VOV4.K’ho- Rơcang ai dơ̆ pơrjum dơ̆ 4, Quôk hội khoă 15 mờr tus in, poh lài, tàm gùt lơgar neh bơyai lơh ală dơ̆ tìp mat cau tĕ khà. Tàm ƀòn dờng Hồ Chí Minh, Củ tịc lơgar ồng Nguyễn Xuân Phúc neh wă cau tĕ khà ală kơnhoàl Củ Chi mờ Hóc Môn. Củ tịc lơgar neh sồr kwang đơng lam bồ ƀòn dờng hơ tơn cau tĕ khà in tàm dơ̆ tìp mat, mờ kung sồr bơsong gờñ ală jơnau sồr dipal mờ cau tĕ khà đơs. Tàm tiah Tây Nguyên, cau tĕ khà đơs uă broă kuơmàng bơh dà lơgar dê, kung bè 2, 3 broă pa gơlik geh, ngan là broă lơh atbồ phan xăng zờu.

Củ tịc lơgar ồng Nguyễn Xuân Phúc wă cau tĕ khà ƀòn dờng Hồ Chí Minh

Bè broă ală cau tĕ khà Củ Chi mờ Hoc Môn đơs, hơ̆ là bơta uă rơndap broă lơh lơyài tơngai lam lơh, ờ lam lơh, lơh gơbàn kal ke ai rài kis làng bol in mờ lơh gơlik bơta ờ suk tàm 2, 3 tiah geh rơndap broă lơh, tàm hơ̆ geh rơndap broă lơh Tiah lơh sa mờ măi mok Đông Nam, lơh mờr 80 hìu bơnhă làng bol gơtìp kal ke. Cau tĕ khà Huỳnh Văn Tây dan: “Añ dan dùl dơ̆ tai ƀòn dờng pal sền gròi tus tiah lơh sa mờ măi mok Đông Nam. Làng bol gam wơl 1/3, tus tŭ do ờ hềt git he geh tơm wơl priă rơndap ƀòn ơm kis pa bè lơi. Añ đơs pơn yơu dềt ngan rlau jơh, mìng ơm hìu ơpah bơh 800 rbô tus 1 tơlak đông tàm 14 nam lơm gời, kờp jơh den gơlik kàr lơi. Bơta mùl màl do pal đơs là ờ suk mờ kal ke ngan bơh làng bol dê”.

Bè broă rùp ndo 2, 3 anih tac xăng zờu til mpồng, giă xăng zờu gơguh kas tàm tơngai lài lơh gơ rềng tus broă lơh sa mờ rài kis, cau tĕ khà Phan Thị Tuyết Anh ơm tàm kơnhoàl Hóc Môn dan: “Añ dan Ƀộ Kông thương, Ƀộ Tài cíñ pal jà ală mpồl tac xăng zờu, ală anih tac bơh sơn rờp nàng bal mờ gơp geh bal jơnau đơs, bơsong kal ke, gàr niam bơta kuơ ring bal đah ală gah, gàr tơl khà tac xăng zờu ai làng bol in kơ̆ kơljap, ờ gơtìp ờ tơl”.

Làng bol Lâm Đồng kơp gùt mang nàng cih mat lơh sră ngui ù

Tam pà mờ cau tĕ khà bè broă do, Củ tịc lơgar ồng Nguyễn Xuân Phúc pà git, khà tac bơh broă lơh gơlik tàm lơgar gàr tơl 2/3 jơnau kờñ ngui. Den tàng broă lời gơlik geh bơta pa do là dùl bơta ờ niam tàm broă atbồ, đơng pơlam: “Jat khà kờp bơh mpồl sền sơ wì tă dia phan tac mờ blơi bơh lơgar ndai ƀòn dờng Hồ Chí Minh dê, pơndrờm mờ bal dùl tŭ nam lài blơi bơh lơgar ndai neh gơguh rlau 20%. Mơya tài jơnau kờñ blơi uă ir. Nam lài tài kòp Kovid-19 den tàng ngui xăng zờu dùl êt. Nam do broă lơh sa, ngui sa ndrờm gơguh jơnhua, bol he ờ gơtùi git lài, bal mờ giă tàm dunia tam gơl den bol he đơng pơlam ờ di tŭ den tàng lời gơlik geh bơta do. Jat añ den do là bơta ờ niam mờ ală cau tĕ khà neh đơs là di ngan nàng Cíñ phủ mờ ală ƀộ, bal mờ ƀòn dờng geh broă lơh di tŭ rlau”.

