VOV4.K’ho- Tơnơ̆ 20 nam lam lơh broă lơh càn priă geh dong kờl priă cồng gơ wèt tus mờ cau rƀah mờ cau geh sră dong kờl bơh dà lơgar jat Nghị địñ sồ 78 bơh Cíñ phủ dê, bơnah priă càn dong kờl neh tus tàm ală ƀòn, bơh tiah ring tus tiah jơh bơ nơm, tiah sar lơgar ngài, pơgồp bơnah uă ngan tàm jơnau kờñ tơrmù rƀah, bơt bơtàu ƀòn lơgar pa mờ gàr ờdo ờdă rài kis mpồ bơtìan bơh càr Sơn La dê.

Là hìu bơnhă rƀah jŏ nam bơh Tiểu khu Hua Ít, thị trấn Ít Ong, kơnhòal Mường La, càr Sơn La dê, priă lơh geh pah nam bơh hìu bơnhă ồng Lèo Văn Binh dê mìng kơp gơn tàm suơn tơngời, suơn bùm blàng ro kơnrañ. Nam 2015, geh kwang bàng Ngân hàng cíñ sác kơnhòal bal mờ gơ noar atbồ tiểu khu pơn jờng, hòi jà, ồng Binh khin cha càn 50 tơlak đông bơh priă càn dong kờl priă cồng bơh Ngân hàng cíñ sác xã hội kơnhòal dê nàng blơi tai ù, tam gơl suơn tam bơrlŭ phan gơs suơn tam ală bơta chi sa plai di mờ bơta geh ngan ù tiah dòr, trồ tiah tơngai duh tàm do.

Nam 2018, ồng Binh pơn jat tai càn 50 tơlak đông bơh Ngân hàng cíñ sác xã hội kơnhòal nàng blơi tai sơntìl chi tam, phan ròng nàng bơtàu tơnguh lơh sa. Tơnơ̆ uă nam, suơn tơngời, suơn bùm blàng neh gơ gơs broă lơh lơh sa tơrgùm bal, ơnàng rlau 1 lồ bal mờ 100 tờm plai jràng bơkiar, 150 tờm plai bung kơmhò tơlir, pơ ò Đài Loan, pơnat Thái, bal mờ hơ̆ là 10 nơm rơpu, kơn rồ mờ mpồl iar ơda ting lềng tàm suơn. Ồng Binh yal, kàl lơh sa pa do, broă lơh lơh sa bơh hìu bơnhă ồng dê neh sơn đờm lơh geh priă cồng, geh rlau 100 tơlak đông tơ nơ̆ tŭ kờp jơh priă tă lơh; ală nam pơn jat tai, ală bơta tờm chi kí dờng tơl làm, khà priă tac phan lơh gơs yòm den geh ai priă jền lơh geh mờr 250 tơlak đông: “Hìu bơnhă añ geh càn priă bơh Ngân hàng cíñ sác den blơi kơn rồ, blơi ù nàng tam chi sa plai; kơ nờm priă càn hơ̆ den tŭ do hìu bơnhă neh geh suơn chi sa plai kơ̆ kơljap, rơpu, kơn rồ gơguh uă, plai chi tus kàl tơnhàu den geh rơndeh cau blơi dê tus tàm suơn nàng pơndiang”.

Kwang bàng Ngân hàng cíñ sác xã hội Sơn La tus tơl thôn ƀòn, tiểu khu

Mờ rlau 40 nă cau sa priă nhai sùm mờ 50 nă cau lơh broă jat nhai kàl, Kông ty Trác ñiệm Hữu hạn MTV Hữu Hảo Tây Bắc tàm ƀòn Văn Minh, xã Mường Bú, kơnhòal Mường La lơh broă tơnhàu phan kuơ tàm ù, khà tơnhàu geh bơh 2 rbô 500 tus 3 rbô khối lŭ neh gơs phan pah nhai; bal mờ hơ̆ kông ty kung lam lơh bơt bơtàu ală broă lơh kỹ thuật drơng rài kis làng bol mờ pơndiang phan bơna gùng ù gờl. Tài gơ rềng bơh dơ̆ bơ tờp kòp Kovid-19 jŏ jòng pa do, kông ty gơtìp uă kal ke, ngan là broă tơm priă nhai ai kông ñân in.

