VOV4.K’ho- Poh lài, Mpồl kwang bàng jat sền Quôk hội khóa 15 neh lơh broă tàm 2 càr Lâm Đồng mờ Gia Lai bè lam lơh jat ngan ngồn tềm pềr, sơndră pơhì pơhà, hoàc huơr tơngai bơh nam 2016 tus nam 2021. Jat hơ̆, mpồl kwang bàng jat sền sồr ală càr yal ală cồng nha ngan ngồn, ală bơta ờ niam, jơnau bơh tài gơlik geh mờ geh jơnau dan, jơnau sồr nàng pơn jat tai lơh niam broă lơh jat ngan ngồn tềm pềr, sơndră pơhì pơhà, hoac huơr tàm càr tàm tơngai tus.

Tàm Lâm Đồng, Mpồl kwang bàng jat sền bơh Quôk hội dê bơh Thượng tướng ồng Trần Quang Phương, Ủy viên Đảng dà lơgar, Phó Củ tịc Quôk hội lam bồ neh geh dơ̆ lơh broă mờ Ủy ƀan Ñân zân càr Lâm Đồng bè broă lam lơh jat ngan ngồn tềm pềr, sơndră pơhì pơhà, hoàc huơr tơngai bơh nam 2016 tus nam 2021.

Mpồl kwang bàng jat sền bơh Quôk hội dê lơh broă tàm Lâm Đồng

Jơnau yal tàm dơ̆ lơh broă ai gŏ, Lâm Đồng neh tơrgùm atbồ nền nòn ai, tă dơ̆ ngui kes priă dà lơgar, gàr niam ai di, ai tơl, rơcang sơndră hoàc huơr, tơrmù dồs dia. Lơh ngan tềm pềr tă dơ̆ ngui kes priă, pơgồp bal ală broă lơh, bơt bơtàu rơndap broă tềm pềr nàng lam lơh mơ bơh broă tam pà jơnau kờp dŭ mờ jơh bal tàm tŭ lam lơh jat; lơh jat nền nòn jơnau kờp dŭ kes priă dà lơgar geh Hội đồng ñân zân càr ring bal. Tàm broă tă dơ̆ ngui sùm tơngai bơh nam 2016 tus nam 2021, càr neh tềm pềr tàm broă cih, sền sơ wì, ring bal jơnau kờp dŭ, tơn jơh, atbồ ngui kes priă dà lơgar geh rlau 3 rbô 380 tơmàn đông.

Kwang atbồ mpồl kwang bàng jat sền, Thượng tướng ồng Trần Quang Phương - Phó Củ tịc Quôk hội đơs pơn dut tàm dơ̆ lơh broă mờ neh cih dờp, đơs niam ală broă lơh ngan bơh càr dê bè broă lơh lam lơh jat ngan ngồn tềm pềr, sơndră pơhì pơhà, hoàc huơr tơngai bơh nam 2016 tus nam 2021 bơh càr Lâm Đồng dê, đơs niam ală jơnau yal bơh Ủy ƀan Ñân zân, Hội đồng ñân zân mờ mpồl kwang bàng Quôk hội càr Lâm Đồng neh wil tơl jơh ală bơta. Phó Củ tịc Quôk hội sồr càr pal lơh loh ală bơta ờ niam, jơnau bơh tài gơlik geh mờ geh jơnau dan, jơnau sồr nàng pơn jat tai lơh niam broă lam lơh jat ngan ngồn tềm pềr, sơndră pơhì pơhà, hoàc huơr tàm càr tàm tơngai tus. Sồr sền sơ wì  jat gơnăp gơnoar tàm broă lam lơh jat ngan ngồn ală broă lơh adat boh lam bè lam lơh jat ngan ngồn tềm pềr, sơndră pơhì pơhà, hoàc huơr. Kờp sền ală tơngume lam lơh jat ngan ngồn tềm pềr, sơndră pơhì pơhà, hoàc huơr, mờ tơngume tờm là ai, tă dơ̆ ngui kes priă dà lơgar, atbồ phan bơna dà lơgar, hìu ù anih lơh broă dà lơgar dê, anih lơh broă, phan bơna gơ jat bal mờ ù, măi mok, phan bơna, atbồ ù tiah, phan kuơ tàm ù, atbồ cau lơh broă, broă rơndap tăp sèng tơrmù mpồl kwang bàng duh broă, tơrmù ƀiên cế nàng lam lơh jat geh cồng nha...