Kung tàm poh lài, mpồl kwang bàng Quôk hội càr Lâm Đồng neh bơyai lơh tìp mat cau tĕ khà tàm ală kơnhoàl, ƀòn dờng tàm càr. Uă broă ờ niam geh cau tĕ khà pơn jat tai đơs mờ geh jơnau dan, jơnau sồr. Bơdìh mờ ală broă kuơmàng geh cau tĕ khà sền gròi, bè: broă lơh rơcang sơndră sa kuề sa kuà bơh dà lơgar mờ ƀòn lơgar dê, broă lơh rơcang sơndră lơh pờng tàm hìu bơnhă, broă lơh kham- sơm kòp, bơta lam lơh jat ală broă lơh jơnau kờñ dà lơgar, priă bơcri dà lơgar, gùng lòt ală tiah, gàr niam rài kis mpồl bơtiàn… Cau tĕ khà càr Lâm Đồng sền gròi uă ngan tus ală broă lơh lam lơh tơrmù rƀah kơ̆ kơljap, ală broă bè bơsong dà sàng goh ƀòn lơgar, atbồ, sền gàr brê, tơnhàu phan kuơ tàm ù, dong kờl mpồl lơh sa kă bro mờ làng bol lơh broă sa tơnguh cồng nha lơh sa, bơsong bơta phơng sih, phan ngui lơh broă sa suơn sre ờ niam.

Tàm ală dơ̆ tìp mat, cau tĕ khà pơn jat tai dan mờ mpồl kwang bàng Quôk hội càr Lâm Đồng pal sơlơ tơnguh rlau tai broă lơh jat sền broă lam lơh ală rơndap broă mờ broă lơh kuơmàng tàm càr; pal geh broă lơh pràn rlau tai tàm broă lơh glài ală broă mus kơl brê, sơ gràm ù; sơlơ tơnguh broă lơh atbồ rơndap tap sèng bơt bơtàu, bơsong jơh ală broă lơh sơ gràm tiah kềng sền gàr dà dờng, dà croh, lơh gơbàn ngơr bam pah tŭ mìu sơr. Tàm hơ̆, tơngume geh uă cau tĕ khà đơs tus hơ̆ là sră nggal sền sơ wì, lơh sră ngui ù dơ̆ sơn rờp gam kal ke, jŏ jòng. Ala mat làng bol tàm ƀòn lơgar, cau tĕ khà K’Sói ơm tàm xã N’Thol Hạ, kơnhoàl Đức Trọng đơs: “Tŭ do, sră nggal sền sơ wì nàng lơh kung bè dan lơh sră ngui ù dơ̆ sơn rờp ai làng bol in kal ke ngan. Ală anih lơh broă den cih sră pơrgon dờp sră nggal tàm tơngai là 20 ngai, mơya mùl màl den broă dờp sră nggal jŏ jòng bơh 5 tus 10 nhai halà uă nam kung gam ờ hềt lơh lơh gơs sổ đỏ. Bơh hơ̆ lơh gơbàn ờ suk, kal ke làng bol in”.

Mpồl kwang bàng Quôk hội càr Lâm Đồng lời uă tŭ tơngai nàng cribơyai, yal tơnggit, hơ 2, 3 tơngume kuơmàng, mờ kung cih dờp, tơrgùm jơh ală jơnau đơs, jơnau dan bơh cau tĕ khà dê.

Cau mblàng K’Duẩn