VOV4.K’ho - Tàm tơngai bơh nam 2021 tus 2025, geh di pơgăp 230 hìu rơƀah tàm tiah ƀòn lơgar geh dong kờl lơh hìu ơm ờ do ờ dă, ring niam, rơhời geh tơnguh khà rài kis, pơgồp bal tàm broă tơn jơh jơgloh tơmù rơƀah kơl jăp.

Do là gùng dà broă Ƀộ Xây dựng cri bơyai kơrnoăt bơh Thủ tướng Cíñ phủ bè broă dong kờl hìu rơƀah bè hìu ơm tơngai bơh nam 2021 tus 2025. Nàng pơgồp bal tàm broă bơsong broă kờñ geh hìu ơm tàm tiah ƀòn lơgar gam uă ngan tŭ do, tơngai bơh nam 2021 tus 2025, tŭ do geh 2 broă lơh jăt jơnau kờñ dà lơgar dê geh tơngu me dong kờl lơh hìu ơm ai ală hìu rơƀah gơtìp kal ke in là: broă lơh jăt jơnau kờñ dà lơgar bè tơnguh bơtàu lơh sa mpồl bơtiàn tàm tiah làng bol kòn cau mờ tiah kơh bơnơm tơngai bơh nam 2021 tus 2030, tơngai sơnrờp bơh nam 2021 tus 2025 mờ broă lơh jăt jơnau kờñ bơh dà lơgar tơmù rơƀah kơl jăp tơngai bơh nam 2021 tus 2025. Mơya, broă lơh jăt bơh 2 broă lơh jăt jơnau kờñ do ờ geh tơl tus gùt lơgar mờ mìng geh dong kờl gơwèt mờ hìu rơƀah tàm tiah làng bol kòn cau, tiah kơh bơnơm mờ tàm ală kơnhoàl rơƀah.

Cau mblàng Ndong Brawl