Pơn jat tai pơrjum dơ̆ 4, drim ngai 26/10, ală kwang bàng cribơyai tàm mpồl bè Jơnau rơcang cih Nghị quyết bè lơh torlòng lài ai gơ noar rơ wah ngui ƀàng sồ rơndeh ôtô bơh tàm pơrlòng giă mờ jơnau rơcang cih Nghị quyết bè lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk.

Ƀộ trưởng Ƀộ Kế hoạc mờ Đầu tư ồng Nguyễn Chí Dũng yal jơnau rơcang cih Nghị quyết bè lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk

Ală jơnau đơs ring bal pal geh Nghị quyết bè lơh tơrlòng lài 2, 3 gùng dà, broă lơh krơi is bơtàu tơnguh ƀòn dờng Buôn Ma Thuột, tài do là ƀòn dờng ơm tàm tiah tờm bơh Tây Nguyên dê, tàm tơrbŏ bal mờ ală tiah tờm bơtàu tơnguh bơh tiah đah jum tàm gùl lơgar, tiah đah jum mat tơngai lik dà lơgar mờ tiah 3 mum bơtàu tơnguh bơh Lào- Việt Nam- Campuchia dê; geh bơta gơ rề bè lơh sa, niam chài mờ geh gơnoar broă kuơmàng ngan bè lơh sa, mpồl bơtiàn, sền gàr dà lơgar, sền gàr lơngăp lơngai tiah Tây Nguyên mờ gùt lơgar. Ồng Lê Ngọc Hải, mpồl kwang bàng càr Dăk Lăk đơs nền, tŭ do, Buôn Ma Thuột kung gam ờ tơl mờ ờ pràn uă bơta ngan là phan bơna, bè hơ̆ den tàng Nghị quyết pal lơh gơlik broă lơh krơi is, tam gơl pa nàng gơ hòi gơ jà priă bơcri ai tiah do in.