Phó Củ tịc Quôk hội Trần Quang Phương đơs tàm dơ̆ lơh broă

Tàm Gia Lai, mpồl lơh broă sồ 2 gơ wèt mpồl kwang bàng jat sền bơh Quôk hội dê bơh  Ủy viên Ƀan Cấp hàñ Đảng dà lơgar, Kwang atbồ Ủy ƀan Tài cíñ- Kes priă Quôk hội ồng Nguyễn Phú Cường lơh kwang atbồ mpồl neh geh dơ̆ lơh broă mờ Ủy ƀan Ñân zân càr Gia Lai bè lam lơh jat ngan ngồn tềm pềr, sơndră pơhì pơhà, hoàc huơr tơngai bơh nam 2016 tus nam 2021. Jat jơnau yal, tàm tơngai bơh nam 2016 tus nam 2021, càr Gia Lai neh tềm pềr geh rlau 4 rbô 368 tơmàn đông. Tàm hơ̆, lam lơh jat tềm pềr tă dơ̆ ngui sùm là 10% nàng lơh gơlik priă jền ai broă lơh niam wơl priaw nhai in rlau 1 rbô 154 tơmàn đông.

Tàm dơ̆ lơh broă, ală kwang bàng tàm mpồ jat sền bơh Quôk hội dê sồr kwang đơng lam bồ Ủy ƀan Ñân zân càr Gia Lai mờ ală sở, gah broă lơh lơh loh 2, 3 broă geh gơ rềng bè: broă lơh atbồ, sền gàr brê, tam brê; ală rơndap broă lơh bơcri lơh lơyài tơngai hơ pơrgon; sền sơ wì cồng nha ngui priă bơcri ODA tàm càr; bơta geh ngan broă lơh bơtơt rbòng dà Ia Mơr ờ hềt ngui jơh bơta pràn ƀồm dà; ală kal ke tàm bơtàu tơnguh năng lượng lơh geh wơl; broă atbồ, ngui dà, phan kuơ geh is tàm ù; broă tơrmù mpồl kwang bàng duh broă, tơrmù ƀiên cế.

Đơs tàm dơ̆ jat sền, Kwang atbồ Ủy ƀan Tài cíñ- Kes priă bơh Quôk hội dê ồng Nguyễn Phú Cường đơs niam kơnòl bơh càr Gia Lai dê tàm broă lam lơh broă lam lơh jat ngan ngồn tềm pềr, sơndră pơhì pơhà, hoàc huơr. Mờ kung sồr càr pơn jat tai tơnguh broă lam lơh jat geh cồng nha broă lơh do; geh kơrnuat lam lơh jat tàm tơl mpồl lơh broă, tơl tiah; sơlơ tơnguh lùp sền, sền sơ wì, jat sền; sền gròi đơng lam lam lơh ală rơndap broă lơh gam lơyài; geh broă lơh kuơmàng gơ wèt tus mờ ală rơndap broă lơh lời ing ờ hềt lam lơh, ngan là ală rơndap broă lơh lơyài lơh gơs; geh broă lơh atbồ, ngui phan kươ dipal, di mờ jơnau sồr.

Kwang atbồ Ủy ƀan Tài cíñ- Kes priă bơh Quôk hội dê ồng Nguyễn Phú Cường kung sồr Củ tịc Ủy ƀan Ñân zân càr Gia Lai đơng lam ală sở, mpồl, gah broă lơh geh gơ rềng cih dờp uă ngan rlau jơh ală jơnau đơs bơh mpồl kwang bàng jat sền dê; pơn jat tai bơ tơl, lơh sir jơnau yal nàng yal mpồl jat sền in tàm tơngai gờñ ngan rlau jơh. Mpồl kung geh cih dờp tơl làm ală jơnau đơs, jơnau dan bơh càr dê mờ geh tơrgùm yal mờ Ủy ƀan Thường vụ Quôk hội in tàm tơngai tus.

Cau mblàng K’Duẩn