Pơn jat tai pơrjum dơ̆ 4, drim ngai 02/11, Quôk hội cribơyai tàm mpồl bè rơndap lơh Adat sền gàr gơnoar kuơ cau ngui sa (tam gơl). Broă geh uă kwang bàng sền gròi cribơyai, hơ̆ là sền gàr cau ngui sa krơi is, kuơmàng là broă kă bro tàm internet. Ală kwang bàng ring bal mờ bơta pal geh ai tơlik rơndap lơh adat boh lam mờ ală jơnau geh đơs tàm sră yal bơh Cíñ phủ dê, mơya pal sền gròi bè bơta bơtàu tơnguh bơh ală broă lơh kă bro, ngui sa pa; sồr gàr niam gơnoar kòn bơnus, gơnoar kuơ cau ngui sa; pal sền gròi là khà broă lơh tìs gơnoar kuơ cau ngui sa gơguh mhar, mơya bơsong tam pìt tam phan ờ hềt ngan ngồn geh cồng nha.

Ƀộ trưởng Ƀộ Kông thương ồng Nguyễn Hồng Diên

Tàm mpồl cribơyai, Ƀộ trưởng Ƀộ Kông thương ồng Nguyễn Hồng Diên, kwang bàng mpồl ƀòn dờng Hải Phòng đơs loh: bè sền gàr gơnoar kuơ cau ngui sa krơi is, kuơmàng là kă bro tàm internet, do là broă kuơmàng geh Ƀộ mờ ală anih lơh broă lơh sir tàm tơngai lài. Mùl màl bè jơnau cih sră pơrgon jat sră lơh lài tàm kă bro điện tử, gàr bơta niam phan bơna tŭ kă bro.