VOV4.K’ho - Drim òr (19/07), di tơnkah 75 nam ngai cau ling sồt să, cau ling chơ̆t màng, Quân ủy Dà lơgar, Ƀộ Quốk phòng tìp măt cau ala măt cau geh màng mờ dà lơgar bal mờ cau pròc mhàm cau ling chơ̆t màng gam lơh broă tàm mpồl ling.

Tàm dơ̆ tìp măt, Đại tướng Phan Văn Giang, Ƀộ trưởng Ƀộ Quốk phòng pơyoa jơnau chờ gờm niam bơnĕ ngan tus mờ ală cau mè Việt Nam khin cha jăk chài, ală cau ling sồt să, cau pròc mhàm cau ling chơ̆t màng mờ cau geh màng mờ dà lơgar gam bơsram sră, lơh broă tàm ală mpồl ling tàm gùt ling klàng. Đại tướng đơs, broă kis git jơnau git adăt bal mờ broă drơng lơh tàm ling klàng geh ai là dùl tàm ală broă lơh kwơ màng tàm broă đảng, broă cíñ trị tàm ling klàng. Tus tŭ do, neh geh rơlao 130 rơbô nă cau mè Việt Nam khin cha jăk chài geh pơn jờng. Jơh ală cau mè Việt Nam khin cha jăk chài geh ală càr, ƀòn dờng bal mờ mpồl ling ròng siam. 5 nam do, ală mpồl ling neh lam sồr kwang bàng, cau ling bal mờ hòi jà jơh ală bơta pràn tă pơgồp bal priă tàm kes priă kis git jơnau git adăt mờ rơlao 400 tơmàn đong, lơh rơlao 4 rơbô nơm hìu nùs nhơm, ròng siam 2 rơbô 879 nă cau mè Việt Nam khin cha jăk chài.

Cau mblàng Ndong Brawl