VOV4.K’ho- Mho ngai 16/02, tàm Hà Nội neh geh lơh Pơrjum pờ tơn tàm internet lam lơh jăt Kơrnoăt sồ 11 bơh Cíñ phủ dê bè Broă lơh bơtàu tơnguh wơl mờ bơtàu tơnguh lơh sa- mpồl bơtiàn mờ lam lơh jăt Kơrnoăt sồ 43 bơh Quôk hội dê bè broă lơh nam priă jền, priă jền dong kờl Broă lơh.

Tus mờ đơs tàm pơrjum, Phó Thủ tướng ồng Lê Minh Khái neh đơs là, nàng lam lơh jăt ală broă lơh dong kờl ai càn priă ờ sa priă cồng uă di tŭ mờ geh cồng nha, di cau nàng dong kờl cau rƀah mờ ală cau geh cíñ sac ndai sơrlèt gan kal ke tài bơh kòp dờng Kovid-19, pơgồp bơnah bơtàu tơnguh wơl mờ bơtàu tơnguh lơh sa- mpồl bơtiàn jăt Kơrnoăt sồ 11, pal tơnguh tai kơnòl uă rlau tai nàng lơh jăt niam Broă lơh do, pal geh bơta pơgồp bal niam, bơnĕ bơnài đah ală ƀộ, gah, ƀòn lơgar nàng lơh geh cồng nha uă. Phó Thủ tướng ồng Lê Minh Khái đơs loh: Tŭ geh broă dong kờl mờ priă jền den pal tơrgùm lam lơh, lơh jăt ai càn priă pal dong kờl di tŭ, geh cồng nha, di cau geh dờp, song dơ pă, loh làng.

Cau mblàng Lơ Mu K’Yến