà git, kờp dŭ ngai 07 mờ ngai 08/02 tus do, geh ai kơnòm bơsram bơh ơdŭ 7 tus ơdŭ 12 lòt bơsram tơn tàm hìu bơsram. Gah Giáo zụk mờ Đào tạo mờ gah lơh broă geh gơnoar neh bơt bơtàu ală jơnau rơcang lài gàr niam ờdo ờdă ngan rlau jơh ai ală kơnòm bơsram in tŭ lòt bơsram tơn. Bulah bè hơ̆, kal ke ngan rlau jơh tŭ do hơ̆ là bơta ờ tơl cau lơh sơnơm tàm hìu bơsram nàng gròi sền pràn kơldăng să jan ai kơnòm bơsram in: “Tŭ do, cau lơh sơnơm tàm hìu bơsram ờ tơl ngan. Mìng is gơ wèt mờ ƀòn dờng Hà Nội là mờr 450 nă cau lơh sơnơm tàm hìu bơsram ờ tơl. Den tàng tŭ do Hà Nội gam geh broă lơh là hòi jà cau lơh sơnơm neh jơh sơnam rê rlô lơh broă nàng tus bal tàm broă lơh sơnơm tàm ală hìu bơsram. Dơ̆ 2 là sồr hìu sơnơm tàm ală xã, sơnah ƀòn, thị trấn dong kờl, mơya đơs ngan là kal ke ngan. Dăn mờ Ƀộ Giáo zụk mờ Đào tạo, Ƀộ Y tế, Ƀộ Nội vụ gròi sền lơh bè lơi nàng ală tiah in geh cau lơh sơnơm tàm hìu bơsram, gàr niam ờdo ờdă, gròi sền pràn kơldăng să jan ai ală kơnòm bơsram in, kuơmàng là tàm tơngai kòp Kovid-19.”

Thứ trưởng Ƀộ Y tế ồng Nguyễn Trường Sơn kung kờñ broă pờ mpồng wơl hìu bơsram tài Việt Nam neh geh khà cit sơnơm vaccine ding dơ̆ 2 mờr 100%. Kơnòm dềt bơh 12 tus 17 sơnam kung neh geh cit sơnơm vaccine mờ mờr tus kung rơcang cit ai kơnòm dềt bơh 5 tus 11 sơnam in: “Broă ai ală oh lòt bơsram wơl là kuơmàng ngan tŭ do. Tŭ do den mpồl bơtiàn bol he dê kung neh geh khà ờ bơtờp kòp. Dơ̆ 2 tai là broă pờ mpồng hìu bơsram ai ală sau in lòt bơsram wơl gam gơ wèt tàm ală bơta gàr niam ờdo ờdă, tàm hơ̆ hìu bơnhă pal ờdo ờdă, hìu bơsram ờdo ờdă mờ kờp jơh bal mpồl bơtiàn tiah hơ̆ pal gàr ờdo ờdă mờ jat añ den tơnơ̆ sa tềp là dipal.”

Nàng lơh gơlik bơta ƀuơn ai ală tiah in pờ mpồng hìu bơsram, tàm tơngai tus, Ƀộ Y tế geh gờñ geh sră nggal đơng lam broă bơsir ală broă đal git khà bơtờp kòp. Ƀộ Giáo zụk mờ Đào tạo jat hơ̆ geh ai tơlik sră nggal tam gơl sră nggal yau nàng dipal mờ jơnau pơlam bơh Ƀộ Y tế dê tàm tŭ tơngai pa. Bơdìh hơ̆ tai, Ƀộ Giáo zụk mờ Đào tạo geh tai 2, 3 jơnau pơlam ai kấp mầm non in nàng lơh gơlik bơta ƀuơn ai ală tiah in lơh jat.

Cau mblàng K’Duẩn