VOV4.K’ho- Tàm 2 ngai, 27 mờ 28/4, tàm ƀòn dờng Đà Nẵng, Ủy ƀan Adat boh lam bơh Quôk hội khóa 15 dê bơyai lơh pơrjum bal dơ̆ 6 nàng sền sơ wì ală rơndap lơh Adat boh lam lam lơh làng bol lơh tờm tàm kâp hơ đơm, rơndap lơh Adat Lùp sền (tam gơl) mờ sră yal bơh Cíñ phủ dê bè broă crơng gơs thị trấn Phương Sơn, kơnhoàl Lục Nam mờ thị trấn Bắc Lý, kơnhoàl Hiệp Hòa, càr Bắc Giang.

Tàm pơrjum, Thường trựk Ủy ƀan Adat boh lam neh ring bal bơta kuơmàng bơh broă ai tơlik Adat Lam lơh làng bol lơh tờm tàm kâp hơ đơm. Bơh hơ̆, di tŭ tam gơl gơs thể cế gùng dà tơnguh làm uă làng bol lơh tờm xã hội củ nghĩa mờ jơnau đơs “làng bol git, làng bol bơyai, làng bol lơh, làng bol sền sơ wì, làng bol jat sền, làng bol dờp kuơ”. Bè sră nggal rơndap lơh Adat boh lam, Thường trựk Ủy ƀan Adat boh lam sồr Cíñ phủ pơn jat tai kơlôi sơnơng nàng geh jơnau yal bơtơl halà rơcang mblàng lơh loh ngan ngồn gơ hòi gơ jà rlau bè broă yal tơn jơh lơh jat adat boh lam.

Cau mblàng K’Duẩn