Ồng Đỗ Xuân Hảo, Kwang atbồ Kông ty pà git: Bơh bơnah priă càn geh dong kờl priă cồng, priă cồng ai càn 0% bơh Ngân hàng cíñ sác xã hội kơnhòal dê, Kông ty neh gơtùi tơm dùl bơnah priă nhai, bơh hơ̆ lơh gơlik gơn kơnờm nàng oh mi tàm kông ty iang nùs lơh broă tàm tơngai kòp bơ tờp tơn: “Tàm tơngai kòp Kovid-19 gơlik geh kal ke, oh mi kông ñân geh nđờ nă cau bơ tờp kòp Kovid-19 pal tam cah IS, cau blơi phan ờ huan geh lòt rê, phan bơna lơh gơlik kung ờ gơtùi tac, den tàng kal ke ngan; tơngai hơ̆ geh Ngân hàng cíñ sác xã hội dong kờl den tàng di tŭ bơsong tŭ kal ke mờ gơtùi tơm dùl bơnah priă nhai ai oh mi kông ñân in”.

Uă hìu bơnhă neh khin cha càn priă tam gơl broă lơh sa

Ồng Tạ Văn Toàn, Phó Kwang atbồ Ngân hàng cíñ sác xã hội càr Sơn La pà git: Mờ jơnau đơs “Git loh nùs nhơm làng bol- Jơh nùs drơng lơh”, tàm 20 nam lơh jat Nghị địñ sồ 78 bơh Cíñ phủ dê, bơnah priă càn cíñ sách neh tus 100% ală ƀòn, tiểu khu, kờp bal mờ tiah sar lơgar ngài, tiah uă kal ke, neh dong git nđờ rhiang rbô hìu bơnhă jơh rƀah, ndrờm bè cau rƀah; uă hìu bơnhă khin sơ nơng, khin lơh, khin càn priă nàng blơi phan bơna, măi mok, sơntìl chi tam, phan ròng tam gơl broă lơh bơtàu tơnguh lơh sa, gàr niam rài kis hìu bơnhă, ai geh broă lơh ai cau lơh broă tàm ƀòn lơgar in mờ pơgồp bơnah gàr niam broă lơh gàr ờdo ờdă rài kis mpồl bơtìan tàm càr. Mìng is nam 2021 pa do, kờp jơh priă ai càn geh rlau 1 rbô 459 tơmàn đông; kờp jơh priă lùp dồs là rlau 1 rbô 178 tơmàn đông, kờp jơh priă tờm mờ priă cồng là rlau 4 rbô 964 tơmàn đông, uă ngan cau càn priă ngui priă càn di jơnau kờñ, geh cồng nha, ală cau càn ndrờm lơh jat niam broă tơm priă cồng, tơm dồs tus tơngai pơrgon mờ priă tềm pềr jat jơnau sồr:“Bơh 20 nam lam lơh jat, Ngân hàng sơnĕ càr Sơn La geh pơn jat tai lơh jat gùng dà bơtàu tơnguh lơh sa mpồl bơtìan tàm ală tiah, ală kơnhòal, ală thôn, ƀòn; tơnguh broă lơh mblàng yal bè càn priă cíñ sách xã hội, kuơmàng là ală broă lơh càn priă cíñ sách xã hội pa, ală broă lơh jat jơnau sồr bơh Cíñ phủ dê, tơrgùm tàm ală tiah ngài, tiah gam uă kal ke nàng làng bol pơn jat tai càn priă kung bè di tŭ tă bơsong ală kal ke, kòl yan, ală bơta ờ niam digơlan gơlik geh”.

Broă lơh sa bơrlŭ bal bơh hìu bơnhă ồng Binh dê bơh sơn rờp neh lơh geh priă cồng

Bơh 20 nam lam lơh jat, Nghị địñ sồ 78 bơh Cíñ phủ dê tàm càr Sơn La, broă lơh càn priă bơh Ngân hàng cíñ sác xã hội dê neh lơh geh cồng nha ngan ngồn, geh gơ noar broă kuơmàng tàm broă lơh tơn jơh jơgloh tơrmù rƀah mờ gàr ờdo ờdă rài kis mpồl bơtìan, gơ jat bal đềt mềr mờ cau rƀah mờ ală cau geh sră dong kờl ndai bơh dà lơgar dê.

Cau mblàng K’Duẩn