VOV4.K’ho- Ngai 04/4, tàm ƀòn dờng Cần Thơ, Mpồl lơh broă kwang bàng neh bơyai lơh pơrjum “Bơta chài gròi sền lời ai kwang bàng làng bol pồ in” ai ală kwang bàng Quôk hội khóa 15, kwang ala mat Thường trựk Hội đồng Ñân zân, ală cau yal jơnau, cau lơh broă bal, kông cứk 2, 3 cơldŭ lơh broă Mpồl kwang bàng Quôk hội mờ Hội đồng Ñân zân ală càr, ƀòn dờng tiah đah jum dà lơgar. Ồng Trần Thanh Mẫn, Phó Củ tịc Thường trựk Quôk hội neh tus bal mờ đơng lam pơrjum.

Pơrjum nàng sền ai ală kwang bàng in jơnau git wă bal bè gròi sền, ală bơta chài pal geh ai broă lơh gròi sền in, bè: Bơta chài mblàng lơh loh jơnau tơnggit, bơta chài lùp jơnau, bơta chài gròi sền tơngume, bơta chài ai tơlik jơnau đơs tàm broă lơh gròi sền lời ai mpồl kwang bàng ai tơlik jơnau đơs dong broă tàm anih lơh broă làng bol pồ in. Pơrjum dơ̆ do geh tam pà gơs 2 ơdŭ lời ai ală kwang bàng Quôk hội mờ kwang bàng Thường trựk Hội đồng Ñân zân in. Tus tŭ do, Mpồl lơh broă kwang bàng neh bơyai lơh 4 dơ̆ pơrjum bơto pơlam ai kwang bàng Quôk hội mờ kwang bàng Hội đồng Ñân zân ală càr, ƀòn dờng Hà Nội, Huế mờ Tuyên Quang in.

Cau mblàng K’Duẩn